ESTHER 9
9
Judah Mi Nih An Ral Kha An Hrawh Hna
1Cun thla hleihnihnak thla, Adar thla, a ni hleithum ni, siangpahrang nawl pekmi le biakhiahmi tuah awk a simi, Judah mi hna cu an ral pawl nih kan uk hna lai ti i an i ruahchan ni, sihmanhsehlaw Judah mi tu nih anmah a dohtu hna kha an uk hna ni i aa thleng ṭhanmi ni ah cun, 2Judah mi hna cu Siangpahrang Ahasuerus peng dihlak chung i an khua cio ah khan, anmah harnak pek a timtu hna kha tlaih awkah an i pum. Ahohmanh nih an derh kho hna lo, zeicahtiah mi hna cungah khan anmah ṭihnak cu a tlung. 3Peng uktu bawi hna le siangpahrang kut tang bawi hna le ram uktu bawi hna le siangpahrang rianṭuantu bawi hna zong nih khan Judah mi cu an bawmh hna, zeicahtiah Mordekai kha an ṭih. 4Mordekai cu siangpahrang inn chungah khan mingan a si i peng dihlak ah khan a min cu a thang chin lengmang i Mordekai cu nawl a ngei chin lengmang. 5Cucaah Judah mi nih an ral hna cu vainam in an tuk, an thah, an hrawh hna i anmah a huatu hna kha an duhduh in an tuah hna. 6Susa khuapi chung hrimhrim ah khan Judah mi nih za nga an thah hna i an hrawh hna, 7cun Parsandatha le Dalfon le Aspatha le 8Poratha le Adalia le Aridatha le 9Parmashta le Arisai le Aridai le Vaizatha zong kha an thah hna, 10annih cu Hammedatha fapa Haman, Judah mi hna ral i a fapa pahra kha an si; sihmanhsehlaw a ramh cu ahohmanh an ramh hna lo.
11Susa khuapi chungah cun zeizat dah an thah hna ti kha cu ni hrimhrim ah cun siangpahrang sinah khan an thanh. 12Cun siangpahrang nih Siangpahrangnu Esther cu a thawh i, “Susa khuapi chungah Judah mi nih mi za nga an thah hna i Haman fapa pahra zong kha an i tel. A si ahcun, siangpahrang i a peng a dang hna ah khan zeitindik an hei tuah hnga. Atu cu zeidah na ka nawlmi a si rih? Pek na si lai. Zeidah hal na ka duhmi a si rih? Tlinter a si lai,” tiah a ti. 13Cun Esther nih a thawh i, “Siangpahrang na duhnak a si ahcun, Susa khua chung i a ummi Judah mi hna hi nihin nawl pekmi bantuk hin thaizing zong tuah onh si rih hna seh. Cun Haman fapa pahra hna hi thlainak ah thlai si hna seh,” tiah a ti. 14Cucaah mah cucu tuah awkah siangpahrang nih nawlbia a ser i Susa khua chungah cun biakhiahnak a chuah i Haman fapa pahra hna cu an thlai hna. 15Susa khua i a ummi Judah mi hna cu Adar thla a ni hleili ni zongah khan an i pum i Susa khua chungah khan mi za thum an thah hna; sihmanhsehlaw a ramh cu an ramh hna lo.
Purim Puai
16Siangpahrang peng chung i a ummi Judah mi a dang hna zong kha an nunnak i runven awkah an i pum i an ral hna sin khan himnak an hmu i anmah a huatu hna kha sang sarih le thong nga an thah hna; sihmanhsehlaw a ramh cu ahohmanh an ramh hna lo. 17Mah cucu Adar thla ni hleithum ni ah khan a si i a ni hleili ni ah cun an i din i cu ni cu puai ni le lunglawmhnak ni ah an ser. 18Sihmanhsehlaw Susa khua chung i a ummi Judah mi hna cu ni hleithum ni le ni hleili ni ah an i pum i ni hleinga ni ah an i din, cu ni cu puai ni le lunglawmhnak ni ah an ser. 19Cucaah khuate i a ummi, kulhnak a ngei lomi khua i a ummi Judah mi hna nih cun Adar thla ni hleili ni cu lunglawmhnak le puai le dinh ni ah an ser i cu ni cu pakhat le pakhat kha laksawng a ṭhaṭha i kuatnak ah an hman.
20Cun hi thil hi Mordekai nih ca chungah a khumh hna i Ahasuerus Siangpahrang peng chung dihlak i a ummi Judah mi kha, a hlat i a ummi he a nai i a ummi he, ca a kuat hna i 21kum khat hnu kum khat Adar thla ni hleili ni le ni hleinga ni kha nan ulh hna lai, 22zeicahtiah hi ni hna ah hin Judah mi nih an ral hna sinin himnak an hmuh i hi thla hi an caah ngaihchiatnak in lunglawmhnak ah, ṭahnak in dinhnak ni ah aa thlen thla a si; cun nannih nih hi ni hna cu puai tuahnak le lunglawmhnak ni le laksawng ṭhaṭha i kuatnak le sifakmi hna laksawng peknak ni ah nan hman lai tiin nawl a pek hna.
23Cucaah Judah mi hna nih cun an rak thawk bantuk le Mordekai nih ca a kuat hna bantuk khan an tuah. 24Zeicahtiah Agag mi Haman, Hammedatha fapa, Judah mi ral nih khan Judah mi hna cu hrawh awkah khua a khan i annih kha hloh le hrawh awkah Pur kha a rak khiah cang, Pur cu camcawhfung a si; #Est 3.7 25sihmanhsehlaw Esther cu siangpahrang hmaiah a rat tikah, Judah mi hna cung i ṭhat lonak khua a khan mi kha amah lu cungah tla in amah le a fapa hna cu thlainak ah thlai an si nakhnga, caṭial in nawlbia kha a chuah. 26Cucaah hi ni hna cu Pur ti bia zulh in Purim tiah an ti hna. Cucaah cu ca chung i aa ṭialmi vialte le hi kong ah annih nih an tonmi vialte le an cung i a tlungmi thil vialte ruangah, 27Judah mi hna nih cun an fehter i anmah le an tefa hna le anmah a fonhtu vialte hna keng cungah khan an i chonh i hi ni hnih hi pel lo tein, hi ca ṭialning te le a caan khiah ni ah hin kumfate in kan ulh lai, an ti; 28Cun hi ni hnih hna cu, kan tefa hna nih an chan kip ah le kan innchungkhar hna nih an dihlak in, peng kip le khua kip i an umnak ah, hngal camcin hna seh law, hi Purim ni hna hi Judah mi nih hman loin an um hrimhrim nakhnga lo, kan tefa hna lakah hi ni hna hngalh camcinnak cu dong hlah seh, an ti.
29Khi tikah Abihail fanu Siangpahrangnu Esther le Judah mi Mordekai nih khan ca ṭial nawl ngeihnak in Purim kong i ca pahnih cu an fehter. 30Ahasuerus ram chung i peng za le peng kul le peng sarih ah khan, Judah mi vialte sinah daihnak bia le biatak in ca an kuat hna i, 31hi Purim ni hna hi an caan khiahpiakmi caan ah, Judah mi Mordekai le Siangpahrangnu Esther nih Judah mi hna cu an fial hna bantuk le anmah le an tefa hna caah an rawl ulhnak kong le an ṭahnak kong i phung an sermi bantukin ulh si hna seh, an ti. 32Siangpahrangnu Esther nawlbia nih Purim tuahnak ningcang cu a fehter i mah cucu ca in ṭial a si.
Currently Selected:
ESTHER 9: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006