Éxodo 3
3
Moisesta Señor Dios waqyasqanmanta
1Moisesqa suegron Jetropa ovejankunatan michiran. Jetroqa Madián lawpi sacerdoten karan. Huk p'unchawmi Moisesqa ch'inñeq lugarninta ovejakunata michiq qatiran. Hinaspan Horeb nisqa lugarkama chayaran. Chay lugarqa sutichasqa karan Diospa orqonwanmi.
2Chay lugarpin Moisesmanqa Señor Diospa angelnin, nina rawrashaq t'ankar kishka ukhupi rikhuriykuran. Hinaspan Moisesqa qawarispa rikuran t'ankarpi nina rawrashaqta. Ichaqa chay rawrashaq ninaqa mana tukukuqtan rawraran. 3Hinaqtinmi Moisesqa piensaspa niran: “¡Admirakuypaqmá kayqa! ¿Imanaqtintaq ninari waq t'ankar kishkatari mana ruphanchú? Rispayá qawaramusaq yachanaypaq”, nispa.
4Hinaspan Moisesqa chay rawrashaq ninata qawamunanpaq ashuykuran. Chayta rikuspan Señor Diosqa t'ankar kishka ukhumanta khaynata nimuran:
—¡Moisés! ¡Moisés! nispa.
Hinaqtinmi Moisesqa contestaran:
—Kaypin kashani, nispa.
5Chaymi Diosqa niran:
—Ama ashuyamuychu. Chay sarusqayki allpaqa santo lugarmi. Chayrayku husut'aykita orqokuy. 6Noqan papaykipa Diosninqa kani hinallataq Abrahampa, Isaacpa, Jacobpa Diosnin ima, nispa.
Hinaqtinmi Moisesqa uyanta tapakuran, Diosta qawariyta manchakuspa. 7Hinaqtinmi Señor Diosqa nillarantaq khaynata:
—Cheqaqtapunin noqaqa rikuni akllakusqay Israelpa miraynin runakuna Egipto *nacionpi ñak'arisqanta. Hinaspapas uyarillanitaqmi capatazkuna ñak'arichiqtin, quejakuspanku waqyakamuwasqankutapas. Chay ñak'arisqankutan noqaqa allintapuni yachani. 8Chaymi noqaqa hanaq pachamanta urayamuni, paykunata Egipto nacionpi esclavo kasqankumanta libranaypaq. Hinaspan noqaqa paykunata orqospa huk hatunkaray sumaq allpaman pusasaq. Chay allpapiqa lechepas hinallataq mielpas anchallatañan abundan. Chay allpaqa cananeo runakunapa, heteo runakunapa, amorreo runakunapa, fereseo runakunapa, heveo runakunapa hinallataq jebuseo runakuna tiyasqan allpan. 9Noqaqa uyarinin Israelpa miraynin runakunapa waqyakamuwasqanta. Hinaspapas rikullanitaqmi Egipto nacionniyoq runakuna anchatapuni ñak'arichisqantapas. 10Saynaqa alistakuyyá. Kunanmi rey Faraonpa kasqanman mandasqayki, Israelpa miraynin runakunata chay Egipto nacionmanta orqomunaykipaq, nispa.
11Ichaqa Moisestaqmi Señor Diosta khaynata niran:
—¿Pitaq noqari kani, rey Faraonman presentakuspa, Israelpa miraynin runakunata chay Egipto nacionmanta orqomunaypaqrí? nispa.
12Chaymi Diosqa Moisesta niran:
—Noqaqa qanwanmi kasaq. Hinaspapas noqa kikiypuni mandasqayta yachanaykipaqmi huk señalta qosqayki. Chay señalmi kay kanqa: Israelpa miraynin runakunata Egipto nacionmanta orqoramuqtiykin, qankunaqa llapallaykichis kay orqopi yupaychawankichis, nispa.
13Hinaqtinmi Moisesqa Diosta khaynata niran:
—Sichus Israelpa miraynin runakunapa kasqanman rispa khaynata nisaq: “Ñawpaq abueloykichiskunapa Diosninmi qankunaman hamunaypaq kachamuwashan”, nispa niqtiyqa, paykunaqa tapuwanqakuchá: “¿Imataq chay Diospa sutinrí?” nispa. Chayri, ¿ima nispataq paykunatari contestasaq? nispa.
