Joel 2
2
Topa Ni atu Kidop natu Khaumawte taw lak
1Lemle tum vun;
Pathian mual thiangtho
Zion tungah patau daak
tum vun,
Judah mite awng, liing vun!
Topa ni hong theng pal tu hi.
2Tua ni sia khuatuapin,
a zing le meeivom kaai ni khat hi tu hi.
Mualte tungah khuazing kizel bangin
khaumaw ngalkaphonpi in maisang nawk hi.
Hi bang peuma om ngeingawl a, om kik ngei nawn ngawl tu hi.
3Meikuang bangin tuate in
ankungte netum hi.
A mai sangah ngam pha in
Eden Huan bang hi a,
ahihang a nungsangah
ngam kolhin sennealngam ahi hi.
Tuate kung pan bangma suakta ngawl hi.
4Tuate siphute taw kibang a;
ngal siphute bangin tai uh hi.
5Mualdawnte ah a lento uh ciang
siphu ngalleangte bangin nging vatel a;
lopa kote mei taw hal bangin puak vatam hi.
Tuate sia ngalsim tu in a kithoai
ngalkap honpui khat bangin kingual uh hi. #Tpl 9:7-9
6Tuate a nai ciang kuama theampo lau a;
a maitang theampo daang siat uh hi.
7Ngalhangte bangin
tuate in sim a;
luphungte tungah ngalkapte
bangin kaato uh hi.
A vekpi ma in mai sangah tang tak nawk in,
a pai natu san pial ngawl hi,
8ahibuale khat le khat a mai kikhak ngawl uh hi.
Ngal nannate
kaantan vanuau in
kuama in khak zo ngawl hi.
9Tuate in khuapi bulu a;
a luphungte kaantan uh hi;
tuate inn tungah kaato in
ngutate bangin khelkite pan tum uh hi.
10Mai ah a manaw uh ciang lei liing a;
van kilok hi.
Ni le tha mial a,
aksite taang nawn ngawl hi.#Tpl 8:12
11 Topa in a ngalkaphonpi tungah vanto aw taw thupia hi.
A thuni ngalkap honte tam a, thahat hi.
Topa ni sia bangza in lauhuai ziam!
akua suakta zo tu ziam? #Tpl 6:17
Kisii kik natu Kikaizotna
12 Topa in “Ahihang tu mama zongh in,
thintak taw kisiik kik in kei kungah
an tanna, kaana le mauna taw hong heak kik tavun.
13Na thin tapthapna taw in na heena lak vun;
na puansilh balthapna bek sia kicing ngawl hi,” ci hi.
Topa na Pathian kungah pai kik vun.
Ama cingh a, hesuakna taw kidim hi;
ama a thinsau a, a kamciam len hi;
ama in khialna mawna maisak tu le daan piak ngawl tu in kinging tawntung hi.
14 Topa na Pathian in a thin kheal tha tu a,
an hauna taw nang thupha hong pia tu hi.
Tuasia ciang antang le sapittui te ama na pia thei tu uh hi.
15Zion Mual ah lemle tum vun;
antan natu thupia vun a, mipi kikhop sam vun!
16Mite khawmtua vun;
a thiangtho kikhop natu in kithoaisak vun;
khanghaamte hong paipui tavun;
patangte le nausente zongh khawmtua vun.
A kiteang tuung nupate zongh a inn nusia in hong pai uh kul tu hi.
17Biaknatau le Biakinnpi tumna kilaklaw a,
Topa na a seam thiampite kapin thu a nget uh kul tu hi:
“Topa awng, na mite hesuak in.
Minam dangte in, ‘Na Pathian koisung om ziam?’ ci in
hong zawngsak hong nunausak heak in,” ci tu uh hi.
Pathian in Leitang Phasak kik
18Tua zawkciang Topa in ama leitang atu thinbot a;
ama in a mite hesuak hi.
19Ama in amate tungah hi bang in zo hi:
“Tu in an, sapittui le olive thau
kong pia tu a, na lung uh kim tu hi.
Minam dangte in no hong
zawngsak nawn ngawl tu hi.
20Saksang pan hong pai
khaumaw honpite ka heam tu a,
pawlkhatte sennealngam sungah ka hawlkeak tu hi.
A mai dok ngual teng Tuipi Thi sungah,
a nung ngual teng Mediterranean tuipi sungah kihawlkeak tu hi.
A thisate muat in ui tu hi.
Note tungah hong vawtnate hangin tuate ka susia tu hi,
21“Lote awng, lau heak vun,
Topa hong sepsak sate hu in
lungpil in lungdam vun.
22Nganhingte awng lau heak vun,
Ngan thana munte hing a;
thingkungte a nga nga in,
thei le sapitngate tam mama om hi.
23“Zion mite awng, lungdam vun,
Topa na Pathian ii note atu
a sep sate hu in lungdam vun.
Ama in tangngam ngua a khombek khat in hong pia a;
ama in phalbi nguate no atu hong buaksuk in,
khuapi ngua zongh hong piak ngei bang hong pia hi.
24Taang cilna munte sia antang taw kidim tu a;
thingngatui sukna hui ah
leidumte sia sapittui le olive thau taw dimleet tu hi.
25Khaumaw honte ii na lo an
hong neaktumsak kumte sungah na sup uhte kong pia kik tu hi.
Hi khaumaw honpi hong puak sia keima khi hi.
26Tu in neak tu tam mama nei in, na lung uh kim tu hi.
Na lamdangte no atu hong sepsak Topa na Pathian na pok tu uh hi.
Ka mite kizawnsak vawt kik ngei nawn ngawl tu hi.
27Tuasia ciang Israel awng, note sungah ka om hunlam na he tu uh hi,
keima in Topa, noma ii Pathian ka hi a,
Pathian dang om ngawl hi.
Ka mite kizawngsak kik ngei nawn ngawl tu hi.
Topa ii Ni
28“Tuasia zawkciang a kuama po tungah
ka Thaa ka buak tu a:
na tapate le tanute in ka thu thangsak tu uh hi;
na khanghaamte in mang man tu uh a,
na khangnote in mukholna mu tu uh hi.#Sawl 2:17-21
29Tua hun in naseam nupite le pasalte tung
ngawngawn ah ka Thaa ka buak tu hi.
30“Tua ni hun atu kidop
thei natu in
van le lei ah limte ka pia tu a;
chisan luanna, meikuang le meikhu lomte om tu hi.
31A lian le a lauhuai Topa ii ni hong pai ma in,
ni kimialsak tu a, tha zongh chi bangin san tu hi. #Mt 24:29; Mk 13:24-25; Lk 21:25; Tpl 6:12-13
32Ahihang Topa tungah
huna a ngen theampo kingum tu hi.
Topa ci sa bangin
‘Jerusalem a om pawlkhatte suakta tu a;
ka teal mite suakta tu uh hi.’#Rom 10:13
Currently Selected:
Joel 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016