Mhasidie 3
3
Dieze Chülienu Tarhokeshü
1A nuo, a kepethadie rükra mota hie,
sikecüumonyü a diekhakeshüko bu n melou nu balie,
2sitse teisozha tsiu teicie kekra,
siro ketshukelhuo n gei vortuo.
3Diethokecü mu ketho bu n khawa hie;
sünie pie n vo nu phapfülie;
sünie pie n melou nu thulie.
4Sitse no Ukepenuopfü mu themia mhodzünu pelelie kesü chülietuo.
5N melou pete se Jihova pelelie;
tsiu n thuo n mhasi peleta hie.
6N cha pete nu puo sanyülie,
sitse puo n chako chü kemezhüshütuo.
7N mhiki n thuo n üse mhasi üta hie;
Jihova preilie mu kesuou therhielie.
8Süue n mo keshürho mu n phou chü keshürheishütuo.
9N kebau se Jihova rhulie,
tsiu n mhatho si kerieko pete se;
10sitse n lhaki tshulietuo,
mu n khubezu se n liki tshumezü balietuo.
11A nuo, Jihovae n pethakecü mecüta hie,
morei puo n ruokeshü n nyieta hie;
12Jihovae puo khriemia petha kemezhüshüya,
miapuonuoe puo nuo puo khrieu pethayakecü tuoi.
Kinyi Ketho
13Mhasi ngukeliemia, mhacamhala lelieyakezhamia kenei theja ngulieya.
14Süpfü mhapfhüe rakachü ki rei vikuo,
mu puo se kelerko suna ki rei vikuocü la.
15Süpfüe cümenyie ki rei rekuo;
mu no mengukezha pete pie süpfü ze kemejükeliepfü mo.
16Puo dzie puo zatsa rhei kecha ba,
tsiu puo vitsa liro kinyi mu therhu ba.
17Puo chaüko sü thenou kemvü,
mu puo chatseko pete noune zo.
18Puo thezekeliemia kerhei seibo puo chülieya;
mu puo se bakeliemia u nei siei baya.
19Jihovae puo mhasi se kijü chüshü;
puo kesikele geinu teiko chülie;
20Puo mhasi üse kesouko nu dzü bu rüluo parlie,
mu kimhoukoe thezei pekrüshü.
21A nuo, hako bu n mhi therhieta hie,
mhasimhale kevi tsiu kemenuo se zolie,
22sitse sükoe n ruopfü la kerhei chülietuo mu n vo gei rütso puo chülietuo.
23Sitse no n cha nu khrukhre di tuolietuo,
mu n phi mesülie lho.
24No batsu#3:24 Gk: Ibri Zhütsu. rei michietalie lho;
no rühi zhü tsucü ki ze tshüilietuo.
25Kemichie mhai kevor prei hie,
morei teirükrierükhrie vor kerüzhümia va rei;
26kekreilamonyü Jihova sü n kethepfuucü la,
tsiu n phi bu tetsutalie lho.
27Kevi pie ngulie kezhümia ketsü kethewa hie,#3:27 Ibri Puo niepuko kinu.
n dzie nu süu chülie kevi kekuo keba ki.
28No chülie vi ba üro n zanuou ki, “Vo di,
sodu nu vorlie, sodu nu khashütuo,” isikecü pu hie.
29N zanuomia gei mha kesuo rhü hie;
puo n pele di n khieki keba la.
30Mia n gei mha kesuo puorei chü moliro puocapuola jü di mia ze kegei hiecie.
31Mia kemvü kechüko ngu n rota hie,
mu puo zho puorei lie hie;
32kekreilamonyü Jihova mhodzüki kerüpfhimia sü kerütsekecü la,
derei kemezhümia gei puo kethepfu baya.
33Jihova rüse-e kerüzhümia gei baya,
derei puoe japie kemiathomia kebachü nu shüya.
34Puoe mia krenyüyakezhamia kre baya,
derei ngukemezhie pie thenou kerünuoko tsüya.
35Mhakesimia therhu welietuo,
derei kerhanyakecümia thenga seüdzütuo.
Currently Selected:
Mhasidie 3: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More