Philippi te 3
3
A maan Thutang Suana
1Thukhupna ah, ka suapuite awng, Topa taw pumkhat na hina uh taw kisai in lungpil tavun. Ka at sa thute ka at kikik sia phamaw sa tuan ngawl khi hi, note thinmuan natu hi zaw hi. 2A sia a vawtte, tua uite, vunteap at kul hi a ci hamtangte, na encik tavun. 3A maan vunteap atna a neite sia amate hi ngawl a, eima ih hi zaw hi, banghang ziam cile eite in Pathian sia ama Thaa taw ih bia a, Christ Jesus taw pumkhat a ih nuntakna sung ah, a lawpte ih hi hi. A puatham cii le sa limte tungtaang ah eite in muanna ih nei bua hi. 4Keima zongh tuabang thute muan thei natu a neipa ka hi hi. A puatham cii le sa limte muan thei tu thu nei ing a ci khat po a om le tuabang ci thei natu thu a tamzaw ka nei hi. 5Ka sua zawk nipi khat a cin ciangin ka vunteap hong ki atsak hi. Ka pianna sia Israel mi in ka piang a, Benjamin suan hi in, Hebrew chi tatak ka hi hi. Jew te Thukham zuina taw kizomin keima in Pharisee khat ka hi hi, #Sawl 23:6; 26:5; Rom 11:1 6a biakna sangah tha lawp leilam ka hi komin, pawlpi ka vawtsia zazaan hi. Mihing khat in thukham tanna taw thutang suak thei tu hile sitbaanna ka nei bua hi. #Sawl 8:3; 22:4; 26:9-11 7Ahihang meetna in ka ngaisut thei thute theampo sia tu in Christ atu hangin supna hizaw hi ci in ka tuat hi. 8Tuate bek ahi bua hi: ka Topa Christ Jesus heakna thu sia manpha zaw pek ahi hu in nadang theampo sia supna hi ci in ka tuat hi. Ama hangin na theampo ka vawk zo hi; Christ ka nei thei natu le, ama taw pumkhat ka sua bit thei natu in na theampo sia ninbu lomtangh bang bekin ka ngaisun hi, 9Thukham zuina taw a kinga theite nam ahi keima aituam thutang suana khat sia ka nei nawn bua hi. Christ ih upna tungtawnin hong kipia, Pathian kung pan hong pai upna a kibulphu thutang sia tu in ka nei zo hi. 10Christ heak tu le ama thaw kikna vaangletna siim tu, ama thuaknate thuakpui tu, a thina sungah ama taw kiban tu sia ka dei bulpi ahi hi, 11tua in keima mama thina pan nuntakna ah ka thaw kik tu ka lametna ahi hi.
Mungtupna sangah Tai
12Ka nasepna taangtun zo ing, tua ahibuale cialcing zo ing ci ngawl khi hi. Jesus Christ in ama atu in kei hong sungsuam zo a hina tel sia ka nga zawk natu in ka hanciam tan lai hi. 13Hi hi, ka suapuite awng, tua tel nga zo khi hi, ci in ka ngaisun bua hi; ahizong ka sepna khat sia, nungsang thute mangil in maisang thute ka phak natu in ahi theiza ka hanciam hi. 14Tua ahikom Jesus Christ tungtawnin tungsang nuntak natu Pathian hong sapna ahi, tel a nga zo tu in tang takin mungtupna sangah ka tai hi.
15Thaa lamsang ah a khanthin eite theampo in hi bang thin ih nei natu ahi hi. Ahihang no pawlkhat in thutuam na nei uh le Pathian in hong telsak tu hi. 16Tuabang ahi hial zong, tu dong ciang ih zui sa hi ngeinate taw ma mainawt tawng.
17Suapuite awng, keima ngamtat bangin hong zui tawntung tavun. Noma ettee tu a ngamtatna maan kong koisak sia a zuite na nadon`` tavun. #1 Cor 4:16; 11:1 18Hi thute tamvei ma kong son ngei zo a, tu in thitui taw kong son kik hi: a nuntakna zia uh taw thinglamtee tungah Christ' thina ii ngalte a suak mihing tam mama om hi. 19Amate sia a khakbel ciangin hell theng tu uh hi, banghang ziam cile cii le sa deinate sia amate ii pathian ahi hi. A maizum huai, a thasiathuaite thangphatna in la uh a, leitung neisa nate bekma ngaisun uh hi. 20Eite ih hile vantung ngammite ih hi a, vantung panin ih Hunpa Topa Jesus Christ hong pai tu thalawp takin ih ngak hi. 21Ama in a thazawm a thithei ih pumpite sia na theampo ama uk sung a thet natu, a vawt theina vaang zangh a, ama ii vaang nei pumpi taw kibangin hong vawt tu hi.
Currently Selected:
Philippi te 3: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016