Philippi te 2
2
Christ ii Kiniamkhiakna le A letna
1Christ sungah na nuntakna in, hong thahatsak a, tuaciang ama hong itna in hong thinnuamsak hi. Note in Thaa taw na kipawlkhawm uh a, tuaciang khat le khat ii tungah dikna le ciliapna na nei uh hi. 2Tua ahikom ka lungdamna nong pawlcinsak natu in ngaisutna kibangin, ki itna khat nei khawm a, thin khat lung khat hi in na om natu uh kong hanthawn hi. 3Kaangsung atu tupna bek taw ahizong, kisak thei nopna lel taw ahizong bangma seam heak vun, tua hi ngawlzaw in, khat le khat ii tungah kiniamkhiakin noma sangin ngualdangte a phazaw in ngaisun tawntung zaw vun. 4Noma ii kinsante bek na en heak vun a, khat le khat ii kinsante zongh na ki etpui tavun: 5Christ Jesus ii a nei thinpuak na nei tavun.
6Ama in Pathian ii pianzia
nei nginge a,
ahihang Pathian taw kikim natu in
zawthawk thu zanghin
hanciam tu a ngaisun bua hi.
7Tua hi ngawlzaw in,
ama uuk thu in
a nei theampo nusia in
naseampa pianzia la hi.
Ama in mihing taw
kibangin piang a,
mihing bangin kilangh hi.
8Ama in kiniamkhiak a,
a thi tu in thunitna lampi tawn a —
a thina thinglamtee tung dongah pai hi.
9Hi thu hangin Pathian in
ama sia a saangbelna munah laamto a
mindang khat pawpo sangin
a lianzaw min pia hi.
10Tua ahikom Jesus min
patoai natu in
vantung, leitung ah nuntakna
a nei theampo,
nuai simlei ah a om theampo in
khupdin tu uh a, #Is 45:23
11tuaciang a theampo in
Pa Pathian minthan natu
Jesus Christ sia Topa hi ci in,
a kilangh takin thangsak tu uh hi.
Leitung ah Khuavak bangin a Taangte
12Tua ahikom ka itte awng, no kungah kong om lai in ka thu nong nit tawntung uh bangma in, no taw kong omkhop ngawl ciang ngawngawn in, ka thu nong nit tu uh sia thupi zaw lai hi. Na ngupna a cingtaak natu in launa le liinna taw na seam tan tavun, 13banghang ziam cile ama deina na zui thei natu le na uuk natu in Pathian sia a tawntung na sung uh ah na hong seam hi.
14Na theampo ah phun ngawl, nial ngawlin seam vun, 15tua hile mawna le ngamtat siatna taw kidim leitung mite kawmah, a sitbaang ngawl Pathian ii tate bangin a maw ngawl, a thiangthote na suak thei tu uh hi. Aksite ii van ah a taan bangma in, #Thkna 32:5 16nuntakna thu amate na son uh ciangin amate sungah na taang tu uh hi. Tuabangin na hi uh le Christ Ni hong thet ciangin, no kong kiphatsak pui natu a thu ka nei tu hi, banghang ziam cile ka hanciamna sa le ka sepna sa teng a luithawthong hi ngawl hi ci in hong lak tu hi.
17Note upna hangin Pathian a kipia sangaw biakpiakna tungah piakkhiatna khat bangin ka nuntakna chisan kibua tu ahile zong ka lungdam tu a, ka thinnopna no theampo kong hawmsawn tu hi. 18Tuasia bangma in note zongh na lung uh na damsak vun a, na thinnopna uh kei nong hawm tu uh hi.
Timothy le Epaphroditus
19Topa ii deina a om le noma thu ka zaakna taw ka kihansua natu in Timothy kong paisak pal thei tu hi. 20Ama bekma sia kei taw ngaisutna kisi a, no hong thinnuammaw tatak pa ahi hi. 21Midang khat pawpo ahile Jesus Christ atu sangin, ama ii aituam thute bek kin hi. 22Ama taktai ziate bangbangin hong lak a, ama le kei sia pata bangin lungdamna thu atu bangza in diangkhawm khu ziam ci sia na heak uh hi. 23Tua ahikom ka vai bangbang takin hong piang tu ci in ka heak po ciang, no kungah ama kong paisak tu hi. 24Keima mama no kung kong pai pal thei natu in Topa ka muang hi.
25Keima hong hu tu in kamtai a na zak sa uh, kei taw kop a, naseamin ngal hong do pui ih suapui Epaphroditus kong paisak kul tu hi ci in ka ngaisun hi. 26Ama in note theampo hong mu tu kaal ngakla a, a cina hi ci in na zaak uh sia a thinnuam ngawl hi. 27Ama a cina takpi peu a, thi dektak zawsap hi. Ahihang Pathian in ama hesuak a, ama bek hi ngawlin kei zongh, khuangaina nasia zaw ka thuak ngawl natu in hong hesuak hi. 28Tua ahikom kong paisak tu sia ka thalawp kan hi. Tua hile ama na mu uh ciang na lungdam tu a, kei khuangaina bo tu hi. 29Tua ahikom Topa sungah suapui khat a hina hangin lungdamna taw na saang vun. Ama bang ahi tua mi theampo tungah zatakna lak tavun, 30banghang ziam cile kei nong hu thei ngawlna munah huna hong piak natu in, Christ ii na a sepna sungah a luangkhaamin a thi dektak pa ahi hi.
Currently Selected:
Philippi te 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016