2 Corintios 6
6
1Ca ma' qomi' lotaua' ñi qota'a queda lo'ueenataxanaxac, ca ñi'xoresenqa'toto qamiri sqa taiguit quiyim se nquipichiỹa'pegue' da lqouagaxa ñi qota'a dá'maq mashic ỹachaxanema qamiri. 2Ma' ñi'maxare quenaua la'qaatqa naneresañi 'naac:
So na'xa'a viichigui da ỹoqouagaxa, ña'xaỹaxane'ta qami';
chaqai so na'xa'a hueetougui da nca'laxa, ca sotauan qami'.
Ca' nagui viichigui dá'maq dajo lqouagaxa ñi qota'a, chaqai chaqaina najo na'xa'a hueetougui da nca'laxa.
3Ca qaica quet cá'maq sahoqotaque quiyim 'ue quet ca 'ue ca ỹa'paxat, qaiyi qaica cá'maq se no'uen qaỹa'xat queda qaro'ueenataxanaxac. 4Ta'ta'a quiyim sahoqotaque quená'ogue ná'maq so'ueetaq re'oq nqai'ne' qomi' quiyim qomi' lelaatqa ñi qota'a, queda qareualaxavic quena' ña'ñaxatqata'piguit da qare'xoric, chaqai qarouenaxanaxa, chaqai na qananaqataxaquipi. 5Ma' mashic qaỹouaxanta'pe qomi', chaqai qaicoñite' qomi', chaqai qaỹoqocata'pe qomi', chaqai paguec da qaro'ueenataxanaxac, 'ue quen se selaqsoq, chaqai qarqopat. 6Chaqai re'oq qai'neeta nqaishinaq quiyim qomi' lelaatqa ñi qota'a quedá'maq 'maxaraic qano'ueenataxac, quiyí'maq qara'deenaxanaxa quedá'maq lliqueta, queda qareualaxavic, chaqai da qarqouagaxa, quedá'maq quiyim hueetauguilo qomi' so Espíritu Santo, chaqai dá'maq ỹaatqajam nachinchiguiñi qare'xorenataxanaxa, 7chaqai dá'maq qara'qaataxanaxac quedá'maq ỹaatqajam lliqueta na'qaatec, chaqai quedá'maq lquesaxanaxa ñi qota'a coqomi'. Chaqai so'goxonaxalo naua lo'goxonqate' dá'maq no'uen chaalataxac, quiyim squepaqataxanaxalo, loqo'm quiyim so'goxonaxalo. 8'Ue quen yi na'xa'a qaimaqachinta'pe qomi', chaqai 'ue quen yi na'xa'a se qaichira'pe qomi', chaqai 'ue quen yi na'xa'a 'maxaraic da qana'qaataxac, chaqai 'ue quen yi na'xa'a se no'uen da qohinac coqomi'. 'Ue quen 'ec qomi' 'maatqaqa nqohine', chaqai 'ue quen quiyim 'ec lliqueta nqohin dá'maq sa'xatqatac. 9'Ue quen 'ec sqai huanapogoxoua', chaqai 'ue quen 'ec ỹaatqajam qomi' neuanatqa. 'Ue quen seuqataugui da lichic quiyim 'ue ca qaralauat, qam ñaqai qomi' qarca'leetauec. 'Ue quen quiyim qaỹouaxanta'pe qomi', qam saqa' qaỹalauate' qomi'. 10'Eno'm sachicoqota, qam ñaqai qara'maqachiguiñi. 'Eno'm se'xorqata, qam 'xoic na 'ue nqaiyi nqaishinaq. 'Eno'm qaica ca yi coqomi', qam qaica cá'maq souenqataque quená'ogue.
11Qamiri ỹaqaỹarolqa ñiỹa'ñi na Corinto, quena' 'ue sa'xataq caqamiri ỹaatqajam qaica ca soxotqategueñi, ma' sa'xatqata ná'ogue ná'maq hueetagui añi qare'taxanata. 12Caqamiri ỹaatqajam qaica ca soxotqategueñi qomi', qam qamiri nauá'maq 'ue na 'xochitegueñi coqomi'. 13Ca ñi'xoresentouguilo qamiri, shintari' ca neta'a quiyim ne'xoresentougui ca llaalqaipi, quiyim 'ñii'tegue dá'maq shintari' quiyim qaica ca huaagui nqai'ñii añi re'taxanatahi, 'nejem aỹim caqamiri.
Qomi' lauo' ñi qota'a nca'leetauec
14'Neeto' rotauahi ca qom saqa' icoñiguit da na'qaatec. Ma' quiyi, ca' se natenta' qamiri. Ma' ¿negue' quet cá'maq 'neeta cá'maq 'maxaraic chaalataxac quiyim huaqata'guit ca se no'uen, chaqai ca 'ue ca lauaq huaqata'guit ca napalaxa? 15Chaqai ¿negue' cá'maq 'neeta quet quiyim neuojne'ejta' quet so Cristo queso na'ỹaapec? chaqai ¿negue' quet cá'maq 'neeta quiyim huaque'ejta' quet cá'maq saqa' icoñiguita yaua na'qaatqa quecá'maq mashic icoñiguita yaua na'qaatqa? 16¿Peeta'a ỹa'maqachiguiñi quiyim qoỹanaugui ca nashiilec nqolac ca 'imec qouagaxainaxaqui quiñi qota'a? 'E', ma' qomi' lauooto' ñi qota'a ñí'maq nca'leetauec. Ma' ñí'maq qota'a 'naac:
Sentaugui chaqai salequetaugui na'maxare;
ca' chaqaỹim ná'maq ỹim qota'olec quena'maxare,
chaqai na'maxare, ca ỹalamqateripi.
17Ca vichiguiño' qai'neeta 'naac ñi qara'gaxala':
Oquii'e, noỹoochiuec quena'maxare;
sqai coñigui ná'maq napio'xot da chaalataxac.
Ca ma'le, ca' ỹim secoñiguita qamiri,
18qaiyi ỹaatqajam ỹim qataa'i.
Chaqai qamiri, ca' qamiri ỹaalqaipi chaqai ỹaallipi,
'naac ñí'maq qara'gaxala' ñí'maq sqaica ca lqalanec.
Currently Selected:
2 Corintios 6: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.