Oseas 13
13
J'ech'el sts'ijlajan ta xcom ti jteclum Israele
1C'alal xbic'tal c'opojic no'ox steclumal ti Efraine, ti jvoc' snitilultac ti Israele peq'uel yac'oj sbaic ta stojol. Oy ono'ox sc'oplal ta xcham ti Efraín ti laj sta smul ta scoj ti laj snijan xchiman sba ta stojol ti Baale. 2Staoj yav ochem yipal yu'unic ta sa'el ti smulique. Ta s'unijesic ti plata yu'unique yo' jech ta smeltsanic ti loc'tabil diosetique, ja' ti c'usi xtal ta sjolic ta smeltsanel ti c'upil sba ta xilic ti yabtelinojic ta sloc'taele. Ta jech yepal un, xi ta xlic yalique: “Ac'beic milbil matanaletic.” Jech ti jnaclejetique sts'uts'ic xa ti sloc'obbail ch'in tot vacax ti ja' sdiosique. 3Ja' yu'un un, ti stuquique c'otemic jech c'u cha'al yalemal toc ta sob ic'luman. C'otemic jech c'u cha'al sts'ujulal job ac'ubal ti sob no'ox ta xch'ay batele. C'otemic jech c'u cha'al c'a' jobel ti cuchbil ta xbat yu'un ti iq'ue.#Sal 1.4; Jer 13.24; Sof 2.2. C'otemic jech c'u cha'al ch'ail ti xtomet no'ox ta sac ch'ay ti bu ta xmuy batele.
4Ti Diose xi ta xale: “Vu'un ti Ajvalilune, ti Diosun avu'une, ti xi s'elan ti oyot to ox ta jteclum Egiptoe: Jtuc no'ox c'otcun ta Dios avu'un. Ma'uc me ti xlic ava'an yan avajdiose. Vu'unun ti avajpojvanejune.#Ex 20.2; Is 43.11; 45.21. 5Vu'un laj jchabiot ti c'alal t'ajaloxuc ta c'ac'al ta sbajtical banomile. 6C'u stu un, c'alal mu xa xlaj alajesic ti c'usitic ta xatun ta xalajesique, lic atoy abaic ta jtojol, laj ach'ayicun ta avo'ntonic.#Dt 8.11-17. 7Ja' yu'un ti va'i s'elan taje, ta jco'oltas jba ta stojolic jech c'u cha'al jcot león, jech c'u cha'al jchop o ta bolom ti xpatet xa ta xpa'ivan ta bee. 8Ta xiloc' batel, xba jmaquic ta be jech c'u cha'al jcot me' oso ti capem sjol ta scoj ti ch'ayem ti xch'in alabtaque. Ta jlilinbe ya'i ta jatel ti yo'ntone. Ta jlilin no'ox ta anil jech c'u cha'al ta spas ti jcot leone. Ta jbic'tal jechilan jech c'u cha'al ta spas ti pucujil jti'oval chon bolome.
9“Ta jtubbe sc'oplal ta j'ech'el ti Israele. Mu'yuc buch'u xu' ta smac ta be. 10Ja' yu'un un cha'e, ¿bu oy ti ajvalil avu'un tana ti ta stic' sba ta spojel scotol ti jteclumetic avu'une? ¿Bu oy ti banquilal jpojvanej avu'un ti cuchem yu'une, ti ja' laj ac'anbe ti ac'o sva'anbot ajvalile xchi'uc ti banquilal jpas-mantaletique?#1 S 8.5-6. 11Ti jech ilinemun avu'unique, jech o xal laj jva'anboxuc ti ajvaliletique.#1 S 10.17-24. Ja' no'ox ti jech ilinemun avu'unic xtoque, jech o xal laj jtubboxuc ti sc'oplalique.#1 S 15.26.
12“Ich'bil lec ta venta smul scolo' ti Efraine. Bejel lec ta vun com ti smule. 13Ti Israele, sta xa yual ti ta xvoq'ue. Ja' no'ox un, ja' jun olol ti jeche' no'ox tey xc'uxc'un ta x'ech' yu'un ti c'ac'ale. Mi ja'uc jutebuc oy ta yo'nton ti ta sts'unan sba yalel jech c'u cha'al ti voq'uel ayanele. 14¿Mi yu'un ta to jpoj loq'uel ti jech u'ninibilic yu'un ti muquinale? ¿Mi yu'un ta to jcoltaic loq'uel ti oyic ta lajebale? ¿Bu bat avu'un ti jelavem xalilinvane, lajebal? ¿Bu bat avu'un ti c'usi tsots xu' avu'une, muquinal?#1 Co 15.55. Mu xa ts'icbajuc ta xca'i yu'unic ti jnaclejetic li'e.” 15Ac'o mi yepal no'ox c'usi x'ayan yu'un ti Israel jech c'u cha'al ts'o'ol ta nich ti momole, ta xmajat yu'un ic' ti ta xlic talel ta sloq'ueb c'ac'ale, ti xjumet no'ox ti ta xlic talel ta sbajtical banomile. Ja' yu'un un, ta xlic taquijuc, ta xlic uluc ti tuquem vo'etique. Yu'un ti sc'ulejal ti toyolic stojol ti c'usitic c'upilic sba ti oy yu'une, ta xbec'bat batel ta elc'anel yu'un ti yajcontrae. 16Ti jteclum Samariae lamal ta xc'ot ta sba ti tsitsel ta scoj ti laj scontrainic ti Diose. Ja' yu'un un, espada xa'i xcham xlajic. Yan ti ololetic yu'unique jisel ta lum xa'i xcham xlajic. Jat xi xch'ut ti antsetic ti buch'u xchi'inojan ti yolique.”#Os 10.2,7,14.
Currently Selected:
Oseas 13: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000