LEVITIKAS 27
27
Pathian Sinah Pekchanhnak Kong Phunglam Hna
1 Bawipa nih Moses cu a chawnh i, 2“Israel mi cu hi bangin va chim hna. Mipa pakhatkhat cu a hleikhun in Bawipa sinah tuahmi biakamnak ruangah Bawipa sinah pek a si ahcun, 3na tuakning man in cu pa cu luatter a si lai: kum kul in sawm ruk tiangah ngun shekel sawm nga, biakinn shekel in thlaimi a si lai. 4Cun mi cu nu a si ahcun a man i na tuakmi cu shekel sawm thum a si lai. 5Cun kum nga in kum kul tiangah pa a si ahcun a man na tuakmi cu shekel kul a si lai i nu a si ahcun shekel pahra a si lai. 6Cun thla khat in kum nga tiangah, a man na tuakning cu pa caah ngun shekel panga, cun a man na tuakning cu nu caah shekel pathum a si lai. 7Cun kum sawm ruk in a cunglei a si ahcun, a man na tuakning cu pa caah shekel hleinga a si lai i nu caah shekel pahra a si lai. 8Cun a man na tuakmi cu pakhatkhat nih a si a fah tuk caah a pek khawh lo ahcun, a minung cu tlangbawi hmaiah a chuahpi lai i tlangbawi nih cun a man cu a tuak lai; biakamnak a sertu nih a ti khawhning khan in tlangbawi nih a man cu a tuak lai.
9“Cu bantuk pekchanhnak caah Bawipa sin i mi nih an pekchanhmi cu saram a si ahcun, mi zeihmanh nih Bawipa sinah an pekmi cu a thiangmi a si. 10Zeihmanh a airawl ah a hmang lai lo, a thlen zong a thleng lai lo, a ṭha cu a chia ah, a chia cu a ṭha ah an thleng lai lo; cun saram cu saram in a thlen ahcun, a thlennak le a thlenmi cu an pahnih in a thiangmi thil ah an cang lai. 11Cun a thiang lomi saram, Bawipa sinah thawinak ca i pekchanh tawn lomi a si ahcun, mipa nih cun saram cu tlangbawi hmaiah a rak put lai i 12tlangbawi nih a ṭha ah maw a chia ah dik a rak tuak lai; tlangbawi nih a tuakning in, cu bang cun a si lai. 13Sihmanhsehlaw tlanh a duh ahcun a man tuakmi cungah cheu nga cheu khat a chap lai.
14“Mi pakhatkhat nih a inn cu Bawipa ca i thian awkah a pekchanh ahcun, tlangbawi nih a ṭha ah maw a chia ah dik a tuak lai; tlangbawi nih a tuakning in, cu bang cun a si lai. 15Cun a pechantu nih a inn cu tlanh a duh ahcun, a man tuakmi cungah tangka in cheu nga cheu khat a chonh lai i amah ta a si lai.
16“Mi pakhatkhat nih roconak in amah ta a simi ram a cheubang cu Bawipa sinah a pekchanh ahcun, a man na tuakning cu a chung i thlaici tuhmi zat ning in a si lai; barli#27.16 — barli — changvut bantuk rawl phunkhat a si; homer#27.16 — homer — nuphor hra tluk pakhat tuhnak cu ngun shekel sawm nga ah tuak a si lai. 17Jubili kum in a pekchanhnak cu a si ahcun, nangmah nih a man na tuakning bantuk cun a hmun lai; 18sihmanhsehlaw a lo cu jubili hnuah pekchanh a si ahcun, tangka in a man cu, jubili kum ṭhan hlantiang a tangmi kum zat ning in tlangbawi nih a tuak lai i nangmah nih a man na tuakmi chungin ṭhumhnak a um te lai. 19Cun a pechantu nih a lo cu tlanh a duh ahcun, a man tuakmi cheu nga cheu khat cu tangka in a man ah cun a chonh lai i amah ta in a hmun lai. 20Sihmanhsehlaw lo cu tlanh a duh lo ah siseh, lo cu midang sin i a zuar cang ah siseh, tlanh a si ti lai lo; 21sihmanhsehlaw mah lo cu jubili i luatter a si tikah Bawipa caah a thiangmi ah, ulh-amh awk i sermi lo bantuk ah a cang lai; tlangbawi ta ah a si lai. 22Roconak in a comi si loin a cawk in a cawkmi lo kha Bawipa sinah a pekchanh ahcun, 23tlangbawi nih a man cu jubili kum tiangah zeizat dah a si ti kha a tuak lai i a tuakmi zat ning cun cu pa nih cun Bawipa ca i a thiangmi thil ah, cu ni ah cun a pek lai. 24Jubili kum ah cun a cawknak pa, roconak in a rak cotupa sinah khan, lo cu a kir ṭhan lai. 25Man tuaknak paohpaoh cu biaknak inn shekel ning in a si lai: shekel pakhat ah gerah pakul a si lai.
26“Sihmanhsehlaw later fa paohpaoh cu, Bawipa ta an si caah, ahohmanh nih an pekchanh awk a si lo; cawtum siseh, tuu siseh, Bawipa ta a si. 27Cun a thiang lomi saram a si ahcun, nangmah nih a man na tuak ning in a cawk ṭhan lai i cheu nga cheu khat a chap lai; a tlanh lo ahcun a man tuakning ah zuar a si lai.
28“Sihmanhsehlaw ulh-amhmi thil, Bawipa sinah mi pakhatkhat nih a pekchanhmi paohpaoh cu, a ngeihmi chungin zeihmanh siseh, minung a si ah, saram a si ah, ro i a comi a lo a si ah, zuarh awk zong a si lai lo i tlanh awk zong a si lai lo; ulh-amhmi thil paohpaoh cu Bawipa caah a thiang bik a si. #Nam 18.14 29Ulh amhmi minung cu ahohmanh a si ah, mi sinin hrawh cikcek hngami paohpaoh cu tlanh a si lai lo; thah a si ko lai.
30“Ram chung thil, cheu hra cheu khat vialte cu, ram chung i thlakmi thlaici a si ah, thingkung hna theitlai a si ah, Bawipa ta a si; Bawipa ca i a thiangmi a si. #Nam 18.21; Deu 14.22-29 31Ahohmanh nih a cheu hra cheu khat azeihmanh kha tlanh a duh ahcun cheu nga cheu khat a bet lai. 32Cun tuurun chungin siseh, cawrun chungin siseh, cheu hra cheu khat paohpaoh cu, saṭil khaltu ṭhiangṭhunh toi i a lanmi saṭil a pahranak paohpaoh cu, Bawipa ca i a thiangmi an si lai. 33Ahohmanh nih a ṭhat a chiat kha a dothlat lai lo; a thlen zong a thleng lai lo; a thlen a si ahcun a thlennak le a thlenmi kha an pahnih in a thiangmi ah an cang lai; tlanh khawh a si lai lo,” tiah a ti.
34Mah hihi Sinai Tlang ah Bawipa nih Israel mi hna caah Moses a pekmi nawlbia cu an si.
Currently Selected:
LEVITIKAS 27: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006