LEVITIKAS 26
26
Pathian Nawlngaih Thluachuahnak
(Deu 7.12-24; 28.1-14)
1“Nannih nih an hmai i kun awkah, siasal nan i ser lai lo i ṭialmi milem siseh, tung siseh, nan bunh lai lo, cun nan ram chungah suaimi lung nan phun lai lo; zeicahtiah keimah cu Bawipa nan Pathian ka si. #Exo 20.4; Lev 19.4; Deu 5.8; 16.21-22; 27.1 2Ka sabbath cu nan ulh hna lai i ka hmunthiang cu nan upat lai: keimah cu Bawipa ka si.
3“Ka phunglam kha nan zulh hna i ka nawlbia kha nan ulh hna i nan tuah hna ahcun, #Deu 11.13-15; 28.1-14 4nan ruahpi cu an caan te ah kan pek hna lai i ram nih hin tirawl an chuahpiak hna lai i nan lo chung thing hna nih thei an tlai lai. 5Nan facil nih cun mitsur lawh caan cu a hei phak lai i mitsur lawh caan nih cun thlaici thlak caan a phak lai; nan rawl cu khim tein nan ei lai i nan ram chungah him tein khua nan sa lai. 6Cun ram chungah daihnak ka chiah lai i nan it lai i ahohmanh nih nan thin an in phanter hna lai lo; cun ram chungin sahrang ṭhalo kha ka ṭhial hna lai i vainam kha nan ram chungah aa chawk lai lo. 7Nan ral kha nan dawi hna lai i nan hmaiah vainam in an tlu lai. 8Nannih lak i panga nih za khat nan dawi hna lai i nannih lak i za khat nih thong hra nan dawi hna lai; nan ral hna cu nan hmaiah vainam in an tlu lai. 9Cun nannih cu hmaizahnak kan pek hna lai i kan punzamter hna lai i kan karhsoter hna lai i, nannih he ka biakamnak kha ka fehter lai. 10Cun saupi chiahmi rawl hlun khonmi kha nan ei lai i a thar chiahnak caah a lawnnak a um nakhnga a hlun cu nan chuah hna lai. 11Cun ka umnak cu nanmah lakah ka ser lai i ka nunnak nih an hua hna lai lo. 12Nan sinah kaa chawk lai i kei cu nan Pathian ka si lai i nannih cu ka mi nan si lai. #2Kor 6.16 13Keimah cu Bawipa nan Pathian, Izipt ram in an sal nan si nakhnga lo an chuahpitu hna ka si; keimah nih nan seihnam hngawng kual cu ka khiah cang i dingte i dir in kan kalter hna.
Nawlngaih Lonak Theitlai
(Deu 28.15-68)
14“Sihmanhsehlaw ka bia nan ngaih lo i hi nawlbia vialte hi nan tuah hna lo i 15ka phungbia kha zei i nan rel hna lo i nan nunnak nih ka phunglam kha a huat i cucaah ka nawlbia tuah duh loin ka biakamnak lehlam kha nan hrawh ahcun, 16kei zong nih mah hihi nan cungah ka tuah ve lai: Nan cungah khulrang ṭihnung, tlumralnak le, mit a hrawktu le nunnak a zorter thluahmahtu ngornak ka tlunter lai. Cun nan thlaici thlakmi cu pakpalawng a si ko lai, zeitintiah nan ral hna nih an ei lai; 17ka hmai kan chiathnawh hna lai i nan ral nih an in tei hna lai; an huami nih an in uk hna lai i ahohmanh nih an in dawi hna lo zongah nan zam lai. 18Cun mah hi ti, ti zong i ka bia nan ngaih ṭhiamṭhiam lo ahcun nan sualnak ruangah a let sarih in kan chimhhrin rih hna lai i, 19nan ṭhawnnak nan i porhlawtnak kha ka hrawh lai i nan van hna cu thir bantuk ah ka ser hna lai i nan vawlei cu dar bantuk ah ka ser lai; 20cun nan thazang cu pakpalawng ah nan hman lai, zeitintiah nan ram nih tirawl a chuah lai lo i nan ram chung thingkung hna nih thei an tlai lai lo.
21“Cun keimah ralchanh in nan kal i ka bia nan ngaih lo ahcun, nan cung ah hremnak, nan sualnak nakin a let sarih tam in ka tlunter lai. 22Nannih lak i sahrang cu ka thlah hna lai i nan fale kha an in sehpiak hna lai, nan saṭil kha an in hrawhpiak hna lai i an in tlawmter hna lai, cu caah nan lam hna cu an ṭhing dih lai.
