JONAH 3
3
Jonah Cu Nineveh Khua Ah A Kal
1 Bawipa bia cu Jonah sinah a voi hnihnak a phan ṭhan i, 2“Nineveh khualipi ah cun va kal cang law kan chimhmi bia cu va thanh tuah hna,” tiah a ti. 3Cucaah Jonah cu aa tim i Bawipa nih a chimh bangin Nineveh khua ah cun a kal. Nineveh cu khua ngan tuk hringhran a si caah a chung cu ni thum lamkal a si. 4Jonah cu khuapi chungah cun a va lut i ni khat a kal hnuah khin, “Hi hnu ni sawm li chungah Nineveh hi a rawk lai!” tiah a au. #Mat 12.41; Luk 11.32 5Nineveh khuami nih cun Pathian bia cu an zumh. Zapi rawl ulhnak kan tuah lai i a hme bik in a ngan bik tiang, a mi kip nih buri kan i hruk lai, an ti. 6Cu thawng cu Nineveh khua siangpahrang nih a rak theih tikah a bawiṭhutdan cung khan a tho i a siangpahrang puan kha aa phoih i buri kha aa aih i vutcam lakah a ṭhu. 7Cun Nineveh khua chungah khan thawngthanhnak a tuah i, “Mah hihi siangpahrang le a bawi hna nih an chuahmi nawlbia a si: Ahohmanh nih zeihmanh nan ei lai lo; minung nih siseh, saṭil nih siseh, cawrun nih siseh, tuurun nih siseh, rawl nan ei lai lo, ram nan ṭam lai lo, ti nan ding lai lo. 8Nan dihlak in buri nan i aih lai i Pathian sinah biatak tein thla nan cam cio lai. Cun nan ziaza ṭhalo kha nan hlawt hna lai i zaang-ennak nan tuah lengmangmi kha nan hlawt hna lai. 9Pathian cu aa ngaihchih ko hnga dahkaw, a thin kha a dam ko hnga dahkaw; cu ti a si ahcun kannih cu thi loin kan um ko hnga,” a ti. 10Pathian nih an tuahmi kha a hmuh i an ziaza ṭhalo an hlawt kha a hmuh tikah aa ngaihchih i an cungah ka tlunter lai a timi ṭhat lonak kha a tlunter ṭhan lo.
Currently Selected:
JONAH 3: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006