2 Corintios 5
5
1Ma' qomi' sa'deenaq quiyim ma' imeho na qaroshicmaxa ma' 'nejem ca 'imec quiyim sqaỹaloq 'guiñi, qam ñi qota'a shi'gue ỹa'maxatetañi ca qara'a' sqaica lqodoc quena piguim, qam mese lo'ueenatec ca chaqai qom. 2Qam llic quiyim ñaq qarqauaxantegueri' najo qaroshicmaxa, se ỹa'maxagui na qouel, sahoqotaque quiyim qolaqpegue' yi qara'a' queda piguim, 3ca ỹapolgoto qomi' 'nejem ca nooỹac quena' qoỹanñi, qaiyi sqai senqatauec. 4Nagui ma' ñaqai senqataugui najo qouo' ma' chaqaina na qaroshicmaxa, ca' se ỹa'maxagui na qouel chaqai 'ue da qarachitachic. Qam se sahoqotaque quiyim qanaqat ná'maq ñaaue qaroshicmaxa. Dá'maq sahoqotaque 'neetasa': quiyim sanaxañi cá'maq dalaxaic qaroshicmaxa, qaiyi palac ná'maq qaroshicmaxa ma' ishit ileu, ca' ñigui cá'maq dalaxaic chaalataxac. 5Qam chaqaiñi ñí'maq qota'a ñí'maq ỹa'maxatesañi qomi' queda qanadalqataxac. Ca' ỹaanema qomi' so Espíritu Santo, ca' chaqaiso só'maq i'taxajñi cá'maq seconaxaguit ma'le.
6Vichiguiño' se neme da qarpe'e, ma' sa'deenqata quiyim ñaq sqauaqategueri' quena qaroshicmaxa, ca spa'aaqatauec queca qara'a', ca' se qouora so qara'gaxala'. 7Ca qolqatalec da qarpi'ỹaxac, mesqai cá'maq re'qoochigui. 8Ca' ỹaatqajam 'ue da qanaquitaxac. Ca' sahoqotaque quiyim yi le'en quiyim sqauaqategueri' quena qaroshicmaxa, qaiyi qolaqpegue' so qara'gaxala', ca' qouora. 9Vichiguiño' 'ue da qareuogoxo, qaiyi nqo'talo qomi' so qara'gaxala', quiyim ma' tot qaicaua qomi', loqo'm ñaq sqauaqategueri'. 10Ma' qomá'ogue ñachaataxau'a ma'le cá'maq hua'ñi so Cristo quiyim imit na nasauaxaseteripi, ca' quiñi 'óna icoñiguit ca laseue' ca lo'ueenatec na' ñaq ỹouootegueri', 'maxaraic, loqo'm se ỹa'maxañi.
Da na'qaatec ỹa'ue da qareuagaxa quiñi qota'a
11Vichiguiño' ma' sa'deenqata da leloxoỹaxac da nqolonaxa queso qara'gaxala', ca' 'ue da qareuogoxo quiyim qoyiuelec da na'qaatec quena qomyipi. Qam ñi qota'a shi'gue ỹa'den da shinqatari', chaqai 'ue da ñaquitaxac quiyim qamiri qai'neeta 'yiiñita da'maxare. 12Se sahoqotaque quiyim liỹa 'maxaraic ca sa'xatqatac, qam chi ña'xatqateguelta'. Ta'ta'a quiyim sahoqotaque nquipichiỹa'pegue' quiyim huaguii'chiguita qomi', qaiyi shichii quiyim 'ue ca 'xachii ma'le quená'maq chi nemaqajanteguelec da chi leloxoỹaxac ca re'qoochigui qom, qam mesqaida dá'maq hueetagui añi le'taxanata ca'maxare. 13Qam no'm 'ec qomi' hualoxona', ca chaqaida, qam quiñí'maq qota'a; chaqai no'm 'ec ñouoocqachiguiñi, ca chaqaida, qam caqamiri. 14Da le'xorenataxanaxa so Cristo ỹaatqajam qarela', ma' ỹaatqajam sa'deenqata quiyim 'oonoqui' so ileualec ná'ogue na qomyipi, vichiguiño' ná'ogue na'maxare 'ec ileu. 15So Cristo só'maq ileualec ná'ogue na qomyipi, qaiyi ná'maq nca'leetauec totqa taỹapegueu'a dá'maq chi nachaalataxac, ta'ta'a so'maxare, ma' ileualec chaqai liỹa nca'leuec nqohin. 16Vichiguiño' qomi' tot qaica quet cá'maq sa'deenqapega quecá'maq 'neetari' ca qom quena 'laua; ma' quesom sa'deenqatapega quen dá'maq 'neetari' so Cristo na' ñaq ỹouoxontac na 'laua, qam nagui tot qara'deenataxanaxac dajo queso'maxare. 17Ca' vichiguiño' cá'maq na'deetau'a so Cristo, ca' dalaxaic da no'ueenataxac; ime' cauá'maq ñaua'pe no'ueenataxaco, ca dalaxaic dá'ogue dá'maq nachaalataxac.
18Ca' dá'ogue dajo chi ỹo'uet ñi qota'a ñí'maq chicqochigui nqai'en so Cristo quiyim seuacqa'chiguit ñi'maxare, chaqai ỹa'ue da laqataxac coqomi' quiyim ná'ogue na qomyipi huaqui'chiguit nqaishinaq ñi'maxare. 19Dá'maq qara'qaatec 'neetasa': quiyim so Cristo liỹaatac ñi qota'a na' ỹahotaque qareuaqui'chiguit ñi'maxare quená'ogue na qomyipi, qam ñi'maxare se ra'iitapigui na lasauaxaset na qomyipi. Ca' ỹamaxalgoto qomi' quiyim sichoxotqachigui da leloxoỹaxac dajo na'qaatec quiyim qareuaqui'chiguit ñi qota'a. 20Vichiguiño' qomi' sachigoxotqo'tot da qara'qaataxanaxac so Cristo, ca 'ec 'nejem quiyim ñi qota'a chicqochiguilo nqai'ne' qomi' quiyim ne'xoresentouguilo qamiri. Ca qomi' ñi'xoresenqa'toto qamiri chicqochigui nqaishinaq so Cristo: quiyim daañiỹaque quiyim huaqui'chiguita qamiri ñi qota'a. 21So Cristo ỹaatqajam qaica ca lasauaxaset. Qam ñi qota'a 'ec nqai'en ca sauaqhuaic sauaxate' qomi', qaiyi ma' qomi' ña'daqatau'a so Cristo, ca sovirqau'a dá'maq no'uen chaalataxac dá'maq ỹahotaque quiyim shinqatari' quet ñi qota'a.
Currently Selected:
2 Corintios 5: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.