ESTHER 8
8
Judah Mi Kha Nanmahte Nan I Veng Kho, Ti A Si
1Khi ni ah khan Siangpahrang Ahasuerus nih Siangpahrangnu Esther cu Judah mi ral a simi Haman inn kha a pek. Cun Esther nih Mordekai cu a zeidah a si kha a rak chimh caah siangpahrang hmaiah khan a ra chuak; 2cun siangpahrang nih cun Haman a pekmi a min khenhnak kutdonghrolh kha aa phoih i Mordekai kha a pek. Cun Esther nih Mordekai cu Haman inn zohkhenhtu ah khan a chiah.
3Cun Esther nih siangpahrang sinah cun bia a chim ṭhan; a ke hram ah khan a bawk i Agag mi Haman nih Judah mi cungah a ṭha lomi khuakhannak a ruahmi le rawinak a timhmi let ṭhan awkah khan mitthli he a nawl. 4Cun siangpahrang nih sui bawifung kha Esther leiah cun a hei hler; 5cun Esther cu a tho i siangpahrang hmaiah cun a dir. Cun aa thawh i, “Siangpahrang na duhnak a si i na hmaiah mithmai ṭha ka hmuh i siangpahrang na hmaiah hi thil hi ahmaanmi a si i na mit ka tlin a si ahcun, siangpahrang ram chung peng dihlak i a ummi Judah mi hna hrawhnak ding ca i Agag mi Haman, Hammedatha fapa nih a rak ṭialmi ca letnak caah khan nawlbia pakhat in ṭial si seh. 6Zeicahtiah, zeitindah ka miphun cung i a tlung ding harnak hmuh cu ka in khawh lai? Zeitindah ka rualchan hna hrawh dih an si hmuh cu ka in khawh lai?” tiah a ti. 7Cun Siangpahrang Ahasuerus nih Siangpahrang Esther le Judah mi Mordekai cu a thawh hna i, “Zohhmanh u, Haman inn cu Esther kha ka pek cang i Judah mi kha thah a duh hna caah amah cu thlainak ah an thlai cang. 8Cun Judah mi kong ah cun siangpahrang min in nan duh bantukin ca nan ṭial lai i siangpahrang kutdong hrolh in nan khenhchih lai; zeicahtiah siangpahrang min in ṭial i siangpahrang kutdong hrolh in khenh chihmi nawlbia cu let khawh a si ti lo,” tiah a ti.
9Thla thumnak thla, Sivan thla, a ni kul le ni thum ni ah, khi caan ah siangpahrang caṭialtu kha an auh i Mordekai nawl peknak ning paoh khan, India ram in Ethiopia ram tiang siangpahrang kut tang bawi hna le ram uktu hna le bawi dangdang hna sinah khan, Judah mi kong cu ca in an kuat hna, peng za khat le peng kul le peng sarih an si, peng kip ah anmah le an ca cio in le miphun kip sinah anmahle an holh cio in an kuat hna, cun Judah mi hna zong cu anmahle an ca le an holh in an kuat ve hna. 10An ṭialmi cu Siangpahrang Ahasuerus min in a si i siangpahrang kutdong hrolh in an khenh chih; cun ca hna cu siangpahrang rang an zuatnak hmun in a chuakmi, siangpahrang rian caah hmanmi rang lek mu kha aa citmi caphortu hna nih khan an kalpi hna. 11Cun cu ca cun siangpahrang nih khan khua kip i a ummi Judah mi hna kha i pumh i an nunnak i runven i mi zei miphun hmanh an si ah, zei peng hmanh an si ah, anmah a dohtu hna paoh cu an ngakchia hna le an nu hna he rak tuk ve rak thah ve i an ci rak hmih ve i an chawva rak ramh ve ding kha nawl a onh hna; 12mah cucu ni khat nite ah Siangpahrang Ahasuerus ram chung dihlak ah, thla hleihnihnak thla, Adar thla, a ni hleithum ni ah tuah ding a si. 13An ṭialmi ca ṭial chinmi cu peng kip ah khan nawlbia caah mi kip sinah thanh awkin pek a si lai i an ral hna cung i phuhlamnak tuahnak ding caah khan Judah mi hna cu cu ni ah cun i timh awk an si lai. 14Cucaah siangpahrang rian ca i hman tawnmi rang lek mu hna cu i cit in caphortu hna cu khulrang in, siangpahrang nawlbia nih a fial hna bangin an chuak; cun nawlbia kha Susa khuapi chungah khan an thanh.
15Susa khuapi cu lunglawmhnak in a au len lioah khan Mordekai cu, siangpahrang puan a dum le a rang kha aa aih i sui luchin kha aa chinh i la hmangṭhia le sendung puan kha i aih in siangpahrang hmai cun a hung chuak. 16Judah mi hna nih cun ceunak le lawmhnak le thanuamnak kha an hmuh. 17Cun peng kip le khua kip ah khan, siangpahrang nawlbia le biakhiahnak a phaknak paoh ah Judah mi hna caah cun lawmhnak le thanuamnak a um i rawldanghnak an tuah i i dinh ni kha an ser. Cun Judah mi ṭihnak kha an cungah a tlun caah cuka ram mi miphun hna chung cun mi tampi nih Judah mi ka si tiah an i ti.
Currently Selected:
ESTHER 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006