EFESUX 5
5
Hu Daux Krax Moh
1Mawh kheu nan kieh pex hawt jawh ti yuh pa yuh Siyiex, awm kawn praix pa moh khankix, 2hu ka daux pa moh rhawm, awm Cao Khrit kawx hoik moh ka pex mai hoik tawx tokaux tix son ex, ti mawh pa tan ka Siyiex, sonsang mawh bhawng pa sioe baux heue. #Lih 29:18 3Awm pa khaw mai pui pa singax khankix, ceu pa phit pa vao mai ceu pa ang singax khankix khawmuik. Pie pa ghoing pa simawd ka ceu in khankix kawx, paw doh kieh koe ka daux pex. 4Awm an ceu pa seeing brai, lox pa nieb ah, nieb naknon, pa mawh ceu pa ang khaw caw khankix paw kieh koe, yuh pa yaogyaw khaing pa yuh ceu an kix heue. 5Pex tawng mhawm mhawm grawng pui pa phit pa vao, pui pa seeing brai, pui pa ghoing, pa mawh pui pa krub riang grang, ang koe sin ka daux meung Cao Khrit mai Siyiex tix kaux kawx heue. 6Paw kieh pui tix kaux kawx teei lox pa giex going mai pie lhen pex kah, mawh kheu mawh grawng ceu in khankix ceu pa song rhawm Siyiex hoek ka piang kawn praix pa ang cu nghiet khankix heue. 7Mawh kheu nan paw kieh pex mawh pa rom tau mai kix,
Hu Daux Pa Riang
8Pex hoik mawh pa faik tix bawg, yam in pex hoik mawh pa riang ka daux Simiang, kheu nan hu awm kawn pa riang heue. 9Grawh grawng nawh plix pa riang mawh pa mhawm mhiem mai pa rahsee mai pa mawh meh ku ceu khawmuik heue. 10Ceu pa khaw caw mai rhawm Simiang Siyiex mawh pa yuh ka mawx cheu ti yaox, 11paw lai yuh paox pie ka kaing pa faik pa ang koe bwanson khankix, viang mawh nan ne raw ka kix khaing pa yuh nan. 12Grawh grawng nawh ceu pa moh kix ti yuh dee glip, pie pa phaw grawng khankix kawx mawh ceu pa kaig tua heue. 13Grawng pa sidawng phimap ku ceu khawmuik, mawh kheu pa riang, grawh grawng nawh, ku ceu sidawng kheu pa riang heue. 14Mawh kheu nan Nawh Cao hoik ah nin, “Kaw pa laig it eue, siduad heue. Mai kaoh im khaing krax yum mai Cao Khrit tak jhan riang ka piang maix heue.”
Hu Daux Pa Koe Pingnya
15Mawh kheu nan rien rhawm tix ka grawng pa hu pex, paw kieh awm pa ang koe pingnya, viang mawh nan kieh awm pa koe pingnya, 16mai taoh ka bawg yam, #Kaw 4:5mawh kheu singaix in khankix mawh pa caox heue. 17Mawh kheu nan paw vi mawh pa daox aw, viang mawh nan kieh mawh pa chix tawng grawng alo Simiang mawh pa yuh ka mawx heue. 18Paw kieh yoek ka plai rawm plix siiet, pa nieb chix kieh luan yuh cuci, viang mawh nan kieh naog ka Khuan Cao, 19sikah ka paox tix, tix kaux lai tix kaux ka daux lox yaogyaw mai lox rhax lai, lox rhax bwan mai yuh lox pa mhawm rhawm pex ka Simiang Siyiex, 20mai yaog yaw son ku ceu khawmuik ka keeing Siyiex jheung jheung, ka daux ceu kaux Simiang ex Yesux Khrit #Kaw 3:16-17heue. 21Pex tix kaux lai tix kaux ot greem paox tix ka daux ceu pa lhat ka Cao Khrit heue.
Mex Kiex Moeng
22Moeng khankix eue, kieh koe krax cu nghiet ka mex tix,#Kaw 3:18; 1Pe 3:1 awm koe ka Simiang Siyiex awx. 23Grawh grawng nawh, mex mawh kaing piang moeng tix, awm Cao Khrit kawx, mawh kaing ka piang ceu cao, tokaux Nawh pa mawh Cao Taoh ka tokaux heue. 24Mawh kheu nan awm cu nghiet ceu cao ka Cao Khrit, kieh moeng khankix koe krax cu nghiet ka mex tix ka daux ku ceu heue. 25Mex khankix eue, moh ka moeng tix,#Kaw 3:19; 1Pe 3:7 awm moh Cao Khrit ka ceu cao, tawx tokaux tix son ceu cao, 26sonsang kieh Nawh ceu cao singax, hoik sigrah ceu cao ka daux rawm mai ka gum lox, 27sonsang pon tawx Nawh ceu cao pa koe min pakngai ka tokaux tix, pa ang koe dee pliag dee deen mai ang koe pa awm an tix ceu kawx, sonsang mawh ceu cao pa singax pa loig heue. 28Awm an mex khankix kawx khaw ti moh ka moeng tix awm moh ka tokaux tix heue. Kaw pa moh ka moeng tix moh ka tokaux tix heue. 29Pui tix kaux kawx ang sax koeng ka nex nham tokaux tix, nawh kia ngien kah, awm kia ngien Cao Khrit ka ceu cao, 30kheu mawh ex kraung pakpeung ka tokaux Nawh Cao heue. 31“Mawh kheu grawng in simex tak prah miex keeing tix mai ot tau mai moeng tix, kiex ra kaux tak mawh nex nham tix mu khaing heue.”#Jah 2:24
32Grawng in mawh pa kied ting raux, aux sang krai ka grawng Cao Khrit mai ceu cao heue. 33Pex kaux pui mawx kaux pui an tak lai moh ka moeng tix awm moh ka tokaux tix, kieh pa mawh moeng yung yi ka mex tix heue.
Currently Selected:
EFESUX 5: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012