2 CHANRELNAK 15
15
Asa Nih Remhnak A Tuah
(1Sia 15.13-15)
1Pathian thlarau cu Oded fapa Azariah cungah a tlung i 2Asa ton awkah khan a kal i amah cu a thawh i, “Asa le Judah mi vialte le Benjamin mi vialte hna ka bia ngai tuah u: Amah sinah nan um chung cu Bawipa cu nan sinah a um. Nan kawl ahcun amah cu nan hmuh lai, sihmanhsehlaw nan hlawt ahcun an hlawt ve hna lai. 3Caan saupi chung Israel cu Pathian ngaingai ngei lo le cawnpiaktu tlangbawi ngei lo le phungbia loin an um; 4sihmanhsehlaw an harnak chungin Bawipa, Israel Pathian leiah an i mer i an kawl tikah annih nih an hmuh ko. 5Cu caan lioah cun a chuakmi caah siseh a lutmi caah siseh daihnak a um lo, zeitintiah hnahnawhnak ngan pipi nih ramchung mi vialte cu awlok a chonh hna. 6Phun khat le phun khat, khua khat le khua khat an i do i an kek an kuai dih, zeicahtiah Pathian nih harnak phun zakip in harnak a pek hna. 7Sihmanhsehlaw nannih cu nan lung ṭhawng ko u! Nan kut kha derter hna hlah u, zeitintiah nan rian cu man a ngei lai,” tiah a ti.
8Asa nih Oded fapa Azariah nih a chimmi bia hna cu a theih tikah, a ral a ṭha i Judah le Benjamin ram chung vialte le Efraim tlangram chung i a lakmi khua hna i a ummi fihnung siasal vialte kha a hlonh dih hna i Bawipa inn innleng hmai i a ummi biakṭheng kha a remh. 9Cun Judah mi vialte le Benjamin mi vialte le Efraim, Manasseh le Simeon in a rami an sin i a pummi hna kha a pumh hna, zeitintiah Bawipa a Pathian kha a sinah a um ti an hngalh tikah Israel ram in mi tampi amah sinah khan an zam. 10Annih cu Asa a bawi kum hleinganak, a thla thum thla ah khan Jerusalem ah an i pum. 11Cu ni ah cun hranchaw an va lakmi chung khan Bawipa sinah cawtum za sarih le tuu thong sarih an thawi hna. 12Cun annih nih Bawipa, an pupa hna Pathian kha an lung dihlak le an nunnak dihlak in kawl awkah biakamnak chungah an lut; 13cun Bawipa, Israel Pathian a kawl duh lomi paoh cu mino a si ah, mitar a si ah, pa a si ah, nu a si ah, thah a si lai. 14Bawipa sin chiatsernak cu aw thangpi le au le muko le saki tumnak he an tuah. 15Cun Judah mi vialte cu an biakam chiatsernak ah cun an i lawm; zeicahtiah an lungtak tein chiatsernak cu an tuah i an duhnak dihlak in amah cu an kawl i amah cu an hmuh i an velchum ah Bawipa nih dinhnak a pek hna.
16A nu Maakah hmanh kha Asherah caah fihnung siasal a ser caah, Siangpahrang Asa nih, siangpahrang bawinu a sinak khan a phuah. A siasal cu a hau i a den cikcek i Kidron varek ah a khangh. 17Sihmanhsehlaw khuahrum bo hna kha cu Israel ram chungin a hlo hna lo. Asinain Asa lungthin cu a chan chung vialte soisel awk um lo a si. 18Cun Pathian inn chungah khan a pa biakamnak laksawng hna le amah biakamnak laksawng hna, ngun le sui le umkheng hna kha a rak put hna. 19Cun Asa uknak a kum kum sawm thum le kum nganak tiang ral a um ti lo.
Currently Selected:
2 CHANRELNAK 15: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006