Mhasidie 30
30
Agur Die
1Agur, Jake nuou siedzedie.
Themiaue pie Ithiel,
tsiu Ithiel mu Ukal ki pushü:
He-i Kepenuopfü, a meziete,
He-i Kepenuopfü, a meziete.
Kimhie di a thalie ta?
2A themia melothorcü puota zo;
a themia mhasimhale a gei tuo mo.
3A mhasi rei silie mo.
Morei kemesako kesikele rei a gei tuo mo.
4Supuo teigei sie di la ker ga?
Supuo puo duthe nunu teikhrie thezelie ga?
Supuo pfhe nunu dzü dzelie ga?
Supuo kijü vala ketso chüshü ga?
Puo za supuo ga?
Mu puo nuou za supuo ga?
No puo si tou ze!
5Ukepenuopfü die pete mesa zo;
puoe puo gei rüzhükelieko yalieya.
6Puo dieko pe sa hie,
moro puo n kerhietuo, mu no kemedamia ücü silietuo.
7A n ki mha kenie chaya;
a se mhodzü sünie khashü mvüta hiecie:
8A kinu ketho kemo mu kemeda chü kedeipie kepetse nu shüwacie,
kejü morei kenyi rei pie a tsü hie;
a la puotoukecü kecüca pie a va chüshücie,
9moro a pevülie tse, n phra mvüta,
di sie, “Jihova sü supuo ga?” isita rei silie lhomu,
morei mhajüta ro rüguta,
di a Kepenuopfü za se thedo chüta rei silie lhomu.
10Niepumia ki kituou pejo hie,
moro kituou n rüsewa di n bu jotatuomu.
11Themia huo u puonuo rüse,
mu japie u zuonuo tsü kemo huo tuoya.
12Themia huo u thuo u mhi ki mesa ütuoya derei u kerhu khrü kemesalie kemo tuoya.
13Themia huo kide u mhi rükrie shi;
kidepuo uko mhi perho kerükrie tuoya shi!
14Themia huo hue zhiecha,
mu huo hue zhietenuo zo,
kijü nu mhakejümia,
tsiu themia donu ketsopfhümia mezulietuo üdi.
15Rüva puo nuopfü kenie ba;
sünie sie, “Khashücie, khashücie,” ibaya.
Mha se-e mhakipuorei u kelhuo chülieya mo;
diau mhakipuorei sie “Vite,” iya mo.
16Sheol, nuojüpfü nuobvüu,
dzü pie kijüu tshulie kemo,
mu miü mhakipuorei sie “Vite,” iya mo.
17Umhi pie u puonuo krenyü mu u zuonuo die ze mvüyakezhako,
razha nu shüzhako uko medu se par di chürhaüko bu cülietuo.
18Mha se-e a la a ngothor zo;
diau a silie kenjü:
19teimeluo gei tsüü kevo cha,
tsiekrie gei tinyhü kevo chau,
dzükezha nu rouu kevo chau,
mu mia puo rüümiapfü puo ze vokezhü chau.
20Thenu pieüpfü chae hau we:
puo mhacülie, mu puotie süwa,
di sie, “A mha kesuo puorei chü mo” isiya.
21Mha se lanu kijüu perüsürüsa ba;
diau la süu pfülie kenjü ba:
22Kituomia puo sier kedi chükelie ki,
tsiu mhasikemomia puo kecüca pie puo tshukelie ki,
23mia u khrieyakemopfü puo nupfu ngukelie ki,
mu kituomiapfü puo sier puo niepupfü ka wekelie ki.
24Kijü nu mha diae kecükie zo,
derei ukoe mhasithor zo:
25Nhicoe metei kemo doupuo zo,
sirei teile ki ukoe kecüca keselieya;
26konuoe kuo kemo doupuo,
sirei tsiekrie geinu uko ki chülieya;
27kupriepfüe uko kedi jü;
sirei uko peteko kekrodepfü tuoya;
28u dzie pie kipfhenuo telie vi,
sirei süue kedimia kiko nu baya.
29Mha se-e uko kevo phicha ngu vi phi zhü;
diau chatuo ngu vi phi:
30Loshau, khunuo donu kekuotho,
mu mhapuo mhodzünu rei tsiesie laya mo.
31Vüdzü puo rhiekerhuu, mvüdo-u,
mu kediu puo themiako mhodzü metei kethau.
32No mhasi mo di, n thuo n tshe tuota üro morei mha kesuo rhü tuota üro,
n dzie pie n me keguliecie.
33Mithunudzü kerhükeshü ki thunudzükhie parlieya,
u nyhüca thekeshü ki thezie parya,
mu u noumeyiekecü geinu kegeikecü pesieshüya.
Currently Selected:
Mhasidie 30: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More