KAWLAWSIE 1
1
Lox Nawb Bwan
1Pawlux pa mawh kawncau pa ting Yesux Khrit, kheu alo Siyiex mai Timose pa mawh puxaik, 2tawx ka puxaik pa singax mai pa kaux sijax daux Yesux Khrit pa ot ka daux veng Kawlawsie khankix heue. Kieh pex koe bwanson mai pa nhim pa kaoh khaing Keeing ex Siyiex liak.
Yum Rhawm Daux Cao Khrit
3Ex yaogyaw bwanson Siyiex pa mawh Keeing Simiang ex Yesux Khrit mai rawg bwan, son pex ku jheung jheung, 4kheu hoik mhong grawng krax yum rhawm pex ka daux Yesux Khrit mai krax moh pex ka pui singax khawmuik, 5mawh kheu pa keud pot jun pot, pa hoik een son pex ka daux meung raoma, awm pa hoik mhong pex phao ka ka daux gumlox pa mawh meh, lox bwan gaux rhawm, 6pa hoik hoek ka pex, awm hoik hoek ka daux haktiex khawmuik, pex tak plix plix mai haok huan, awm hoik mawh khawm ka daux pex, singaix tom yam jah pex ti mhong mai tawng bwanson Siyiex ka daux pa mawh meh, 7Awm hoik gau pex khaing Epaphrax,#Kaw 4:12; Phim 23 paox siliex pa moh ex, pa mawh cao sidiex gau pa kaux sijax Cao Khrit ka son ex, 8Kaw pa hoik krai ka ex khawm grawng krax moh pex ka daux Khuan Cao heue.
Cao Khrit Ting Piang Ku Ceu
9Mawh kheu jao in, ex kawx, jah tom singaix pa mhong ex grawng an, rawg bwan ka son pex ang jud jai, mhaing yuh ka mawx sonsang naog pex krax tawng ka alo Nawh Cao ka daux pingnya mai pa chix tawng sidawng khawmuik pa dex mai khuan, 10sonsang hu pex awm pa keung ka Simiang, sonsang caw rhawm Nawh ka khawmuik mai plix plix ka daux kaing pa mhawm ku ceu mai haok huan ka daux krax tawng Simiang Siyiex, 11kieh baox koe riang ka daux siawp sibrawm khawmuik, awm pa khaw mai riang rao min pakngai Nawh, sonsang chix grum yeung mai chix lang gun yeung tau mai krax gaux rhawm, 12yaogyaw bwanson Keeing Cao, Kaw pa hoik yuh ex mawh pa keung ti rom ti pon sin pui pa singax singeh ka daux pa riang, 13kaw pa hoik taoh ex lih khaing siawp sibrawm pa faik, hoik loh ti sau ex ka daux meung Kawn pa moh Nawh Cao heue. 14Ka daux Kawn Nawh an ex hoek krax taoh krax pluat ploi phimap.#Efe 1:7 15Kaw an mawh riang pak peung Siyiex pa ang chix yaox ka, pa mawh pa liang ti keh sivoe can pa phan ti deuh khawmuik, 16grawh grawng nawh hoik phan hoik yuh ku ceu khawmuik ka daux Nawh Cao, can pa koe ka raoma mai can pa koe ka piang haktiex, ceu pa chix yaox khankix, khawm ceu pa ang chix yaox khankix, viang mawh dang ngeung khankix ang ah, simiang haktiex khankix ang ah, simiang giex kaing khankix ang ah, siawp sibrawm khankix ang ah, ku ceu khawmuik hoik phan hoik yuh kheu Nawh mai son Nawh heue. 17Nawh Cao hoik dawg mawh ka sivoe ku ceu khawmuik mai ku ceu khawmuik grum ka daux Nawh Cao heue. 18Nawh mawh kaing tokaux pa mawh ceu cao,#Efe 1:22-23 kaw pa mawh pa jah, pa liang ti keh khaing pa yum, sonsang ting tokaux Nawh khaing ku ceu khawmuik heue.
Deeh Khaw Caw Paox tix Daux Cao Khrit
19Grawh grawng nawh hoik khaw hoik caw ka rhawm Siyiex ti kieh pa grum khawmuik ot ka daux Nawh Cao. 20Kieh ku ceu khawmuik deeh khaw ka tokaux tix kheu Nawh Cao, kheu hoik kieh nhim, kheu nham khaox lhak Nawh Cao, aux ah kheu Nawh Cao, ceu pa koe ka piang haktiex khankix ang ah, ceu pa koe ka daux raoma khankix ang ah.#Efe 2:16
Pawlux Hu Daux Ceu Cao
21Pex, pa hoik tang tiah paox tix daux bawg yam pa hoik luan, mawh pui pa koeng ka daux rhawm pex, ka daux kaing pa caox pa yuh pex, 22yam in Nawh Cao hoik deeh kieh khaw paox tix, ka daux tokaux nex nham Nawh, kheu pa yum Nawh, sonsang pon tix tawx pex mawh pa hoik singax singeh pa loig pa ang koe dee deuh phimap ka plak sivoe Nawh Cao. 23Phan pex ca kawn ot ka daux krax yum rhawm mai kaux cong kah mai ang gah hu khaing krax keud pot jun pot lox bwan gaux rhawm pa hoik mhong pex, pa hoik sidiex ka can pa hoik phan hoik deuh khawmuik ka greem raoma, pa hoik kieh aux Pawlux mawh kawncau pa diex pa gau kah heue.
Pawlux Yuh Kaing Son Ceu Cao
24Yam in aux gaux rhawm ka daux pa kham geu aux son pex, kieh ceu pa kha rhawm Cao Khrit pa ang nyang grum naog, naog ka daux nex nham aux, son tokaux Nawh Cao, pa mawh ceu cao heue. 25Hoik kieh aux mawh kawncau pa diex pa gau ka an, awm pa khaw mai ara kawncau pa tawx Siyiex ka aux son pex, sonsang kieh gumlox Siyiex grum naog, 26pa mawh pa raux pa hoik mox ka daux bawg yam mai ju pa hoik luan khankix khawmuik, yam in hoik plak jhi ka pui pa singax singeh cie Nawh khankix. 27Pa hoik caw alo Siyiex ti kieh kix tawng, pa mi pa koe min plakngai ceu pa raux pa hoik mox in, ka daux pui tang ceu khankix mawh pa yuh ka mawx, pa mi pa koe an mawh pa ot Cao Khrit ka daux pex, pa mawh krax keud pot jun pot son min pakngai heue. 28Ex krai grawh grawng Nawh mai sidiex ka pui ku kaux mai gau ka pui ku kaux ka daux pingnya cuyi khawmuik, sonsang pon ex ti tawx pui ku kaux mawh pa hoik grum mhawm ka daux Cao Khrit heue. 29Aux kawx, nied ti coca yuh sonsang mawh nan, awm can pa teei Nawh sibrawm mai yuh ka daux aux heue.
Currently Selected:
KAWLAWSIE 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012