JUNA 3
3
Juna ngikutken kata TUHAN
1Reh ka kata TUHAN peduakaliken man Juna, 2Nina, “To laweslah ku Niniwe, kuta si mbelin e, janah momokenlah man anak kuta e kata si enggo Kupeseh man bandu.” 3E maka iikutken Juna kata TUHAN, lawes ia ku Niniwe. Kuta Niniwe seh kal belinna, e maka telu wari erdalan nahe maka terbentasi. 4Ibenaken Juna erdalan arah tengah kuta e, janah kenca erdalan gedang-gedang wari imomokenna nina, “Empat puluh wari nari ikernepken me kuta Niniwe!” #Mat 12:41; Luk 11:32
5Anak kuta Niniwe tek man kata Dibata. E maka itetapkenna maka kerina arus erpuasa dingen make uis guni, subuk kalak si meganjang pangkatna bage pe si meterukna, tandana ia enggo jera kerina.
6Kenca ibegi raja Niniwe kerna si e, nusur ia i bas kursi kinirajanna nari, itangtangina jubahna, jenari ipakena uis guni, e maka kundul ia i bas abu.
7Isuruhna gelah imomoken man kalak Niniwe bagenda, “Enda perentah i bas raja ras pegawai-pegawaina nari. La banci ise pe man kai pe; kerina jelma, bage pe asuh-asuhen si mbelin ras si kitik, la banci man, la banci minem. 8Kerina jelma arus make paken guni bage pe asuh-asuhen. Sekalak-sekalak arus tutus ertoto man Dibata, janah itadingkenna lagu langkahna si melket dingen ipengadina perbahanen-perbahanen si jahat. 9Mbera-mbera salih ukur Dibata; mbera-mbera olanai ateNa nembeh, maka ola kita mate!”
10Iidah Dibata kai si ilakoken kalak ndai; iidahNa pe maka lanai ia ngelakoken perbahanen si jahat. E maka salih ukur Dibata, janah la surung iukumNa kalak e aminna pe enggo ikatakenNa iukumNa ateNa.
Currently Selected:
JUNA 3: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.