2 Timoteo 3
3
Uvë Mung'ë a Matiku a Umpeo
1Ëgweeso veve manya ërëë, mwino mu matiku a umpeo gujie udwëëra matungo a holota. 2Gusoko antu vinjë giyanja aghonjo, vinjë uyanja hela, anyagëdida, anyagijaghumbua, atukani, antu në vëtivakuriye afafi vawe, në vëtina irumbi, antu në vëtina ikuryo kunë Muungu. 3Antu në vëtina untu, vëtiufenja uvaonea uvavi antu vangëja, anyauregheegheya, antu në vëtigibalëtë aghonjo, akharë, nëvëhwëtë uja. 4Antu në ahongeeri, nëvëtikeere antu vangëja, në vëgikumajua, në vëyanjëtë uja ukëra umuyanja Muungu. 5Veeso vina wikhori wa antu në veru ëgweeso vëukhana nguu ya Muungu. Rekanuka na antu mwino vasaa. 6Gusoko mukhatë a veeso unë avoo nëvëgingëa mu makhaya a antu na uvahora gënya antu në atughwa akhema në afutu, nëvënempewe na mahutye awe na uvayaghaya gwa nkümbü hiya hiya. 7Akhema avaa vëufenja gësëya ufuma u muntu gëkaku na kamwe vëtiufikëa umanyi wa tutë. 8Mwino Janesi nanë Jamburisi nëvëgamufënga Musa, uvii antu avaa noo vëumëfëngaa tutë, antu në ihaa rëruvekie na veeso tutë vague mu uhuvëi. 9Ëgweeso veeso vëtiufika kurungë, gusoko ufutu wawe winjë utënda wë daaji gwa antu voong'e, mwino uroo wa aghosya avoo në vavëë.
Faulo Gikhwanëyo ga Uduvi kunë Timoteo
10Ëgweeso veve wahongie mas'eyo ane, mwenendo wane, na ilengo rane ra uduvi, uhuvëi wane ughimu wane, na ughimu na ukhamu. 11Malwe na makhasëko ane, mantu nëang'angie kuuko Antiokia, Ikonio na uListira na mu malwe nënayaghiimëëye na Müküü agantyoa na asaa oong'e. 12Tutë antu voong'e unë vëufenja uduva uduvi wa gëmuungu mukhaya amwa Kiristo Yesu, antu vëjie uvakhasya. 13Ëgweeso antu në avë nanë antu nëvëughemaa weegheeghe vëufwaghëëra utendeka avë itiku gwa itiku. Veeso vëuvakhonga antu na antu vangëja vëuvakhonga na ukhongwa.
Maandëko
14Ëgweeso mwino kunë veve, fwaghëëra ukwatëëra mantu asaa mwino antu vagusëiye veve na mwino veve wahuvëe. Veve noo umanyie në va yanyu nëvagusëiye veve mantu ayaa. 15Gusoko ufuma ung'ënya wako veve umanyie Maandëko në Meru unë ina udaho wa ugutongeera veve uhange utyoi gwa umuhuvëa Kiristo Yesu. 16Maandëko oong'e Muungu wayaehere nkhoo a ufanga mukhatë ayo. Ënoneye uyatumëa gwa usëya, gwa uvakenea antu, gwa uvaghoora na gwa uvasëya mu tutë. 17Uvii atumami va Muungu vëukhondekeka mu udaho woong'e nanë usëywa utenda ntendo yoong'e në njija.
Currently Selected:
2 Timoteo 3: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.