Éxodo 2
2
Moisespa nacesqanmanta
1Huk runan casarakuran huk warmiwan. Paykunaqa ishkayninkun Leví ayllumanta karanku. 2Chay warmin wiksayokuspa, huk qari wawata onqokuran. Chay wawa munayllaña kaqtinmi, mamitanqa pakallapi kinsa killa uywaran. 3Ichaqa manaña pakayta atispanñataqmi, totoramanta canastata ruwaspa breawan llut'iran. Hinaspan chay canastaman chay wawata churaran. Chaymantan chay canastataqa Nilo mayu patapi totorakuna ukhuman churayamuran. 4Chay wawapa hermananñataqmi karullamanta qawaran, imas chay wawawan pasanqa chayta yachananpaq.
5*Rey Faraonpa ususinmi Nilo mayuta bañakuq riran, payta serviq sipaskunapiwan. Hinaspan chay sirvientankuna mayu patapi purishanankukama, rey Faraonpa ususinqa totorakuna ukhupi huk canastata rikururan. Chaymi huknin kaq sirvientan sipasta kamachiran orqomunanpaq. 6Chay canastata kicharispanmi, rey Faraonpa ususinqa huk wawata waqayushaqta rikuran. Hinaspan khuyapayaspa khaynata niran:
—Kay wawaqa *hebreo rimayniyoq runakunapa wawanmi, nispa.
7Hinaqtinmi chay wawapa hermananqa rey Faraonpa ususinman ashuykuspa tapuran khaynata:
—¿Waqyamusaqchu huk hebreo rimayniyoq warmita, kay wawata ñuñuspa uywapusunaykipaq? nispa.
8Chaymi rey Faraonpa ususinqa contestaran khaynata:
—P'itaylla riy, nispa.
Hinaqtinmi chay wawapa hermananqa rispa, chay wawapa mamitanta waqyamuran. 9Hinaqtinmi rey Faraonpa ususinqa chay warmita niran:
—Kay wawata apaspayki uywanpuway. Noqa kikiymi pagapusqayki uywasqaykimantaqa, nispa.
Chaymi chay wawapa mamanqa chay wawata apaspa uywapakuran. 10Chay wawa hatunchaña kaqtintaqmi, mamanqa apanpuran rey Faraonpa ususinman. Hinaqtinmi payqa wawata adoptaspa, sutinta churaran Moisés sutiwan: “Unumantan orqorani”, nispa. [Nota: Moisés sutiqa “orqosqa” ninantan nin.]
Moisés ishkapakusqanmanta
11Moisesqa jovenña kashaspanmi, llaqtamasinkunata qawaq lloqsiran. Hinaspan rikuran llaqtamasin runakunaqa nishu sasa llank'aykunapi llank'asqankuta. Hinaspapas Moisesqa rikullarantaqmi llaqtamasin *hebreo runata huk Egipto *nacionniyoq runa maqashaqta. 12Chaymi Moisesqa kay lawta waq lawta qawakacharikuspa, mana pitapas rikuranchu. Hinaspan chay Egipto nacionmanta runata wañurpachispa, aqo-aqopi p'amparpariran. 13Paqarisnintin p'unchawtañataqmi Moisesqa lloqsispa, rikullarantaq ishkay hebreo rimayniyoq runakuna paykunapura peleashaqta. Chaymi chay maqaq runata niran:
—¿Imanaqtintaq qanri llaqtamasiyki runatari maqashankí? nispa.
14Chaymi chay runaqa contestaran khaynata:
—¿Pitaq qantari churarusuranki, juez hina kaspa gobiernawanaykikupaqrí? ¿Noqatapas Egipto nacionniyoq runata hinachu wañurachiwayta piensashankí? nispa.
Chaymi Moisesqa mancharikuspa piensaran khaynata: “Egipto nacionniyoq runata wañuchisqaytaqa, ñan yacharunkuña”, nispa.
15*Rey Faraonqa yacharuranmi Egipto nacionniyoq runata Moisés wañurachisqanta. Chaymi Moisestaqa wañurachiytapuni munaran. Ichaqa Moisesqa rey Faraonpa kasqanmantan ishkapakuran Madián nisqa nacionman, chaypi tiyananpaq.
Hinaspan chay lugarman chayaruspa, unu pozopa ladonpi samariran. 16Hinaqtinmi Madián nacionniyoq sacerdotepa qanchisnintin ususinkuna chay pozoman hamuranku, chay pozomanta unata orqospa, animalkunapa tomanan bateakunaman unuta orqonankupaq, saynapi papankupa ovejankunaman unuta tomachinankupaq. 17Ichaqa chaypi michiqkunan chay pozoman hamuranku. Hinaspan chay sipaskunataqa qarqorparanku chay unu pozopa ladonmanta. Chaymi Moisesqa sayarispa, chay sipaskunata defenderan. Hinaspan ovejakunamanpas unuta tomachiran.
18Chaymi papanku *Reuel sutiyoq runapa kasqanman kutiqtinku, papankuqa tapuran khaynata:
—¿Imanaqtintaq qankunari ratolla kutiramunkichís? nispa.
19Paykunataqmi contestaranku khaynata:
—Egipto nacionmanta huk runan defendeykuwaranku michiq runakunamanta. Saynallataqmi unu orqoytapas yanaparuwaspanku, ovejanchiskunamanpas unuta tomarachin, nispa.
20Chaymi Reuel sutiyoq runaqa ususinkunata tapuran khaynata:
—¿Maypitaq kunan kashan chay runarí? ¿Imanaqtintaq qankunari saqeramurankichís? Mikhunata mikhunanpaq waqyamuychis, nispa.
21Saynapin Moisesqa Reuel sutiyoq runapa wasinpi qepakunanpaq decidekuran. Chaymantan Reuel runaqa Séfora sutiyoq ususinwan Moisestaqa casarachiran. 22Chaymi Séfora warmiqa huk qari wawata onqokuran. Chay wawamanmi Moisesqa sutinta churaran Gersón sutiwan, khaynata piensaspa: “Karu llaqtayoq forastero runan kani kay llaqtapiqa”, nispa. [Nota: Hebreo rimaypi “Gersón” sutiqa “forastero runa” ninantan nin.]
23Moisesqa unay watakunan Madián nacionpi qepakuran. Hinaspan chay watakunapi Egipto nacionpi reyqa wañuranña. Ichaqa Israelpa miraynin runakunaqa nishutan llank'aranku *esclavo kasqankurayku. Chaymi waqaspanku Señor Diosta mañakuranku paykunata yanapananpaq. 24Diosqa chay mañakusqankuta uyarispan, yuyariran Abrahamman, Isaacman hinallataq Jacobmanwan ima prometesqanmanta. 25Chaymi Diosqa Israelpa miraynin runakunata qawarispa, paykunamanta llakikuran. Hinaspan paykunata yanapayta munaran.
Currently Selected:
Éxodo 2: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional