AMOS 2
2
Moap:
1Nina TUHAN, “Kalak Moap la erngadi-ngadi erbahan dosa. Erkiteken si e la banci lang Kuukum ia sabap megombang kal ia; itutungna tulan-tulan raja Edom jadi kapur. #Jes 15:1–16:14; 25:10-12; Jer 48:1-47; Esek 25:8-11; Sep 2:8-11 2Erkiteken si e Kupesusur api ku taneh Moap dingen Kuciluk benteng-benteng Keryot. Mate kalak Moap i tengah-tengah sora perang si gejek, tupung serdadu ersurak-surak dingen terompet erkata. 3Kubunuh si erkuasa i Moap rikut ras kerina peminpin-peminpin negeri e.”
Juda:
4Nina TUHAN, “Kalak Juda la erngadi-ngadi erbahan dosa. Erkiteken si e la banci lang Kuukum ia. Sabap itulakna pengajarenKu dingen la ipakena perentahKu. Enggo papak ia ibahan dibata-dibata si la tuhu si isembah nini-ninina nai. 5Erkiteken si e Kupesusur api ku negeri Juda dingen Kuciluk benteng-benteng kuta Jerusalem.”
Ukumen Dibata man Israel
6Nina TUHAN, “Kalak Israel la erngadi-ngadi erbahan dosa. Erkiteken si e la banci lang Kuukum ia. Sabap idayakenna jadi budak kalak bujur si la ngasup nggalar utangna, janah kalak musil alu erga sepasang selop. 7Iperjakina kalak si enggo kote dingen la ergegeh, ijemjemkenna kalak musil i bas dalan nari. Anak dilaki ras bapana erlua-lua ras sada budak-diberu; erkiteken si e iliamina kap gelarKu si badia. 8I bas tep-tep ingan sembah-sembahen, nterem kalak medem encabinken uis si igadeken kalak musil man bana. I bas rumah Dibatana minem-minem anggur ia, anggur si ibuatna i bas kalak si rutang duit man bana.
9Amin bage pe, o bangsangKu, erkiteken kam nge maka keri kal Kukernepken kalak Amori, kalak si gedang-mbelin bagi batang kayu eru, dingen mersik bagi kayu jati. Kukernepken buahna i datas nari, uratna i teruh nari. #Ul 3:8-11 10Kubaba kam ndarat i Mesir nari. Kutaruhken kam arah gurun pasir empat puluh tahun dekahna, janah Kubereken negeri kalak Amori jadi sikerajangenndu jine. 11Anakndu si dilaki deba Kupilih jadi nabi, deba jadi Nasir. Ma payo kin bage, o bangsa Israel? Aku, TUHANndu kap si ngerana enda. #Bil 6:1-8
12Tapi isuruhndu kalak Nasir e nginem anggur, janah ipaksandu nabi-nabi maka ola iberitakenna katangKu. 13Erkiteken si e, genduari Kudehken me kam ku taneh maka kam mengkik-engkik bagi gereta si dem isin page. 14E maka kalak si meter kiam pe labo banci pulah; kalak mbisa bene gegehna, serdadu pe la ngasup engkelini kesahna. 15Pemanah-manah la ngasup ertahan, si megegeh kiam la ngasup miser, dingen kalak si ngersak kuda la ngasup kiam engkelini kesahna. 16I bas wari si e subuk serdadu si mbisa pe mulahi senjatana, jenari ngerbul ia.” Bage nina TUHAN.
Currently Selected:
AMOS 2: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.