Filipenses 2
2
Da neneequesenaxac chaqai da lecaic so Cristo
1Ca no'm so Cristo ỹa'ñaxate' qamiri, chaqai da le'xorenataxanaxa lo'daxachiguilo naua qavilyi, chaqai so ne'Espíritu hueetauguilo qamiri, no'm 'yiiñii da no'daqainataxanaxac chaqai da nqouagaxa, 2ca 'maxaraic quiyim 'viichii ca ñitoonaxac quiyim niñiiquishiñitecta', necoñitagui da 'oonoqui' ne'xorenataxanaxa, 'oonoqui' ca ra'deenataxanaxaguii, chaqai 'oonoqui' cá'maq 'ñiitari'. 3Chaqai mesqai 'ue ca naquichitaque quiyim 'ue ca 'viichii chaqai quiyim nemaqajñii. Ta'ta'a ca ne'xoresenaxaguii, chaqai quiñi 'óna paguec gueme nqai'en ca liỹa queca'maxare. 4Chaqai qaica cá'maq chi nodaata'pegue' quet idaantaque cá'maq chi la'maxa. Ta'ta'a quiyim ỹahotaque quiyim ỹa'maxañi qai'neeta ca liỹa.
5Chaqai 'ñii'tegue dá'maq 'neeta'co' na'le da la'deenataxanaxac so Cristo Jesús. 6Ma' so'maxare 'eno'm mashic ỹantañi da no'ueenataxac ñi qota'a, qam se ipaca'pegue' quiyim 'nejem quet ñi qota'a. 7Ta'ta'a quiyim le'en illa'gue da lahi dá'maq chi no'ueenataxac, ca' neconaque quiyim 'ec ca na'ac co'na' ne'qaañi 'neetari' ca chaqai qom. 8Ca co'na' ỹantañi da no'ueenataxac na chaqai qom, ca' neneequesen. Ca quedá'maq quiyim na'xaỹaxanta, ca chi ỹovireta'a quiyim qaỹalauat, 'eno'm ỹo'uet da nayiloxo da lelauaxa na' qaipateno queso npatenaxala'. 9Ca' vichiguiño' ñi qota'a ỹaanem yí'maq paguec lecaic loma' chaqai da leenaxat paguec lecaic nqai'en quená'ogue, 10qaiyi ma' qara'xaỹaque da leenaxat so Jesús, ca ỹa'chi'iñi naua le'cootal ná'ogue na hueeto'ot na piguim, chaqai quena 'laua, chaqai na pa'aatañi quena 'laua, 11chaqai qaiyi ná'ogue ỹa'deena'a chaqai 'naac quiyim so Jesucristo ỹaatqajam na'gaxala', quiyim qaimaqachin ñi qota'olec.
Ná'maq queeta'pegue' so Cristo 'neetari' aca lcoỹerqate na qomyipi
12Ca' vichiguiño' qamiri ñauochaxaua' ỹaqaỹa', quiyim chaqaida 'ñiitari' quiyim se neme na'xaỹaxañii'ta aỹim quena' salequetauguilo qamiri, ca' nagui, ca paguec quet na'xaỹaxañii'ta aỹim mashic qoỹoqo'ta aỹim. Ca nquipichiỹa'pegue' da rca'laxahi, ca niñiiquishiñii chaqai richilliỹañi. 13Ma' ñi qota'a ñí'maq ỹaanema qamiri dá'maq no'uen viitaque chaqai ỹotauane' qamiri qaiyi shichii 'viichii, ma' chaqaida dá'maq ỹahotaque ñi'maxare.
