Isaías 64
64
1Saxanchi' cona'gue nqai'ñi' na piguim, ca' renochirec,
ca' quiyim novichiriñi, ca i'loxol nqai'ñi' ana qa' ladocaipi,
2'nejem quena' na norec ỹavic nqai'en na 'uaqapi,
loqo'm quena' ni'ỹaamaxat na huaxaỹaq.
Ca queta'le na npa'guenaxaua'e'ipi ỹa'den queta'le da qadeenaxachi'
chaqai na ỹoreta'oguit qomyipi i'loxol queda lqolonaxa caqami'.
3Qa'uequeto' sahoqotaque quiyim 'viichi' quet ca ỹo'uet ca qarqolonaxa,
ca i'loxol nqai'ñi' ana qa' ladocai, na' novichiriñi.
4Se ỹauanapega quiyim 'ue quet ca qara'xaiguelec chaqai quiyim qaiuana quet
ca liỹa qota'olec
quiyim ỹo'uet quet dajo lqouagaxa
taỹaugui nqai'en ná'maq pi'ỹa'a ñi'maxare.
5Qami' coñichiguit ca raỹaacotalec quiyim ỹo'ueetetac ca ỹa'maqachiguiñi
chaqai se ỹa'laxate quiyim ỹo'uet dá'maq vi'saque.
Qami' 'ohisari', ma' 'ue dá'maq qarasauaxaset;
chaqai mashic shi'gom so'maqajanqatac aqami'.
6Qomá'ogue qomi' shinqatari' ca ỹale sauaqhuaic;
naua'que naua no'viiñi qaro'ueenataxanaxaco 'neesari' ca hualoq lahi napio'ota;
qomá'ogue sanataxañi 'ec qomi' aca qo'paq laue lasooxoi,
chaqai naua qaro'maxasete' se no'viiñi qaramaqate' 'ec na nonot.
7Qaica quet cá'maq ỹaanot aqami' ca lashiilaxanaxac
chaqai se na'ñaxat quiyim i'guenot aqami';
vichiguiño' nañoxochitema qomi'
chaqai quira'ahi qomi' sauaxat dá'maq se no'uen so'ueetqatac.
8Qam qami' ná'maq qami' qareta'a;
qomi' nauá'maq qomi' nishaaxa, ca' qami' ná'maq qami' no'xonaxanaq;
¡qomá'ogue qomi' ro'ueenataxahi'!
9Qami' qara'gaxala', totaxan queeta da qavilli' coqomi',
chaqai totaxan se neme o'lliinchisapigui naua qaro'maxasete'.
¡'Anta, qomi' ralamaxarichichi'!
10Na ralamaxarichi' na'aateripi ñigui co'tejlem, qaica ca qom,
na Jerusalén soochigom, qaỹopoxoỹaxateta.
11Ñi qaro'ueenaxanaxaqui 'ue quen lauaq,
yí'maq hua'ñi quena' ro'ueenaxanta'pe saua qareta'al,
soochigui nqai'en so norec.
¡Ropoqota ná'ogue ná'maq paguec qarqo'ta!
(64.12 Qainat ñi qota'olec.)
Currently Selected:
Isaías 64: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.