14Hinaqtinmi Diosqa Moisesta niran:
—NOQAQA HINA KAQLLAN KANI. Saynaqa Israelpa miraynin runakunatayá khaynata nimuy: “NOQAN KANI” sutiyoqmi qankunaman kachamuwashan, nispa.
15Hinaspapas Diosqa Moisestaqa nillarantaqmi:
—Kay nisqayman hinayá Israelpa miraynin runakunataqa ninki: “Ñawpaq abueloykichis Abrahampa, Isaacpa, Jacobpa Diosninmi qankunaman kachamuwashan. Payqa Señor Diosmi”, nispa. Kaymi sutiyqa wiña-wiñaypaq. Kay sutiywanmi qankunaqa yuyariwankichis wiña-wiñaypaq. 16Rispaykiyá Israelpa miraynin runakunamanta líder kaq runakunata huñumuy. Hinaspa paykunata khaynata nimuy: “Ñawpaq abueloykichis Abrahampa, Isaacpa hinallataq Jacobpa Diosninmi rikhuriykuwaran. Hinaspan khaynata niwaran: ‘Noqaqa manan ni hayk'aqpas Israelpa miraynin runakunataqa qonqaranichu. Hinaspapas noqaqa rikunin, Egipto nacionniyoq runakuna Israelpa miraynin runakunata anchatapuni ñak'arichisqanta. 17Chayraykun noqaqa decidiniña, Egipto nacionpi ñak'arisqankumanta orqonaypaq. Hinaspan noqaqa qankunata huk sumaq allpaman pusasqaykichis. Chay allpaqa cananeo runakunapa, heteo runakunapa, amorreo runakunapa, fereseo runakunapa, heveo runakunapa hinallataq jebuseo runakunapa tiyasqan allpan. Hinaspapas chay allpapiqa lechepas hinallataq mielpas anchallatañan abundan’, nispa”. 18Noqapa nisqayman hinan Israelpa miraynin liderkunaqa uyarispa kasusunki. Hinaspan qanqa chay liderkunapiwan kushka rispa, Egipto nacionpi rey Faraonman presentakunkichis. Hinaspan khaynata ninkichis: “Noqayku *hebreo rimayniyoq runakunapa Diosniykun rikhuriykuwanku. Chayraykun kunan ruegakuykiku, ch'inñeq desierto lugarman kinsa p'unchaw puriyta rinaykupaq, hinaspa chaypi sacrificio ofrendata Señor Diosman ofrecemunaykupaq”, nispa. 19Noqaqa yachanin Egipto nacionpi reyqa mana kacharisunaykichista. Ichaqa anchata castigaqtiyñan payqa kacharisunkichis. 20Noqaqa atiyniywanmi Egipto nacionniyoq runakunataqa tukuy clase castigowan castigasaq. Saynata castigaruqtiyñan rey Faraonqa ripunaykichispaq kacharisunkichis. 21Ichaqa noqan Egipto nacionniyoq runakunapa sonqonta llamp'uyachisaq allinta tratasunaykichispaq. Saynapin qankunaqa chay Egipto nacionmantaqa mana hinallachu ripunkichis. Aswanqa tukuy ima regalokunantinmi ripunkichis. 22Sapankama Israelpa miraynin warmikunayá Egipto nacionniyoq vecinankupa wasinkuman richunku. Hinaspa chay vecinankumanta hinallataq wasinpi tiyaq warmikunamantapas mañakamuchunku kaykunata: Qolqemanta alhajakunata, qorimanta alhajakunata hinallataq p'achakunatawan ima, chay p'achakunawan qari wawaykichista hinallataq warmi wawaykichistapas p'achachinaykichispaq. Saynapin Egipto nacionniyoq runakunaqa manaña imayoq qepanqaku, qankuna valorniyoq cosasninkuta apayukuspa ripusqaykichisrayku, nispa.
Currently Selected:
Éxodo 3: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional