KAWLAWSIE 2
2
1Aux simie ti kieh pex tawng grawng ngah aux paox tix ka son pex miex ding, son kix ka daux veng Lawdikix, son kix can pa ang sax yaox pakngai aux ka daux nex nham, 2sonsang nyawm rhawm kix, kheu hoik kleuk kix tau ka daux krax moh krax rhawm, tom pon pa mi pa koe khawmuik, pa fah rhawm ka grawng krax tawng, sonsang tawng kix pa raux pa mox cie Siyiex, pa mawh Cao Khrit, 3kraung laoh lie pingnya cuyi mai pa tawng khawmuik hoik mox ka daux Nawh heue. 4Aux ah nin, son ang pui tix kaux kawx sang pon pie pon lhen pex ka lox nyaw lox glaw heue. 5Viang aux tang ot khaing pex ka daux kaux nex nham, aux ot tau mai pex ka daux khuan, gaux rhawm mai yaox grawng pa chix ot pex mhawm mhawm, grawng kaux cong krax yum rhawm pex ka daux Cao Khrit heue.
Ju Pa Grum Naog Daux Cao Khrit
6Awm hoik rieb pex ti teei Yesux Khrit pa mawh Simiang, hu ka daux Nawh heue. 7Kieh koe riah mai kieh sum haok huan ka daux Nawh Cao, kieh krax yum rhawm pex kaux cong awm pa hoik gau ka pex, tau mai krax yaogyaw bwanson pa kreh heue. 8Rien rhawm tix ha kox sang koe pui tix kaux kaux pa sang nieb giex tix rhim pex, ka been nawh pie lhen pa ang koe bwanson, pa hawt been lox lao kawn pui, been haktiex pa ang grum naog, pa ang hawt Cao Khrit heue. 9Grawh grawng nawh ka daux Nawh Cao hoik ot pa grum naog Simiang Siyiex khawmuik ka daux riang pak peung tokaux, 10hoik kieh pex grum naog ka daux Nawh Cao, pa mawh simiang giex kaing mai sibrawm khawmuik, 11khawm ka daux Nawh Cao hoik pat hak pex, ka been pat hak pa ang yuh ka taix, ka daux pa peeik ti tik tokaux pa dex mai nex nham, ka daux pa pat hak Cao Khrit, 12kheu hoik sipaung pex tau mai Nawh Cao ka daux krax cubcom rawm heue. Ka daux krax cubcom rawm hoik deeh yaog pex kaoh tau mai Nawh Cao, kheu pa yum rhawm pex ka daux pa yuh Simiang Siyiex, Kaw pa kieh Nawh Cao deeh kaoh khaing krax yum heue.#Ro 6:4 13Pex pa hoik yum kheu phimap tix, kheu ang pat hak pa dex mai nex nham tix, Nawh Cao hoik kieh pex deeh im tau mai Nawh #Efe 2:1-5mai pluat ploi phimap ex khawmuik, 14hoik preet lai khaix taix been, pa koeng pa ang khaw ka ex, hoik teei an khaing sinax ex, tawk ka khaox lhak,#Efe 2:15 15khaix hoik peeik ti tik simiang giex kaing mai sibrawm khankix khaing tokaux tix, Nawh teei ti plak jhi khankix sidawng, yam pex Nawh ka piang kix kheu khaox lhak heue. 16Paw kieh pui tix kaux kawx prawng ca ka pex, grawng pa ih pa nyaux, grawng singaix pawie, grawng khix khraox, grawng singaix twah khankix,#Ro 14:1-6 17grawng ceu an mawh pang peue ceu pa tak sang hoek sax, viang mawh nan tokaux mawh cie Cao Khrit heue. 18Paw kieh pui tix kaux kawx pie lhen ti teei totaix pex khaing pex, kheu pa nieb yuh pa awn rhawm awn rhi, pa krub ka kawncau Siyiex khankix, pa ca keud grawng pa hoik yaox nawh, nieb kroh ti ting rhawm giex going kheu rhawm pa dex mai nex nham, 19ang giex tom cong ka pa mawh kaing, khaing Nawh pa mawh dee lih pon tawx riang ka tokaux khawmuik, kleuk paox tix tau ka jhong mai siniag khankix, haok huan ka pa kieh Siyiex haok huan#Efe 4:16 heue.
Yum Im Tau Mai Cao Khrit
20Phan pex hoik yum tau mai Cao Khrit khaing been haktiex pa ang grum naog khankix, pex lai ot awm pa kawn im ka daux haktiex, cu nghiet ka been khankix, 21Paw giex, paw cim, paw teeh, 22can ceu pa chix laux leeing ka pa shiao khawmuik, pa hawt lox tawm lox gau kawn pui. 23Ceu an khankix mawh ceu pa koe grang pingnya hawt ceu pa krub pa keud sipie tix, pa tiem rhawm tiem rhi, pa lak nieb yuh ka tokaux, ang koe bwanson tidtix ka pa ngah ka ceu pa yuh hawt alo nex nham heue.
Currently Selected:
KAWLAWSIE 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012