SAWLAMUN 4
4
Paox Moh Dud
1Paox moh aux eue, jhak heue maix mawh pa mhawm tai ti yaox. Jhak heue, maix mawh pa mhawm tai ti yaox. Maix koe ngai sikaux ka plak khaix man tie maix. Hauk kaing maix awm cub pex khankix tix cub, pa lih khaing piang gawng Gilat heue. 2Rhang maix jiet awm cub yung pa tak khraox krhip hauk tix mai pa tak hoek khaing heem ti rawm, pa chix keh kawn brawm ku mu mai pa neh ang lai koe daux sinax kix pie tix mu kawx heue. 3Siyieb jheeh maix jiet awm maox keei raoh gawng mai moing jheeh maix kawx mawh pa kied mhawm ti yaox heue. Baoh maix khawm ra plak pa koe plak khaix man tie maix mawh pa awm shiag plix khaox plix jiang heue. 4Ngawg maix mawh pa awm nyiex lhaong simiang Davit, pa hoik sum son nyiex deuh kraung naing khankix tix lhang, piang kix teuk teue ti priex kraung rhiem khankix mai mawh plah rhiem tiebtie pa shiao cub pui ting riang rao khankix heue. 5Teeih maix khawm ra plak awm kawn kiah iak ra mu, pa keh brawm miex kiah tix mu mai pa liang tix sinax pruh tai siyak khankix heue. 6Tom hoek bawg yam ang praix nyang riang mai ang veei nyang luan, aux tak sang yaog ti hu daux krax hu tix ka gawng Muran mai ka ton Lawban heue. 7Paox moh dud aux eue maix mawh pa mhawm tai ti yaox khawmuik mai dee pliag dee deen khankix kawx ang lai koe pie tix dah kawx piang kaux maix heue. 8Moeng aux eue, hoek tau mai aux khaing gawng Lebanon, hoek tau mai aux khaing gawng Lebanon, jhak ti yaox khaing dee choek gawng Amana, khaing choek gawng Shanira mai gawng Hamon, khaing daux doh rang ot sivai sangsi heue. Khaing dee choek gawng ot sivai heue. 9Maix hoik rhim ti teei rhawm aux, pux aux, moeng aux; maix hoik rhim ti teei rhawm rhi aux mai krax pa jhak tix ka ngai tix, tix bawg mai krax pa veeh tix maox soi ngawg cao tix, tix bawg heue. 10Krax moh maix mawh pa mhawm tai miex ding, pux aux, moeng aux, krax moh maix mawh pa nie lheu mhawm khaing rawm plix siiet miex ding mai pa nyawm bhawng sidah bhawng maix khankix, mawh pa nie lheu mhawm khaing sidah bhawng khawmuik heue. 11Moeng aux eue, siyieb jheeh maix jah rawm awm sigleem rawm hia, rawm hia mai rawm teeih koe greem dak maix mai pa bhawng kraung ceep maix kawx, awm pa bhawng gawng Lebanon heue. 12Pux aux, moeng aux, mawh sipeem pa hoik vie tix, rawm dung pa hoik tawb tix, rawm keut pa hoik tawk ti deuh cum heue. 13Pang khaox maix khankix plix khaox plix jiang, pa nyawm plix ti ih, khaox tai Hena pa nyawm bhawng mai pang khaox Nadu, 14khaox Nadu mai khaox Kurakuma, pang mex mai khaox caihung, khaox Lawban mai khaox Muran, khaox nyawng mai can pa kied bhawng khaing paox khaox tix khawmuik khawm leeing, 15dee lih rawm keut ka daux sipeem, mawh dee lih rawm im ju ka daux rawm daux mai rawm klawng iak khaing gawng Lebanon heue.
Bun Shulamix
16Bhaung plak laong khankix eue, siduad liak mai bhaung plak seh khankix eue, hoek liak, hoek ti phlu piang sipeem aux, sonsang pon tai nawh tix lih pa nyawm sioe bhawng heue. Kieh paox moh dud aux hoek ka daux sipeem nawh mai ih ka plix khaox pa nyawm pa tie khankix heue.
Currently Selected:
SAWLAMUN 4: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012