EFESUX 6
6
Kawn Praix Mai Miex Keeing
1Kawn nyawm khankix eue, nghiet lox miex lox keeing tix ka daux Simiang, kheu in mawh pa khaw caw heue.#Kaw 3:20 2“Yung yi ka miex keeing tix” pa mawh gumlox tawm pingnyap gum tix, tau mai lox mukheu heue. 3“Sonsang mhawm ka maix mai sonsang lang ju maix ka piang haktiex heue.”#Lih 20:12; Pi 5:16
4Keeing khankix eue, paw yuh ti kieh kawn pex song rhawm eei kix ting #Kaw 3:21 mai sivied ti gau mai sidiex ngoig nge ka kix ka daux pa khaw mai Simiang heue.
Siliex Mai Simiang
5Siliex khankix eue, nghiet lox kix pa mawh cao pex awm pa khaw mai nex nham, tau mai krax lhat graung, ka daux pa viex rhawm tix khawmuik, awm nghiet pex ka Cao Khrit. 6Ang mawh ceu pa yuh pa yaox ka ngai khaing, sonsang caw rhawm pui kah, viang mawh nan yuh awm siliex Cao Khrit, pa yuh hawt alo Siyiex khaing daux rhawm rhi heue. 7Viex rhawm pa mhawm ti yuh kaing pa cau pa soi, awm pa yuh son Simiang Siyex, ang awm pa yuh son kawn pui. 8Mawh kheu hoik tawng pex, grawng pui pa yuh ceu pa mhawm ceu pa yuh ka mawx ang ah, tak sang deeh pon awm an khaing Simiang Siyex, siliex ang ah, pui ploi ang ah,#Kaw 3:22-25 9pex pa mawh cao khankix eue, yuh ceu pa awm an ka siliex khankix, tik pa ah lox ghlat, kheu hoik tawng pex grawng Cao pex mai Cao kix pa ot ka daux meung raoma,#Kaw 4:1 ang jhak ka pakngai pui heue. #Pi 10:17; Kaw 3:25
Kraung Naing Cie Siyiex
10Dee ghoik mawh nin, kieh koe riang rao ka daux Simiang Siyiex mai ka daux riang rao siawp sibrawm Nawh heue. 11Ceep kraung naing Siyiex khawmuik, sonsang pon pex ti tiebtie ka jhawm lhak phicaox heue. 12Kheu pa ngah ex ang mawh ka nex nham, mawh ka simiang khankix mai ka siawp sibrawm khankix mai ka simiang giex kaing haktiex pa faik in khankix mai ka cub phicaox pa ot plak raoma khankix heue. 13Mawh kheu nan teei kraung naing Siyiex khawmuik, sonsang pon pex ti thang ka daux singaix pa caox an mai khaix hoik yuh khawmuik, kawn pon ti cung sijung heue. 14Mawh kheu nan cung heue, khaix hoik nhawt maox rawd nyoi pa mawh, pa mawh meh, #Isa 11:5ka nyoi tix, khaix hoik ceep kraung naing pa tie naok pa mawh pa rahsee, #Isa 59:17 15khaix hoik ceep kiep pa mawh ceu pa hoik rien tix sidiex lox bwan gaux rhawm pa nhim,#Isa 52:7 16lheu khaing ceu inkix teei kraung naing pa tiebtie, pa mawh krax yum rhawm, sonsang pon pex ti preet ka te ngu kaw pa caox heue. 17Teei mhok rhiem pa mawh ceu pa taoh,#Isa 59:17 vaig Khuan Cao pa mawh gumlox Siyiex, 18ca rawg bwan ku bawg yam, ka krax rawg mhaing khawmuik, ka daux Khuan Cao, pau ti jhak mai viex rhawm cong sijung mai rawg bwan, son pui singax singeh khawmuik, 19mai son aux, yuh ka mawx sonsang tawx pa chix ah lox ka aux, ka daux pa ang aux jheeh tix, sonsang chix viex rhawm kwa tix kieh tawng, grawng pa raux pa mox lox bwan gaux rhawm, 20Aux pa mawh pui pa yuh kaing tang, ka daux pa phyawk ka ceng. Rawg bwan sonsang pon aux ti viex rhawm kwa tix sidiex lox bwan an, awm pa khaw aux ti sidiex heue.
Lox ghoik Mai Nawb Bwan
21Kheu sonsang pon pex ti tawng grawng aux mai khawm pa yuh aux, Tukhik,#Cau 20:4; 2Ti 4:12 pa mawh puxaik pa moh mai pa mawh sara pa kaux sijax ka daux Simiang, tak sang kieh pex tawng ku ceu khawmuik. 22Mawh kheu grawng in aux hoik ploi nawh hu ka pex, sonsang tawng pex ka grawng yix mai sonsang kieh nawh pex nyawm rhawm kah heue. #Kaw 4:7-8
23Kieh pa nhim koe ka puxaik khankix mai krax moh tau mai krax yum rhawm pa kaoh khaing Siyiex Keeing Cao mai Simiang Yesux Khrit heue. 24Kieh bwanson koe mai kix khawmuik pa moh Simiang ex Yesux Khrit, ka krax moh krax rhawm ceu pa mawh tete heue. Amen.
Currently Selected:
EFESUX 6: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012