AMOS 3
3
1O kalak Israel, begikenlah kata TUHAN si ibelaskenNa kerna kam, kam si sada bangsa si ibabaNa i Mesir nari. Bagenda nina, 2“I bas kerina bangsa-bangsa si lit i doni enda kam ngenca bangsa si Kutandai dingen si Kuarak-arak. Em sabapna maka la banci la Kuukum kam erkiteken dosa-dosandu.”
Dahin nabi
3Lit kin dua kalak ras erdalan adi la ia leben enggo erpadan?
4Lit kin singa erdengum i bas kerangen adi langa ia jumpa si man jerngemenna?
Lit kin anak singa erdengum i bas liangna adi langa lit tangkapenna?
5Lit kin perik kena ragum adi la lit empanna i bas ragum e?
Banci kin ragum sayep adi la lit si ngkuitca?
6Adi iembus terompet i bas kuta, banci kin kalak la mbiar megisa?
Banci kin reh cilaka ku sada kuta adi la bekas penuruh TUHAN?
7Kai pe la ilakoken TUHAN si Erdolat adi la lebe ipetangkasNa sura-suraNa man suruh-suruhenNa, e me nabi-nabi.
8Megi sora singa erdengum, ise kin la mbiar?
Megi TUHAN si Erdolat ngerana, ise kin ngasup la meritaken kataNa?
Ukumen man Samaria
9Momokenlah man kalak si ringan i bas istana raja-raja Mesir ras Asdot, bagenda, “Pulunglah i das uruk-uruk sekelewet Samaria; pernehenlah uga rontangna ras jahatna si ilakoken i bas kuta e.”
10Nina TUHAN, “I bas rumahna si mbelin ipepulungna melala barang-barang si idatca arah kejahaten ras kinirawan. La itehna pe nehken si bujur. 11Erkiteken si e, ikepung musuh me negerina, bentengna iruntuhken, dingen rumahna si mbelin e irampasi.”
12Nina TUHAN, “Bagi idat permakan dua nahe tah sitik nari ngenca i bas cuping biri-biri si ipan singa, bage me pe piga-piga kalak nari ngenca pagi tading kalak Samaria si genduari medem-medem alu senang i das bale-bale si mejile.
13Genduari, begikenlah, janah persingetilah man kesusuren Jakup,” nina TUHAN si Erdolat si Mada Kuasa. 14“Tupung warina Kuukum bangsa Israel erkiteken dosa-dosana, Kukernepken pagi batar-batar ingan ersembah i Betel. Kerina tanduk batar-batar Kupenggelken dingen Kudabuhken ku taneh. #2Raj 23:15 15Rumah-rumah guna paksa mbergeh ras paksa ngisah Kurontasken kerina. Rumah-rumah si iukir alu gading iruntuhken, janah kerina rumah si mbelin Kukernepken.”
Currently Selected:
AMOS 3: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.