2 CHANRELNAK 14
14
Asa Pennak
(1Sia 15.9-12)
1Cun Abijah cu a pupa hna sinah a it i David khua ah an vui; a fapa Asa cu amah hmun ah khan a hung bawi. Amah chan ah cun ram cu kum hra him tein a um. 2Cun Asa nih Bawipa a Pathian mithmuh i a ṭha le a ding kha a tuah. 3Ram dang biakṭheng hna le khuahrum bo hna kha a hrawh hna i tung kha a chimh hna i Asherim kha a hau hna i 4Judah mi hna cu Bawipa, an pupa hna Pathian kha kawl awkah le phungbia le nawlbia kha zulh awkah nawl a pek hna. 5Cun Judah ram chung khua vialte hna chung khan khuahrum bo hna le zihmui biakṭheng hna kha a hrawh hna. Cun ram cu a kut tangah hnangam in a um. 6Ram cu a daih caah Judah ram chungah khan kulh ngeimi khua a ser hna. Cu kum hna chungah cun Bawipa nih daihnak a pek caah ral a ngei lo. 7Cun Judah mi cu a thawh hna i, “Hi khua hi ser hna u sih law vampang le innsang le kutka le kothrolh in kulh hna u sih; Bawipa kan Pathian cu kan kawl caah ram cu kanmah ta a si rih; kannih nih amah kha kan kawl i anih nih a kenkip ah daihnak a kan pek,” tiah a ti. Cuticun khua cu an ser hna i an hungcho. 8Asa nih Judah in ralkapbu mi sing thum, phaw ngan pipi le fei in aa thuammi le Benjamin in phaw a thlir i likuk a kuaimi sing hnih le sang riat a ngeih hna; hi hna hi an dihlak tein ralṭha miṭhawng an si.
9Ethiopia mi Zerah nih ralkap nuai khat le rangleng sing thum he a chuahhnawh hna i Mareshah tiang a ra phan. 10Cun amah cu Asa nih a hei chuahhnawh ve i Mareshah i Zefathah nelrawn ah cun i doh awkah an i tiang. 11Cun Asa nih Bawipa a Pathian kha a auh i, “Maw Bawipa, a ṭhawngmi le a dermi karlak ah, bawmtu nangmah bantuk ahohmanh an um lo. Maw Bawipa kan Pathian, kan bawm ko sawh, zeitintiah nangmah kha kan in bochan i hi mibu nganpi hi nangmah min in kan chuahhnawh hna. Maw Bawipa, nangmah cu kan Pathian na si; minung nih nangmah cu in tei hna hlah seh,” tiah a ti. 12Cucaah Bawipa nih Ethiopia mi hna cu Asa le Judah mi hna hmaiah a tei hna i Ethiopia mi cu an zam. 13Asa le a sin i a ummi hna nih khan Gerar tiang an dawi hna i Ethiopia mi cu a nung in pakhat hmanh an taan lo tiang an thi; zeitintiah annih cu Bawipa le a ralkapbu hmaiah cun an kuai dih. Judah mi nih cun hranchaw tampi an lak. 14Gerar pawngkam khua vialte cu an tuk i Bawipa kha an ṭih caah an tei hna. Khua vialte kha an chungah hranchaw tampi an um caah an ramh hna. 15Cun saṭil a ngeimi hna thlam kha an tuk hna i tuu le kalauk kha tampi an i kalpi hna. Cun Jerusalem ah an kir.
Currently Selected:
2 CHANRELNAK 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006