23“Cun hi chimhhrinnak thawng zongin keimah leiah nan i mer hlei lo i keimah ralchanh in nan kal ko ahcun, 24keimah zong nannih ralchanh in ka kal ve lai i keimah hrimhrim nih nan sualnak ruangah a let sarih in kan tuk hna lai. 25Cun nannih cungah vainam ka tlunter lai i biakamnak caah khan phuhlamnak a tuah lai; nan khua chungah nan i pumh ahcun nan lakah rai ka tlunter lai i nan ral hna kut ah khan nanmah cu pek nan si lai. 26Cun nan i rinhcanhmi rawl kha ka chah tikah nu pahra nih changreu rawhnak pakhat ah nan changreu cu nan rawh lai i nan changreu cu a khing thlai tein pek ṭhan nan si lai; cun nan ei lai i nan i khimh lai lo.
27“Cun mah hi ti, ti hmanh zong i ka bia nan ngaih hlei lo i keimah ralchanh in nan kal ko ahcun, 28keimah zong thinhun in nanmah ralchanh in ka kal ve lai i keimah hrimhrim nih nan sualnak caah khan a let sarih in kan chimhhrin hna lai. 29Nan fapale sa kha nan ei lai i nan fanule sa kha nan ei lai. 30Nan khuahrum bo cu ka hrawh hna lai i nan zihmui biakṭheng cu ka hau dih hna lai i nan ruak cu nan siasal hna ruak cungah ka hlonh hna lai i ka nunnak nih an huat hna lai. 31Nan khua cu ka ṭiaoter hna lai i nan hmunthiang cu ka ṭhinter hna lai i nan rimthaw cu ka hnim hna lai lo. 32Ram cu ka hrawh cikcek lai i cu caah nan ral hna cu a chung i an um tikah an khuaruah a har lai. 33Miphun hna lakah kan ṭhek hna lai i nan hnu in vainam kan zuhhnawh hna lai i nan ram cu a ṭhing lai i nan khua cu an ṭiao lai.
34“Cun ram nih cun nan ral hna ram i nan um chung, a ṭhin chung vialte cu a sabbath hna kha a rak i lawmhpi lai; ram cu aa din lai i a sabbath hna cu aa lawmhpi lai. 35A ṭhin chung vialte cu aa din ko lai; a chungah nan um lio i nan sabbath kum hna ah ram nih a hmuh lomi dinhnak cu a hmuh lai. 36Nannih lak i a tangmi hna tu cu, an ral hna ram chungah an lung chungah lungdernak ka umter lai; hnahchawl aa hninmi thawng nih a zamter hna lai i vainam lak i zam bantukin an zam lai i ahohmanh i dawi lo ah an thi lai. 37Ahohmanh i dawi ṭung lo ah vainam he dawi bantukin pakhat le pakhat an i rilhhnawh lai i nan ral hna hmai i dir awkah ṭhawnnak nan ngei lai lo. 38Cun miphun hna lakah nan loral lai i nan ral hna ram nih khan an ei dih hna lai. 39Cun nannih lakin a tangmi hna cu nan ral hna ram chungah, an ṭhat lo ruangah an loral chin lengmang lai; cun an pupa hna ṭhat lo ruang zongah, anmah bantukin an loral lai.
40“Sihmanhsehlaw keimah cung i rawinak an tuahnak le keimah ralchanh in an kalnak chung i an tuahmi ṭhat lonak le an pupa hna ṭhat lonak, 41cu ruang i anmah ralchanh in ka kal i an ral hna ram chung i ka luhpinak hna cu an i phuan i cuarpar tan lo an lung cu a nem i an ṭhat lonak kha an i remh ahcun; 42cu tikah cun Jakob sin i ka biakam kha ka hngalh ṭhan lai, Isak sin i ka biakam le Abraham sin i ka biakam kha ka hngalh ṭhan lai i ram kha ka hngalh ṭhan lai. #Gen 17.7-8; 26.3-4; 28.13-14 43Sihmanhsehlaw ram cu an kaltak lai i anmah um loin a ṭhin lioah a sabbath hna cu aa lawmhpi lai; cun ka phunglam kha zei ah an rel lo i an nunnak nih ka nawlbia kha an huat caah an ṭhat lonak dantatnak cu an co lai. 44Asinain cu vialte ruang hmanh ah cun, an ral hna ram chung i an um tikah, ka hlaw hna lai lo, annih kha hrawh cikcek i annih he ka biakam kha hrawh tiangin ka hua fawn hna lai lo; zeitintiah keimah cu Bawipa an Pathian ka si. 45Sihmanhsehlaw anmah zawnruah ah, an Pathian ka si nakhnga, miphun hna hmuh i Izipt ram in ka chuahpimi an pupa hna he ka biakam kha ka hngalh ṭhan lai: keimah cu Bawipa ka si,” tiah a ti.
46Mah hihi Bawipa nih amah le Israel mi hna karlak ah Sinai Tlang cungah Moses thawngin nawlbia hna le phunglam hna le phungbia hna a sermi cu an si.
Currently Selected:
LEVITIKAS 26: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006