Mhasidie 31
31
Kediu Lemuel Die
1Kediu Lemuel die. Puo zuo puo pethakeshü siedzedie:
2Harie a nuo, ki-a?
A nouprau ki-a?
A die phrakeshü nuou, ki-a?
3N kekuo pie thenumia gei shü hie,
n zhoko pie kediko pekawayakezhako gei shü hie.
4Harie Lemuel, haha kediko la mo ho,
zu kriekecü kediko la mo,
morei zu kekuo kriekecü kedimia nuonuoko la mo;
5uko zu krielie di thezho-u rükra mota di,
kemezhie kebamia mezhüko chü kediwa rei silie lhomu.
6Zu kekuo pie katatuoü kebako tsüshücie,
mu zu pie u nou kemezhiethor kebamia tsüshücie.
7Uko bu krielie di u tsopfhü rükra mo,
mu u mezhieko rükra sa motalie.
8N tie mekuopie die pulie kelhomia,
u kekhruohi tuo kemoko mezhüu pulie.
9N tie mekuopie mezhü tou di capi chülie,
kejümia mu ketsopfhümia zhapu chüshülie.
Thenu kevipfü Puo Ketshe
10Supuonie thenu kevipfü puo ngulie vi ta?
Puoe rubiko ki rei puoma rekuo.
11Puo nupfu noue puo peletsapfü baya,
mu puoe mha kevi puorei tsopfhütalie lho.
12Hapfüe puo kerhei chie puo nupfu gei mha kevi chütuo mu mha kesuo chüshülie lho.
13Puoe nhachümie mu flaxzhüpfü pfhülieya,
tsiu puo nei siei di puo dzienie pie mhachülieya.
14Puoe lhithomia rouko kemhie zo,
puoe kepetse nunu puo kecüca se vorlieya.
15Puoe teiso kemonu sielie di
kecüca chüpie puo kinuko tsüya,
mu mhatho pie puo kituopfüko tsülieya.
16Puoe kiülie dze le di,
süu khrülieya,
puo dzie pie chü di khubelie cielieya.
17Puoe kekuo pie puo chie phalieya,
mu puo bou chü kemeteilieya.
18Hapfüe puo lhi mevilie vi ücü siya,
teizei gei puo mitu mhetaya mo.
19Hapfüe puo dzie pie tshanyoseiu gei shülieya,
mu puo dzie pie dziecie seiu thezelieya.
20Hapfüe puo dzie chapie kejümia tsüya,
mu puo dzie chapie kemenga kebako tsoshüya.
21Pekrie krü keler ki hapfüe puo kikru la michie baya mo,
kekreilamonyü puo kinuko pete pfhe meriemegekecü dzie phre batayacü la.
22Hapfüe puo thuo mha kewhepfheko chülieya;
puo pfhe-e pfhe kemenepfü mu teimeziekecüpfü se chüya.
23Kharu nu mia puo nupfu siya,
puo rüna nu phichüko donu baya.
24Puoe linenpfhe kemenepfü se pfhenei chülie di süu zelieya;
chiepha pie lhithomia ki zeshüya.
25Puo kekuo mu therhu sa pie puo pfhenei chü;
tsiu hasietsa hapfüe puo neituo.
26Hapfüe puotie tiega sie di mhasi puya,
mu puo meü nu zhovi zho pethakecü tuo.
27Hapfüe puo kikru dze le menuoya,
mu mhachü kemecü niekhrüda cüya mo.
28Puo nuonuokoe sier puo üse thejakepfüpfü ü kieya;
tsiu puo nupfu rei puo tsheya:
29“Thenumia kekra rei mhachü pevi phishü,
derei no we süko pete ki vikuo.”
30Mia nei chükecüe mha seketsilieya,
mu zivi-e kemethuo zo,
derei thenu Jihova khrüpreiyakezhapfü sü mia puo tshetuo.
31Puo dzie mhatho siko pie puo tsücie,
mu puo mhathoko bu kharuko nu puo tsheshücie.
Currently Selected:
Mhasidie 31: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More