14Ca ná'ogue 'viichii, qam qaica ca retaqatac chaqai se nco'uaita'ta', 15qaiyi qaica ca 'ue ca lasauaxaset chaqai ca 'ue ca lo'maxac caqamiri. Ta'ta'a quiyim ỹaatqajam qamiri llaalqa ñi qota'a, co'teete' qamiri quiyim lliguitaugui na qomyipi hualoxonyipi chaqai nocqaiquipi. Qam naviguerec qamiri, ca' coỹarilec na'maxare, 'ñiitari' aca huaqajñi naviguec quena' napalñi, 16quiyim 'xachim da na'qaatec chicqaugui da nca'laxa. Qaiyi ma' novi' so Cristo, ca' 'ue ca ñitoonaxac ma'le caqamiri. Sa'deentari' quiyim 'ue ca ñigui da ñamaqsoxoc chaqai da ỹo'ueenataxanaxac. 17'Eno'm 'ec saantaho da ñachaalataxac quiyim qaỹavigaxat, qaiyi qaỹalecqajnougui ca rachitaxanataxanqachii 'ỹaañitacot ñi qota'a queda rpi'ỹaxaguii, ca' 'ue da ñitoonaxac. Salecqajanto da ñitoonaxac caqamiá'ogue. 18Chaqai netooñii qai'neeta qamiri, nouañiỹau'a da ñitoonaxac.
So Timoteo chaqai so Epafrodito
19No'm chaqaiso so qara'gaxala' Jesús ỹa'maxarenta, ca' sahotaque sqaỹaloq sela' ñi Timoteo quiyim ra'ajnaxanalo qamiri, qaiyi 'ue ca ñitoonaxac ma' 'ue ca ỹa'xaỹaxac caqamiri. 20Ma' qaica quet cá'maq 'ue ca la'deenataxanaxac 'nejem aỹim, quiyim llic ỹahotaque quet ca ra'maxahi, qaiñiita. 21Ma' ná'ogue na liỹaripi idaantaque cá'maq chi la'maxa, ca' qaica quet cá'maq ỹauaaque cá'maq ỹahotaque so Cristo Jesús. 22Qam qamiri mashic 'yiiñii so Timoteo quiyim re'qoota da 'maxaraic no'ueenataxac chaqai dá'maq 'neeta quena' ñotauante'e' quena' sa'xatqatac da na'qaatec chicqaugui da nca'laxa, 'neetari' ca ñaalec quiyim ỹotauantac ca leta'a. 23Ca' sahotaque sela' quiyim ra'ajnaxanalo qamiri, ma' sa'den negue' cá'maq shintari'. 24Chaqai aỹim 'ue da ñaquitaxac queso qara'gaxala' quiyim qaỹaloq ya'ỹa'alo qamiri.
25Qam peeta'a 'maxaraic qai'neeta quiyim sela' ñi qarqaỹa Epafrodito. Ỹotaua quena' seloquiaq queda qaro'ueenataxanaxac, chaqaiñi ñí'maq nelarii na'le quiyim idaanlec aỹim quenaua ỹouenaxanaxaco. 26Ma' 'xoic da lishoxo quiyim qamiá'ogue iuañiỹaxaua', chaqai 'ue da liyaxa ma' qamiri 'ue ca ra'xaỹaxaguii na'le na' ralola. 27Qam llic ralola na'le, ca' mashic sham ileu. Qam ñi qota'a nqouaguegue na'le so'maxare. Qam mesqaiñiita ñi'maxare, ma' qai'neeta nqouaguegue aỹim, qaiyi sqai paguec ca ỹachicoxo quedá'maq shi'gue ỹachicoxo. 28Vichiguiño' paguec sahotaque selatalo qamiri ñi'maxare, qaiyi qamiri 'ue ca netoonaxaguii ma' liỹa huañiỹa ñi'maxare, chaqai qaiyi sqailligueme' da ỹachicoxo. 29Ca ỹaatqajam 'xoic ca netoonaxaguii ma' coñiguit ñi'maxare, ma' qai'neeta huelec so qara'gaxala'. Chaqai se neme quiyim rauochigue cá'maq 'nejem ñi'maxare. 30Ma' ñi'maxare mashic sham ileu ma' ro'ueenataxantacot so Cristo. Chaqai ỹaañiguit da nachaalataxac da lichic na' yotauan quedá'maq qamiri sqai shichii yotauañiigue ma' qoỹore'talo qamiri.
Currently Selected:
Filipenses 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.