Proverbios 30
30
Ti Agure laj yal ec ti oy la xi x'ale ti c'ope
1Xi laj yal ec ti Agur xnich'on ti Jaquee, ti nacal ta jteclum Masae. Ti Agure une xi xcholet laj yalbe ya'i ti Itiele xchi'uc ti Ucale:
2Jtuc xa no'ox ma' ti jun jpimil lich'i ta banomile,
ti mu xca'ibe ti xchiquinal ta j'ech'ele.
3Mu'yuc ma' ti jbijil une,
mu cha'beluc jna' c'u s'elan oy ta sjol ta yo'nton ti Ch'ul Diose.
4¿Mi yu'un la oy buch'u muy batel ta vinajel, ts'acal to yal talel?
¿Mi yu'un la oy buch'u ta sc'ob no'ox xu' ta spajes ti iq'ue?
¿Mi yu'un la oy buch'u ta smochib c'u' no'ox xu' ta svol ti nabe?
¿Buch'u laj yac' bu c'alal ta xpaj talel spajeb ti banomile?
Mu xalo'laun ma' ti xana'be sbie, ti xana'be sbi ec ti xnich'one.
5Ti Diose ta spoj ti buch'u spatoj yo'nton ta stojole;#2 S 22.31; Sal 18.30.
scotol ti c'usi yaloj une, stac' jpat co'ntontic yu'un.
6Mu xavepajes ta yalel ti c'u yepal yaloje,
le'e, xu' xasvulilan, ta xacom ta jutc'op yu'un.
7Cha'tos ma' ti ayanem ta co'nton ta jc'anbote, Ch'ul Dios;
c'uxubajan ti xiuc c'otuc ta jtojol ti mu to ta xichame:
8Tenbun jipbun loq'uel ta jtojol ti mu'yuc jmelol jtuq'uile, xchi'uc ti jutc'ope,
mu yepaluc xavac'bun ti c'ulejale, mi ja'uc aq'ueloj ti jme'unale,
ac'bun ti jve'el cuch'om ti tsots sc'oplal ta xtune.#Mt 6.11.
9Yu'un mi yepal no'ox jtaoje, mu nan xacac'ot ta venta un,
ta xlic cal ti mu xacojtiquinot une.
Mi ch'abal une, xu' xi'och ta elec' liquel un,
ta xlic chopol c'opojcun ta ach'ul tojol un.
10Mu chopoluc xac'opoj ta sba ta sat yajval ti mosovile,
xu' nan ta sbisot ta cotol chaval unbi, ta xata avocol xchi'uc.
11Oy buch'utic ta sbis ta cotol chaval ti stote,
mi ja'uc ta slequil-c'optaic ti sme'e.
12Oy buch'utic mu sna' c'usi chopol ta spasic ti yalojique,
mu'yuc yac'oj sbaic ta mesel tusel un.
13Oy buch'u cajal c'otem ta xa'i sbaic,
xtoyet xa'i sba ta sq'uelel yan ti mu'yuc stue.
14Oy buch'utic ti co'ol s'elan espada, co'ol s'elan cuchilu, ta x'abtej ye sti'ic ta yilbel svocol
ta stsutsesel ta j'ech'el ti me'un mu'natetic ti oy ta jteclume.
15Ti cha'cot yol ti jts'uts'-ch'ich'e xc'anlajetic no'ox ta j'ech'el.
Xi s'elan ti oy oxtos mi chantos ti mu'yuc spajeb xc'anc'un ta xa'ie:
16ti muquinale,
ti machero antse,
ti mu'yuc spajeb ta stunes vo' ti taquin banomile,
ti c'oc' mu'yuc spajeb ta xve'baje.
17Ti buch'u sc'a'epal sat ta xil ti stote,
ti ta sbis ta jeche' mu yayil ti sme'e,
xtun o ma' taj une ti ts'uts'batuc ya'i sbec' sat yu'un ti ic'al mute,
lilineuc ta ti'el ya'i yu'un ti tararane.
18Xi s'elan oy oxtos mi chantos ti ch'ayal ta xic'ot yu'un ti mu xca'ibe ti smelole: 19c'usi xut ti xvilet ta vinajel ti xique,
c'usi xut xquilet ta lican ch'entic ti chone,
c'usi xut ta ba vo' no'ox ta xanav ti barcoe,
c'usi xut ti ic'bil xch'ulel yu'un ants ti vinique.
20Ti jlo'laej vinic antse xi ta xlic spase:
ta xve', cus xa ye liquel un,
ta sva'an sba ta j'ech'el ti mu'yuc c'usi chopol spasoje.
21Oy chantos ti xi s'elan stalel ti jnaclejetique, ti mu ts'icbaj ti c'usi ta spas ti ta xac'be xi'el ti muc' ta lume:
22ti jun mosovile ta xc'ot ta ajvalil,
ti buch'u xvanet no'oxe, oy no'ox sve'el,
23ta xmalij ti ants jipbil tenbil xae,
ti me' ajvalile ta xa x'och ta xq'uexol ti me' mosovile.
24Oy chantos biq'uit chonetic ta banomil
ti xi s'elan x'ech' to xtojobic ti ja' mu sta ti buch'utic oy sbijilique:
25ti q'uise, mu'yuc yipal yu'unic un,
ja'uc le'e, mu no'ox albajuc yepal svoloj sbaic ta yorail q'uepelaltic ta xepal-tsob ti sve'elique;
26ti cotometique sna'inojic ti lican ch'entic ti xi no'ox yepal xvoletique;
27ti c'ulubetique, mu'yuc ajvalil yu'unic, ja'uc le'e, jmoj xvolet ta xvilic;
28ti ocotsetic ti jmich'el no'ox ta c'obale, ma'uc to ta sjac' ti c'usi s'elan ta x'och batel ta sna ti ajvalile.
29Oy chanchop ti oy yipal yu'unique, ti xi s'elan c'upil sba ta xanave:
30ti leone, chon bolom ti xi'bal sbae, mu jtosuc ti ta xi' yu'une;
31ti cots toyobba xa'i sbae, ti tot tentsune,
ti ajvalil jba'be ta stojol ti yajsoldadotaque.
32Mi ta bolatil xa no'ox xu' avu'un ti avaloje,
ti acaj-nopoj xa ta spasel ti mu albajuc xchopolale,
nopo xa no'ox ava'i unbi.
33Mi ta xajuy ti pits'bil chu' vacaxe, ta xlic meltsajuc avu'un ti quexue;
mi tsots ta xamaj abae, ta xloc' ch'ich' ta ani';
mi xavojet xa ta sa'bel sjol ti yane, ta leto xc'ot ta tsutsel unbi.
Currently Selected:
Proverbios 30: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000