Filipenses 3
3
Dá'maq ỹaatqajam no'uen ñicyaxac
1Ca' nagui qamiri ỹaqaỹarolqa, netooñita'gue so qara'gaxala'. Chaqai se se'miaqta'a quiyim liỹa shiriñi dá'maq shi'gue shiriñi, ma' 'xoic da lovic caqamiri. 2Rovichii'o' ná'maq 'neetari' ca pioq, ná'maq ỹo'ueetetac na se no'uen, chaqai ỹo'uet na nichaxauec quena noshicmaxa. 3Ma' ná'maq ỹaatqajam llic qaỹa'ue na netanec na loshicmaxa, ca chaqainaua nauá'maq qomi', ma' chicqochigui so Espíritu Santo quiyim ñqouagaxainqatacot ñi qota'a, chaqai ñitoonqata'gue quiyim qomi' lalamaxarete' so Cristo Jesús. Chaqai se spi'ỹaaqatapega na re'qoochigui qanetanec. 4'Eno'm ỹim qai'neeta 'ue quet cá'maq 'neeta quiyim spe'eetapegalo nauajo, ma' qaica quet cá'maq napacalec aỹim quiyim spe'eetapegalo naua'maxare. 5Ma' qaỹa'ue na netanec na ỹoshicmaxa na' ime ñi'qaañi quecaua ocho na'xata', ma' iuo' na Israel laseripi, sachicqaugui na llaalqaipi so Benjamín, naua ỹa'qaatqa 'nejme' naua la'qaatqa saua ita'al hebreo lase'. Ỹim salequetaugui na'le na qohinac fariseo, ma' ỹaatqajam quejlgoto naua naqataxaco chicqo'oto so Moisés. 6Ỹaatqajam 'ue da ñapacqajnaxac, ca vire'ta quiyim socanaxantapigui ná'maq mashic huelec so Cristo. Chaqai quedá'maq na'maqataxac da chaalataxac sqaica ca ishit quiyim 'ue quet ca ỹa'xat, ma' qaica ca ñapacalec quena naqataxaquipi. 7Qam naua'que nauajo quenauá'maq 'ue quen ca 'netegue nqaishin na'le, qam nagui qaica ca 'netegue nqaishine', ma' sapacqajnauec so Cristo. 8Qam mesqaidaata dajo, ma' ná'ogue ná'maq hueeto'ot quet aỹim qaica quet cá'maq 'negue nqaishin, ma' se nalo'guit nqaishin dá'maq 'neeta quiyim seuana so Cristo Jesús só'maq ỹa'gaxala'. Ma' chaqaiso só'maq Cristo só'maq 'em quiyim ná'ogue ña'laxatañi, chaqai ná'ogue 'neetari' nqaishin ca lete, ma' sahotaque ỹaueguec so Cristo, 9chaqai quiyim ña'deeta'guit so'maxare. Qam mesqai chicqaugui cá'maq chi ña'maqataxac quiyim shiquichi'nguilo naua laqataxaco so Moisés; ta'ta'a quiyim dá'maq 'maqataxac qoỹaanem quiñi qota'a cá'maq huelec so Cristo. Qam dajo no'uen qano'ueenataxac chicqochigui da qarpi'ỹaxac. 10Ma' sahotaque quiyim sauana so Cristo quiyim ñauata'guit caỹim da lquesaxanaxa na' nachipiaqtashiguim nqohin so nelauaxa, chaqai quiyim ñouanau'a da le'xoric, vire'ta ma' shinta so'maxare queso lelauaxa. 11Ma' 'ue da ñaquitaxac quiyim sovirau'a quiyim nachipiaqtashiguim nqohin aỹim so nelauaxa.
Da 'ñaaqataxac qaiyi qaỹovira'a cá'maq naloqojnec
12Ỹim se seshit quiyim shinac quiyim sovirau'a dá'ogue dá'maq sa'xatetac, loqo'm quiyim mashic yaloochiguiñi queda ỹicyaxac. Qam ỹim shiqueta, ma' 'ue da ñaquitaxac quiyim sovirau'a dá'maq 'em quiyim iconeu'a aỹim na'le so Cristo Jesús. 13Qamiri ỹaqaỹa', ỹim mesqai shinac quiyim mashic sovira'a dajo. Qam shi'ntegueyi, quiyim scoua'e ná'ogue ná'maq mashic sqoshaa'e, ca' ña'ñaxat, sha'apiguito' sovirau'a yí'maq hueeta'gue dá'maq seloxoỹa'gue, 14qaiyi sovirau'a cá'maq naloqojnec chaqai quiyim ỹaueguec cá'maq ỹachaxantac ñi qota'a quiyim roỹaxanta'lo qomi' queda piguim quiyim seconaxaguit, ma' ña'daqatau'a so Cristo Jesús.
15Ca qomá'ogue quiyim mashic 'chichiguiñi da qarpi'ỹaxac, ca' chaqaida dá'maq qara'deenataxanaxac. Chaqai no'm sham ỹoqa'a ca ra'deenataxanaxaguii, ca' ñi qota'a ỹa'deenaxanaxanque qamiri ma'le cá'maq 'ñiita'gue. 16Qam dajo shintapega no'uen quiyim chaqaida qara'deenataxanaxac, chaqai ỹaatqajam nachiñi'chiguit da qanachaalataxac dá'maq mashic shi'gue sovirqau'a.
17Qamiri ỹaqaỹa', denaxachii da no'uen ỹicyaxac, chaqai ỹaatqajam 'ajñita ná'maq que'tegue dá'maq no'uen qoyicyaxac dá'maq sapaxaguinaxaque qamiri na'le. 18Chaqai mashic 'xoic shinqatapegalo qamiri, qam qaiyiita liỹa shinac caqamiri chaqai vire'ta quiyim niñitesañi naua ỹachi', ma' mashic 'xoic na npa'guenaxaua da lelauaxa so Cristo na' qaipateno queso npatenaxala'. 19Ca ma' ỹovita ca lqodoc, ca qaiqa'viỹa'gue na'maxare ma'le. Ma' chaqai queeta'pegue' ná'maq chi lamaanaxanqachic na loshicmaxa, chaqai nemaqajanlec ná'maq ỹo'uet quet ca layiloxo, chaqai qainaata ỹa'deentapega ná'maq hueetalec na 'laua. 20Qam qomi' qara'a' da piguim, chaqai ñauaanqataque quiyim rapil queda piguim so qarca'laxaqui, só'maq qara'gaxala' Jesucristo. 21So'maxare ỹadalaxat ma'le na qaroshicmaxa ma' tai'a quiyim ileu, qaiyi shinqata só'maq chi loshicmaxa so'maxare 'ue da lauaq. Qam ỹo'uet ma'le, ỹahote'e dá'maq chi lquesaxanaxa quiyim ỹoiquentac ná'ogue nanchaqaina.
Currently Selected:
Filipenses 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.