Proverbios 31
31
Ti Lemuele laj yal ti oy xi x'ale ti c'ope
1Xi laj yal ti Lemuel ajvalil ta jteclum Masae, ti tojobtasat o yu'un ti sme'e:
2Stojol ti xivocolet ta stojol ti Diose,
laj jvoq'uesot un, cuni ol,
¿mi oy la yan ti c'usi ta xcalbot une?
3Mu xavilbajin aba yu'un ti antsetique,
yu'un ja' ta scoj ta xch'ay ta be ti ajvaliletique.
4Le' une, cuni Lemuel, mu lecuc ma' ti x'uch'obajic no'ox ti banquilal ajvaliletique, ti its'inaletique,
ti xyal no'ox yu'unic ti vinoe, ti pasem uch'bolale.
5Xu' ta xc'ot ta pasel un, ta xch'ay ta yo'ntonic ti oy c'usi jbel tsots albile,
ti mu xa xaq'uic ta venta sc'op ti buch'utic abol sbaique.
6Ti ya'lel uvae, ti c'usitic yan pasemique,
q'uelo no'ox ti yuch'icuc ti buch'u tsalbile, ti mu'yuc yipal yu'unique.
7Yuch'icuc un, bal to xa'i mu xvules ta sjol ti me'unale xchi'uc ti svocolique.
8Tic'o ave ta spojel ti buch'u mu x'a'yibat ti sc'opique;
va'ano aba ta spojel un ti buch'u mu xpac yu'un ti sc'oplalique.
9Tic'o ave ati', tsatsajan ta xchapanel un;
va'ano aba ta spojel ti me'un mu'natetique, xchi'uc ti mu xpac yu'un ti sc'oplalique.
Yich'el ta muc ti ants ti lequil yajval na ta stuc'ulanel scotole
10Ti ants ti lequil yajval na ta stuc'ulanel scotole, nomantic bu ta tael,
ja' mu sta sc'oplal yutsiquil ti baxtone.
11Spatoj lec yo'nton yu'un ti smalale, xtojob, xloc' venta ta x'ile.
12Ti c'u sjalil cuxule, naca lec ta spas ta stojol ti smalale.
13Ta sa'ilan tsots xchi'uc xela no,
xmuyubaj no'ox ta xabtelan c'usitic c'upil sba ta xloc' ta luchel yu'un.
14Co'ol s'elan jbolomajel barco ta nom ta xich' talel ti c'usitic ta xtun yu'une.
15Yamal to sna' xjulav,
sob no'ox ta smalq'uinan yalab xchi'uc sme' mosovtac.
16Ta x'och ta xpaxyaltael banomil, mi lec laj yil une, ta sman un,
ta sventa ti slubel xchamel une, ta xlic sts'un uva.
17C'alal ta xil stsac xa yip ti yabtele, sjunul yo'nton ta xac'be yipal.
18Mu xch'ay juteb sat ti mu xtub ti sbolomale;
sob ta stam, mal xa c'ac'al ta xicta ti yabtele.
19Ta xpich' yoc sc'ob ta snaunel no xchi'uc ta sjalel.
20Ta stic' sba ta scoltael ti me'un mu'nate xchi'uc ti buch'u mu'yuc c'usi x'ayan yu'unique.
21Ti ta yorail taive, mu svul yo'nton ta stojol c'u yepal oy ta snae,
scotol ti c'u yepalique, oy lec pimic sc'u' yu'un.
22Ta smeltsan pimiquil tasil yu'un stuc,
jun yutsil ti sc'u' ta slape.
23Ti smalale, ojtiquinbil ta jteclum yu'un,
cajal sc'oplal c'otem jech c'u cha'al buch'u ich'bil ta muc' ta jteclume.
24Ta smeltsan loin c'u'iletic xchi'uc chuquiletic ma' ti stuc une,
ta xchonbe ti jmanolajeletique.
25Yip c'otem ta xa'i ti mu'yuc buch'u xpojbun ti yutsilale;
ma'uc xvulvun yo'nton xchi'uc ti c'usi ta xc'ot ta pasel ti oc'om cha'eje.
26Naca ta sbijil ti c'usi ta xloc' ta yee;
ta xchanubtasvan ta yutsil slequil yo'nton.
27Stuc'ulanoj c'u s'elan ti yut snae;
ti ma'uc ta yabtel staoje, j'ech'el mu stun slajes.
28Xi ta x'albat sc'oplal yu'un ti yalab xnich'nabe xchi'uc ti smalale:
29“Ti alac' sba antsetique, yepal oy,
le' une, atuc no'ox ti jelavem yutsil ti avo'ntone.”
30Ti lo'lajem o'ntonal yu'un ti yutsiquilique, ch'ayel xal o,
ti alac' sba ta q'uelele, ac'vanej no'ox ta pich' o'ntonal;
yan ti ants sna' xi'ta ti Diose, sc'otebal o ti lequil c'optabile.
31Ta sba satuc scotol jteclum, lequil c'optabiluc.
Ich'biluc c'otuc ta muc' scotol yutsil ti yabtel laj spase.
Currently Selected:
Proverbios 31: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000