Matye 4
4
Sutanaw n Zyezu kárima n fɔ̀rɔ
(Mar 1:12-13; Luk 4:1-13)
1 #
Heb 2:18; 4:15 Koro kàdoʔo ma a Pìicǎnni Zyezu tórigo fìími tára ni, jàngó Dàzɔɔnw í sa wi kárima bi wéle. 2A wi súnw le n taa canya togoye siin ní yébiliye togoye siin, a kateegi náà wi jáa. 3A Syɛɛnkárimacow pan wi ma n baa wi pye: «Kapye mɔ wi nyɛ Kolocɔlɔɔ Jáaw, mi kàdɛnɛri naa pye di kàri búru.»
4 #
Làlw 8:3
A Zyezu wi yari: «Ki n sɛ́bɛ níì jo:
‹Syɔɔn a gbǎn sìíw taa búruw lìile yagana na í,
fwɔɔ syɛ́ɛnree myɛ di yirigi Kolocɔlɔɔ nyɔ́ɔgi ni lè,
toro bárigaw ni syɔɔn a sìi taa.› »
5A Dàzɔɔnw fala n wi tórigo kècǎngi ma n sáà wi lúrugo kpɔ̀ʔɔrɔli kpaʔa tɛɛtɔnɔgɔ njoʔo ni, 6#Ŋún 91:11-12 níì wi pye: «Kapye mɔ wi nyɛ Kolocɔlɔɔ Jáaw, mi kòro nɛɛ, mí ye mi too tári na. Níì cán ki n sɛ́bɛ níì jo:
‹Kolocɔlɔɔ a mɔ kéeli joo bi gbàn wi tundunbèle ma
pe mɔ tɔʔɔ cò be kɔ́yi ni,
jàngó mɔ tɔ́lɔgaa a kɔ́ círi kàdɛnɛgaa na í.› »
7 #
Làlw 6:16
A Zyezu wi pye: «Ki n wɔ́ɔ̀ sɛ́bɛ níì jo: ‹Ki ga yɛlɛ mɔ í kɔ́ mɔ Kafɔw Kolocɔlɔɔ pye wéle í.› »
8A Dàzɔɔnw níì wi kɔ́ri n sáà lúrugo nyanbe-nyundɔnɔgɔ na níì dulunyanw fànya myɛ tɛ̀ɛn wi na ní yi nìjanri ní. 9Níì wi pye: «Mɔ ga fɔ̀lɔ n kpùmɔnɔ mii taana níì mii kpɔ̀ʔɔrɔ, mii a yáriri naa myɛ kaan mɔ ma.» 10#Làlw 6:13 A Zyezu wi yari: «Núngo mii taana, Sutana. Níì cán ki n sɛ́bɛ níì jo: ‹Maa mɔ Kafɔw Kolocɔlɔɔ kpɔ̀ʔɔrɔ́ máā woro nibin fáliw kpéʔele.› »
11Lǎli bee ni a Dàzɔɔnw wi yaʔa níì kári. A nyɛ̀ʔɛni tundunbéle pan n baa wi dɛ̀ɛmɛ.
Zyezu n wi fáliw séli Galile ni
(Mar 1:14-15; Luk 4:14-15)
12 #
Mat 14:3; Mar 6:17; Luk 3:19-20 A Zyezu ga gi lóʔo pe n Zyan cò n le kàsow ni, a wi kári Galile tári ma. 13#Zyan 2:12 A wi ga yiri Nazarɛti ni, a wi pan n baa kòro Kapɛrinayumi ni, ki lè lòkpɔɔgi nyɔ́ɔ na Zabulɔn ní Nɛfitalii tɛ́nɛmi ni, 14jàngó syɛ́ɛnri í foro dee kanyaajoow Ezayi da joo lè níì jo:
15 #
Eza 8:23—9:1
«Zabulɔn tári, ní Nɛfitalii tári,
di lè Zyuridɛnw jelige na,
lòkpɔɔgi kólogo nyɔ́ɔ na,
Galile tári, di lè Syɛɛnfeleyi tára,
16syɛ́ɛnbèle be nyɛ lè wodɛ́ɛnbéle ní yébilimi ni,
pe n gbɛ̀ɛngbɔɔmɔ nyaa.
Ní bele be tɛ́ɛn lè kùúw tɛ́ʔɛ ni,
ní wi nyínmi láara ni,
gbɛ̀ɛ́nmi n yiri n nan bele bee na.»
17 #
Mat 3:2
Lǎli bee ni, a Zyezu fala n gi séli ni nyuu syɛ́ɛnbèle ma níì jo: «Ye kàdoʔo wáa ye kapeegèle ma, níì cán nyɛ̀ʔɛni fànʔa n nùuni.»
Zyezu n cɔ̀ɔwaabéle sicɛrɛ yeri
(Mar 1:16-20; Luk 5:1-11)
18A Zyezu ga ni nyaari ni sɔ̀lɔ́ Galile lòkpɔɔgi nyɔ́ɔ na, a wi nànbēle siin nyaa, poro be nyɛ Siimɔn, wee be yiri lè Pyɛri, ní wi cɔnɔw Andire. Pe maa ni cɔ̀ɔ wáa lòkpɔɔgi ni, ncan pe maa pye cɔ̀ɔwáabéle. 19A wi be pye: «Ye taʔa mii na, àmɛɛ yele cɔ̀ɔ́w wáa ni fábèle taagi lè, ànbée mii a wɔ́ɔ yele kpéʔele yele í da syɛ́ɛnbèle taagi.» 20A be fala n be cɔ̀ɔ́bèle yaʔa terire níì taʔa wi na. 21A Zyezu ga níì sɛ̀ʔɛrɛ yɛʔɛ̀ ma cɛɛri, a wi níì nǎnbèle pèle siin nyaa, wàa ní wi cɔnɔɔ, poro be nyɛ Zyaki, wi lè Zebede jáaw, ní wi cɔnɔw Zyan, pe maa pye be kɔ́rɔw ni ní be tóow Zebede ní, ni be cɔ̀ɔ́bèle sámagi. A wi be yeri. 22A be fala n kɔ́rɔw ní be tóow yaʔa terire níì taʔa wi na.
23 #
Mat 9:35; Mar 1:39 A Zyezu i syée Galile tɛ́ɛyi myɛ ni n sa ni be tama be sérikpaayi ni, ní i Kolocɔlɔɔ fǎngi syɛɛnjóocànra nyuu syɛ́ɛnbèle ma, ní wɔ́ɔ i yáami féleye myɛ láari be na. 24A be wi kéeli jáari Sirii tári myɛ ni, a syɛ́ɛnbèle i maa wi ma ní yáami féleye fɔɔlɔ, ní wɔʔɔli féleye syɛɛnnɛ myɛ ní, n náà fàra màdebèle fɔ̀ɔlɔ, ní záanni fɔ̀ɔlɔ, ní syɛɛnmɔngɔbèle na, a wi ba ni be poori. 25A syɛɛnnɛʔɛmɛ yìri Galile ma, ní Dekapoli tɛ́nɛmi, ní Zyerusalɛmi, ní Zyude tári, ní Zyuridɛnw jelige na n baa taʔa wi na.
Currently Selected:
Matye 4: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.