PHILIPPIX 4
4
Gaux rhawm Daux Cao Khrit Jheeng jheung
1Puxaik pa moh aux khankix mai pa byaong aux kah, pa mawh krax gaux rhawm mai mhok khri aux, ot kaux cong ka daux Simiang, pui pa moh aux khankix eue. 2Ka Eodia aux jeeh nyaw kah mai ka Suntukke aux jeeh nyaw kah, sonsang koe rhawm pa awm paox tix ka daux Siyiex heue. 3Mawh heue, aux khyox khaw ka maix kaw pa mawh paox pa yuh tau mai aux tete heue. Teem ka bun in kiex, mawh kheu kiex hoik yuh tau mai aux ka daux lox bwan gaux rhawm, tau mai khawm Klemen mai paox yuh kaing pa deuk khankix, pa hoit koe ceu kaux kix ka daux phuk lai ju pa im heue. 4Gaux rhawm ka daux Simiang Siyiex jheung jheung, aux baox deeh ah gaux rhawm heue. 5Ceu pa awn rhawm pex kieh pui khawmuik tawng kah heue. Simiang Siyiex ot dex heue. 6Paw khi rhawm ka grawh grawng tix ceu kawx, ka daux ku ceu, rawg bwan mhaing tau mai krax yaogyaw bwanson, kieh Siyiex tawng pa rawg pa mhaing pex, 7pa nhim cie Siyiex, pa nie lang teung ting khaing krax tawng yung khawmuik, tak sang pau rhawm rhi pex mai pa keud pex ka daux Yesux Khrit heue.
Doh Keud Ka Grawng Ceu In Khankix
8Lox pa deuk mawh nin, puxaik khankix eue, can ceu pa mawh, pa mawh meh, pa koe min pakngai, pa rahsee, pa singax, pa mhawm mhiem, pa yaw min pa mhawm kah, phan siep koe bwanson, phan siep koe krax yaog yaw, keud ka grawng ceu in khankix heue. 9Ceu pa hoik gau mai khawm pa hoik rieb pex ti teei, pa hoik mhong, pa hoik yaox ka aux, hawt ti yuh ceu an khankix mai Siyiex pa nhim tak sang ot tau mai pex heue.
Ting Bwanson Ka Totaix Pa Hoik Pon
10Aux kied ting gaux rhawm ka daux Siyiex, kheu yam in viang hoik koe jih jang glang gleeing kawx, krax pa kia ngien pex ka aux hoik deeh pruh kah, viang pex hoik keud ti yuh tete kawx, pex ang yaox ti yuh heue. 11Aux ang ah grawng pa ang kub tix, mawh kheu aux hoik gau ti chix fah rhawm viang aux yaox ti ot ka daux pa yuh ka mawx ang ah heue. 12Aux chix ot ka daux pa hot pa blai mai aux chix ot khawm ka daux pa nie haoh nie lheu khaing kub, ka daux ku ceu khawmuik aux hoik gau ti chix kham pa sak mai khawm pa chix cai rhawm mai ti chix koe pa nie haoh nie lheu khaing kub mai khawm pa ang kub tix heue. 13Aux chix yuh ku ceu khawmuik ka daux kaw pa tawx riang rao ka aux heue. 14Viang mawh nan pa yuh pex paox pie mai krax kha rhawm aux, pex hoik yuh pa mhawm heue. 15Pui Philippix khankix eue, pex kawx hoik tawng, grawng yam jah lox bwan gaux rhawm, yam lih hu aux khaing meung Makedonix, ceu cao tix mu kawx ang yuh paox pie mai aux, ka daux krax tan mai ka daux pa rieb ti teei, lheu khaing pex khaing, 16grawh grawng nawh pie yam ot aux ka daux veng Thesalonix kawx #Cau 17:1 pex hoik sipaox son pa lo aux ra bawg heue.#2Kaw 11:9 17Ang mawh kheu sawg aux totaix, viang mawh nan aux sawg son plix pa sang teen ka son pex heue. 18Viang mawh nan aux grum koe ku ceu khawmuik mai aux koe nie haoh nie lheu khaing kub, aux hoik kub hoik naog, khaix hoik pon rieb aux ceu pa viex Epaphrawdit khaing pex, pa mawh bhawng pa sioe baux #Lih 29:18mai pa tan ceu pa keung pa khaw caw ka Siyiex heue. 19Siyiex aux tak sang kieh ceu pa lo pex grum naog ku ceu, awm pa khaw mai sinngao min plakngai Nawh, ka daux Yesux Khrit heue. 20Kieh Siyiex mai Keeing ex koe min pakngai ku ju leeing ju liak. Amen.
Lox Ghoik Mai Nawb Bwan
21Tawx lox nawb ka pui singax ka daux Yesux Khrit ku kaux awx. Puxaik pa ot tau mai aux khankix kawx nawb ka pex heue. 22Pui pa singax khawmuik kawx nawb ka pex, nie lheu mawh kix pa dex mai geh nyiex haw Kesa heue.
23Kieh bwanson Simiang Yesux Khrit koe tau mai khuan pex liak. Amen.
Currently Selected:
PHILIPPIX 4: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012