Malasyii 1
1
1Joogbanna, Yawe syɛ́ɛnri n sɔ̀lɔ Malasyii ma n nan Isirayɛli ye na.
Isirayɛli Yawe nyɛ́nɛ n wòlo
2 #
Wɔr 9:13
Yawe n jo: «Yele kéeli n mii dɛ́nɛ. Kàjáa yele i gi nyuu níì jo: ‹Nyàʔá ki gi tɛ̀ɛn wolo kéeli n mɔ dɛ́nɛ?› Mii Yawe n jo, Ezau da pye Zyakɔbi senyɛnnɛ ì? Bi gi taa Zyakɔbi kéeli n mii dɛ́nɛ, #Eza 34:5-17; 63:1-6; Zyer 49:7-22; Ezek 25:12-14; 35:1-15; Am 1:11-12; Abi 1-14 3á Ezau kéeli si mii bɛɛn, mii n wi nyanbeleyi kàriga tɛɛ̀kalagiya, n wi kɔ́rigi kaan fìími tára gbàāya ma. 4Edɔmi ye ga gi joo níì jo: ‹Pe maa wolo kálagi, kàjáa wolo a ní gurubɛɛri faan bi yìrige!› » Yawe wi lè Nyɛ̀ʔɛni Sùlasiibéle Kafɔlɔ, woro wi syɛ́ɛnri naa joo níì jo: «Ki n yɛlɛ pe di faan, mii a ní di ŋɔrigɔ cáan, pe a ra be yiri ‹Péemi tásaliga› ní ‹syɛ́ɛnbèle bele kurugo Yawe fúngi tɔ̀nɔ n tanʔa lè gi kòro nya làla o làla.› 5Yele nyapiigèle a gee bee nyaa. Yele tiimaa a gi joo si jo: ‹Yawe n tɔ̀nɔ n kpɔ́ʔɔ n Isirayɛli tásaligi jeli.›
Kpɔ̀ʔɔrɔli li lè li ga yɛlɛ Yawe ma í
6«Jaafɔlɔ i wi toò kpɔ́ʔɔgi, a falipyenàɔn i wi kàfɔlɔ kpɔ́ʔɔgi. Mii si ga pye Tofɔlɔ, kpɔ́ʔɔri di yɛlɛ mii na lè, sán di nyɛ? Mii ga pye Kàfɔlɔ, sán mii yɛ́ɛgi fyáara nyɛ?» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. «Yele sáriga-wòlobèle má mii nyuu, yele bele ye mii mɛ́ɛgi faari lè, yele i gi nyuu níì jo: ‹Nyàʔá wolo kpéʔele n mɔ mɛ́ɛgi faʔa?› 7Yele i maa ní yalii-nɔ́nʔɔri ní n ba ni taari mii sáriga-wòlo-yafaangi na, ní si i gi nyuu níì jo: ‹Nyàʔá wolo kpéʔele n mɔ nɔ́nʔɔ?› Koro gi nyɛ ncan yele i gi nyuu níì jo: ‹Yawe tàbaliw n yɛlɛ wi córo yafaʔaga!› 8#Làlw 15:21 Yele ga pan ní yaweelaa ní n baa wòlo sáriga, lee li fùn lè, gee bee o nyɛ kapeʔe ì? Yele ga pan ní tɔgalagiya wólo wàlá woyáala ní, gee bee o nyɛ kapeʔe ì? Mɔ mi loro làa kaan mi wéle mɔ tári fɔ́lɔ ma dɛ! A wi a mɔ kéeli kpɔ́ʔɔ lé? A wi a mɔ sámaga cò lé?» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.
9Koro na tɔ́ɔliw ni, ye Kolocɔlɔɔ nyɛ́ɛri, koro ga pye wi nyinimɛ taa wolo na! Yele ye koro kpéʔele, a wi si a yele sámaga cò lé? Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. 10«Koro na wìí wi nyɛ yele ni, wee wi a kɔ̀riyi tɔ́n lè jàngó yele a kɔ́ ra náagi nii mii sáriga-wòlo-yafaangi na gbanzan í? Yele kéeli ga tɔ̀nɔ n mii dɛ́nɛ í.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. «Mii a yakanʔa syɔɔ yele kɔ́yi ni í! 11Níì cán n séli canʔafolomɔ ma n sáà nan canʔajeemɛ na, mii mɛ́ɛgi n kpɔ́ʔɔ syɛɛnfeleyi nínge ni. Pe i nùndaanni yáriga sórogi tɛ́ɛyi myɛ ni mii mɛ́ɛgi kpɔ̀ʔɔrɔlɔ kéele na, pe i maa ní fɔɔnrɔ fun yakaanyi ní mii ma. Níì cán mii mɛ́ɛgi n kpɔ́ʔɔ syɛɛnfeleyi nínge ni.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. 12«Kàjáa yele ye gi nɔ́ɔri, ní si i gi nyuu níì jo: ‹Kàfɔw tàbali n nɔ́nʔɔ, dee di yìrigí wi ma lè, ti n yɛlɛ bi córo yafaʔaga.› 13Yele wɔ́ɔ i gi nyuu níì jo: ‹Fɔ̀rɔgi wéle dɛ!› Yele n wi kpéʔele yafaʔaga.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya. «Yele i maa ní yaweegèle ní, gele be yùu lè, ní gele tɔ́lɔyɔ yi kálagi lè, wàlá gele ge yáa lè wɔ́ɔgēle. Yakaanyi bee ní yele maa! A mii a yakaanyi bee syɔɔ lé yele kɔ́yi ni?» Yawe wi jo nya. 14«Námarafɔwee má yaweepɔlɔ nyɛ lè wi yaweeri gboolo ni, á wi nyɔɔfaliga kpéʔele Kàfɔw ma, níì gi wòlo ní tɛɛ̀kalagila yaweele ní, wi n yɛlɛ wi dánga. Níì cán mii i nyɛ fànʔafɔgbɔɔɔ.» Yawe wi lè Nyɛ̀ʔɛni Sùlasiibéle Kafɔlɔ woro wi jo nya, «mii mɛ́ɛgi i nyɛ fyáara yáriga syɛɛnfeleyi nínge ni.
Currently Selected:
Malasyii 1: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.