SAWLAMUN 2
2
1Aux mawh tai kat nghim klang haktiex Sharon mai tai siyak pa kuah daux ngawt heue. 2Awm pruh tai siyak daux sinax pang kat, paox moh aux sidawng daux sinax kawn bun khankix heue. 3Awm ot khaox plix kawk tie daux sinax pang khaox daux tiagtu, paox moh dud aux kawx ot daux sinax kawn simex khankix heue. Aux ngawm greem veei nawh, tau mai krax pa kied gaux rhawm tix mai plix nawh mawh pa tie pa nyawm ka aux heue.
Bun Shulamix Mai Bun Yerusaliem
4Nawh viex aux laig ka daux nyiex bang pawie mai kieh krax moh tix mawh man chix kheem piang aux heue. 5Baox naok riang aux ka blah plix siiet, deeh kieh aux koe riang rao ka plix khaox kawk tie, mawh kheu aux saux ngia jao krax moh heue. 6Taix khawn gwiex nawh, ot greem kaing aux mai taix khawn dawm nawh kawm ka aux heue. 7Kawn bun veng Yerusaliem khankix eue, aux tawm ti deuh lox ka pex, ka plak sivoe kiah cak khankix ang ah, ka krax pa sidaing meed ot ceu ankix ka daux tiagtu. Paw lai so kaoh rhawm paox moh aux mai paw kieh rhawm paox moh aux deeh siduad, tom hoek bawg yam koe krax pa nyawm rhawm nawh heue.
Pawie Khan Kheu Bun Shulamix
8Gumlox sikah paox moh dud aux! Jhak heue, nawh jao piang gawng phoh piang ton hoek heue. 9Paox moh dud aux mawh pa awm kiah phan ang mawh nan pa awm kawn cak mhaing awn ju tix mu, jhak heue, nawh cung ka plak khaix guh veng ex, nawh kok buan ti jhak plak daux diang siviex iak mai simi ti jhak plak daux sinax man tie siviex iak heue. 10Paox moh aux ah nin ka aux “Paox moh aux mai paox moh pa kied mhawm aux eue, yaog ti kaoh hu tau mai aux liak! 11Mawh kheu vong kwat praix hoik luan, vong raux praix hoik uik mai luan hu heue. 12Tai hoik pruh piang haktiex, bawg yam ah sim lox lai rhax hoik hoek mai lox kuh sikaux, hoik mhong ti ka daux haktiex ot ex heue. 13Plix khaox ruh klai hoik dex teem mai tai plix siiet hoik pruh mai tawx krax nyawm sioe bhawng tix heue. Paox moh aux paox moh pa kied mhawm grang aux eue, yaog ti kaoh mai hoek ka aux heue.” 14Kawn sikaux moh aux pa ot daux sinax rang simaox mai pa ot dee glip rang simaox, kieh aux yaox ka ngai maix, kieh aux mhong ka lox sikah maix, mawh kheu lox sikah maix mawh pa nyawm tie; mai ngai baoh maix, mawh pa kied mhawm ti yaox heue.
Cub Prie Nawh Khankix
15Giex sox praix son ex, kawn sox praix pa laux yuh nhu plix siiet mawh kheu nhu plix siiet ex khankix, kawn tak jah tix pruh tai heue.
Bun Shulamix
16Paox moh dud aux, mawh cie aux mai aux mawh cie nawh heue. Nawh liang cub yung tix ka daux sinax pruh tai siyak heue.
Son Paox Moh Dud Nawh
17Tom hoek bawg yam ang praix yang riang mai ang veei nyang luan, paox moh aux eue, deeh veeh tix ing awm kiah, phan ang mawh nan, awm kawn cak mhaing iak an, khaing piang gawng Beta liak.”
Currently Selected:
SAWLAMUN 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012