Isaías 65
65
(65.1-15 Qaỹoviraxata'a so npa'guenaxairipi. Ñi qota'olec 'ue da ỹachaxantac ỹaatqajam no'uen.)
Ñi qara'gaxala' ỹachaxantac da lqouagaxa
16Ñi qara'gaxala' qota'olec 'naac:
Canchaqaica 'ue ca rashiilaxanaque quiyim qano'ueenaxat ca llicyaxac quenajo 'laua,
ca' yashiila, ỹim qamaxaraic qota'olec;
chaqai canchaqaica quenajo 'laua ỹaanec ca la'qaatec quiyim nallitalta',
ca ỹaañiỹot ca la'qaatec, ỹim qamaxaraic qota'olec.
Sauá'maq 'auaxaiqa ne'xoyaxaco mashic qaicoua'ahi,
ma' pale', tot seuanalo.
17Ñaqai 'ajñii, ỹim so'uet ma'le
ca piguim dalaxaic chaqai ca 'laua dalaxaic.
Ná'maq shi'gue qaicoua'e ma'le,
ca' qaica ca qom ỹo'leentetaque ma'le na'maxare.
18Ỹaatqajam se neme ma'le da raỹaaguii chaqai ca netoonaxaguii
quecá'maq dalaxaic so'uet,
ma' ỹim so'uet ma'le quena Jerusalén ca chalego neuagaxa,
chaqai 'xoic ca netoonaxac ná'maq qomyipi la'a' na'maxare.
19Ỹim qai'neeta 'ue da iuagaxa ma'le quena Jerusalén,
ñauata'guit da ñitoonaxac quena ỹalamaxareteripi.
Ma' quena'maxare tot qara'xaỹaque ma'le ca oỹenaxac
chaqai ca ỹaualqatac queca lachitachic.
20Ca' quiyí ma'le, ca' qaica ca ñaqai noctoqui', ca' ileu,
chaqai ca qo'xoic quiyim saqa' ỹovita ca laloqo'.
Cá'maq ileu quiyim ỹovite' caua cien ñaxari, ca ñaq ne'necoqui', ca' ileu;
chaqai cá'maq se ỹovite' caua cien ñaxari, ca' ileu, ca qaretan quiyim ỹim sa'ue ca nouaxanaxaset.
21Na qomyipi no'xonshiguim ca lauo' 'imec, ca' naugui ca'maxare,
chaqai ỹa'ue ca lanaxanqa' 'uva loma', ca' ỹa'ic ana la.
22Ca' tot qaica dá'maq quiyim 'ue ca no'xonshiguim ca lauo', ca ỹoqa'a ca naugui,
loqo'm 'ue ca danaxan, ca' ỹoqa'a cá'maq ỹa'maq.
Na ỹalamaxareteripi ỹaatqajam ladoc ma'le aca lqauaxaqui, 'ec ma'le ana qo'paq;
na ica'acseripi que'eetapigui ma'le dá'maq chi lo'ueenataxanaxac.
23Ca' 'ue ca ñigui da lo'ueenataxanaxac
chaqai sqaica ca llaalec ileu quiyim saqa' ỹovita ca laloqo',
ma' na'maxare llaalqaipi só'maq 'auaxaic qano'ueenaxat da llicyaxac quiñi qara'gaxala',
ca' chaqaida 'neeta ma'le quena llaalqaipi na'maxare.
24Ma' saqa' roỹaxanot aỹim quiyim yashiila,
qa' shi'gue sasaachiguit ma'le;
chaqai saqa' ime ca la'qaatec,
qa' mashic ña'xaỹaxana.
25So isecỹac toxonaxai chaqai so qagreta llaalec que'eeta'pe, nouanta'ta',
na sauaxaic leta'a ỹa'ic na 'uaqapi 'ec na ñii'lola,
chaqai na nanaic ỹa'ic na 'laua.
Chaqai caná'ogue ana ñaqa' ladocai Sión
qaica cá'maq que'maqachit ca liỹa.
Ñi qara'gaxala' ỹaatqajam i'taxajñi da la'qaatec.
(66.1-24 Se qanqo'ta qareualaxaitalec da qouagaxainaxac. Huaxanaxaset chaqai da nca'laqataxanaxac.)
Currently Selected:
Isaías 65: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.