Matye 3
3
Zyan Batisiti maa ni Kolocɔlɔɔ syɛ́ɛnri nyuu
(Mar 1:1-8; Luk 3:1-18; Zyan 1:19-28)
1Lǎli bee ni a Zyan Batisiti pan n ba ni nyuu Zyude fìími tára ni, 2#Mat 4:17; Mar 1:15 níì jo: «Ye kàdoʔo wáa ye kapeegèle ma, níì cán nyɛ̀ʔɛni fànʔa n nùuni.» 3#Eza 40:3 Wee kéele kanyaajoow Ezayi da joo lè, woro wi nyɛ Zyan. Ezayi maa gi joo níì jo:
«Wàa i yákpolo wáa fìími tára ni, ni gi nyuu níì jo:
‹Yaa Kàfɔw kólogo sámagi yáā wi kozɔ̀lɔyi síngi.› »
4 #
2Fàn 1:8
Zyan búrogi maa pye a be gi tìin ní fàlibaʔa síire ní, saliga sɛntiiri si i nyɛ wi na wobwɔɔɔ ní sárigèle ni. Wi yaliiri ti da pye kúdow ní tiiweeyi sárigā. 5Lǎli bee ni a Zyerusalɛmi kěgi syɛ̀ɛnnɛ, ní Zyude tári myɛ, ní Zyuridɛnw tɛ́nɛmɛ syɛɛnnɛ myɛ i yirigi ni syée wi ma. 6A wi sa ni be batize Zyuridɛnw cábiga ni. Pe si maa ni yèré be kapeegèle ni.
7 #
Mat 12:34; 23:33 A wi ga Farisibèle ní Sadusebèle pèle saʔa nyaa a pe i maa woro ma, woro í ba be batize, a wi be pye: «Yele màátɔnw jàala, wìí wi yele sàmi níì jo yele í fàn fundanʔari na dee di maa lè? 8Koro na kapyegèle ke a gi tɛ̀ɛn yele n kàdoʔo wáa yele kapeegèle ma lè, yaa gele bee kpéʔele. 9#Zyan 8:33 Yele a kɔ́ ra gi sɔ̀ngí yele fúnyi ni bi jo, Abirahami wi nyɛ yele tóow í. Níì cán mii a gi joo yele ma, Kolocɔlɔɔ fánʔa i nyɛ bi gbǎn kàdɛnɛri naa kàriga taa pìibēle sii be pye Abirahami wòolo. 10#Mat 7:19 Ye wéle, pe n kpánagi tɛ́ʔɛ n kwɔ́ɔ tíiyi taana. Koro na tiige o tiige gi lè ki o yasanjanra sangi í, pe a gi kpúmɔn wáa náagi ni. 11Mii tɔ̀nɔ́ i yele batize lǒgi ni kàdowaari kéele na kapeegèle ma. Kàjáa wee wi maa mii kàdoʔo ma lè, wi séew n kpɔ́ʔɔ n sɔ̀lɔ mii wów na. Mii ga caa wɔ́ɔ̀ nyɔɔ n yɛlɛ bàā wi taʔalayi có í. Woro wi a ba ra yele batize ní Pìicǎnni, ní náagi ní. 12Wi ségbanni i yaà wi kɔ́gi ni. Wi a wi yaliiri sámaga pɛ́ɛ wi kàsyɔɔgi na si di fɛɛ bi sa kɔn wi gbòdunni ni, si yaliisigiri le bànvigi náagi ni bi di sórigo.»
Zyezu batɛmiw kpéʔelele kéele
(Mar 1:9-11; Luk 3:21-22)
13Lǎli bee ni a Zyezu yìri Galile ma n pan Zyuridɛn ma Zyan ma, jàngó wi ba woro batize. 14Kàjáa Zyan ga fɔ̀lɔ gi na í, níì jo: «Mɔ wi yɛlɛ bi mii batize, á mɔ si níì pan mii ma!» 15A Zyezu wi yari: «Mi fɔ̀lɔ gi na tɔ́ɔliw ni, níì cán kánmi bee na wolo yɛlɛ wolo í gi kpéʔele bi sínni kèlē myɛ foro.» A Zyan náà fɔ̀lɔ gi na. 16A Zyezu ga batize n kwɔ́ɔ níì yiri lǒgi ni terire, wéle, a nyɛ̀ʔɛni fala n múgu, a wi Kolocɔlɔɔ Pǐli nyaa li i tíri ni maa wi ma àmɛɛ kàtolo nyɛ lè. 17#Sél 22:2; Ŋún 2:7; Eza 42:1; Mat 12:18; 17:5; Mar 1:11; Luk 9:35 A be yákpolo lóʔo nyɛ̀ʔɛni na, a li jo: «Wee naa wi nyɛ mii Pìinidaanmaw, wee kéele li mii dɛ́nɛ lè gbanʔama.»
Currently Selected:
Matye 3: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.