2 Timoteo 2
2
Timoteo Muhongi në Muhuvëi wamwa Kiristo Yesu
1Veve mwanane, utende wina nguu mung'ë a mboto në ëmukhatë amwa Kiristo Yesu. 2Na asaa nëwayatëgheeye ufuma kunë nene usonge a masudanga vingë, vafe antu në ahuvëi, në vëudaha uvasëya antu vangëja. 3Khuvëa mu makhasëko mwino musikee në muja wamwa Kiristo Yesu. 4Gutie musikee në ugitumaa mwëmo wakwe wa usikee nëugihangënkhania mu mantu a uduvi wa antu nëti asikee. Gusoko ndolyo akwe nëumuyanjisya muntu uyoo unë wamwandëkie mwëmo wa usikee. 5Muntu nëuginisya winisyo wa umanka atiuriechwa ngaa faka mweeso nëwahuma gwa uhonga seria yoong'e. 6Në murëmi nëugurëmaa gwa nguu unë unoneye ula nkhari ya mwandyo ya u muunda wakwe. 7Ghemanëya nanguu në nene nguhanya, gusoko Müküü ugugufa veve umanyi mu mantu oong'e.
Kiristo Yesu në Gikhwanëyo në Gëja Go
8Mukumbukwe Yesu Kiristo, nëwafëtiywe ufuma gwakuyi, nëwafafiwe ufuma ufafo wamwa Daudi, mwino sayu ane në njija eguhanya. 9Sayu Njija në nene ngukhasiwaa na nguyaa mëkhova mwino muhutii. Ëgweeso ukhani wa Muungu utiudaha utungwa na mëkhova. 10Gusoko ësëë nene ngughimëëyaa mantu oong'e në makaku gusoko a antu nëvahwaniywe. Uvii veeso noo vëdahe uhanga utyoi ufuma kunë Kiristo Yesu itambëëmwe na uküü nëutina mpeo.
11Gusoko murighëëtyo uruu wa tutë:
Nësa gwadahie ukuyaa itambëëmwe na
mweeso, sese gwinjë noo
uduva itambëëmwe na mweeso.
12Nësa sese gufwaghëëra ughimëëya,
sese gwinjë noo gibala itambëëmwe na mweeso.
Nësa sese gumukhana mweeso,
mweeso noo winjë ukhana sese.
13Nësa sese gutiuhuvëe,
mweeso winjë ufwaghëëra utenda muhuvëi,
gusoko mweeso atiudaha gikhana mughonjo.
Mutëndi Mwëmo Nëugumuyanjisyaa Muungu
14Vakumbukëye veeso mantu ayaa, na uvaraghëëya veeso usonge a Muungu vëkhondye gikhuva gwa nkhani. Nkhani mwino yasii itikweti ryana mbanduvë, ëgweeso gutufu yiuvavaryaa antu nëvëutëgheeya. 15Ikunkunyaye giraghëëra mughonjo kunë Muungu mwino muntu nëunoneye, mutenda mwëmo unë atiufenja givirya mënyaa. Sëya vija ukhani wa tutë. 16Ineghe na murighëëtyo në wa gëfutu në ti wa dini, gusoko vinjë ufwaghëëra ino mu uvë. 17Na murighëëtyo wawe winjë uvalya gwa njëa në ikwëte na mudusyu. Mukhatë a vasaa në Himenayo na Fileto. 18Veeso vayaghae ufuma u tutë gwa ukwatëëra mwino ufëtyo wa akuyi wakeire. Veeso vëukhundughusya uhuvëi wa antu vangëja. 19Ëgweeso musiingi në ukhamu wa Muungu, wina gëmanyëko chëëkë: “Müküü uvamanyie antu vakwe,” na “Vasaa unë vëurëtaana rina ra Müküü inoneye vëfentuke kurengë ufuma utenda në mavë.”
20Mung'ë a nyumba në nküü tiese gwina maifee a sahabu na hela gutufu, ëgweeso angëja a mëtë na angëja a irongo, angëja ina ikuryo na angëja itikweti. 21Nësa muntu woong'e ugioya mughonjo ufuma u asaa nëamënyaa, uvii mweeso winjë utenda gëfee gusoko a utumami wa ikuryo. Na utumëwa na müküü wa nyumba, wighondanëye gusoko a mwëmo nëuja. 22Uvii itëje nkumbu yoong'e ya ubalanda. Tendeka wë muhuvëi, wina uyanjo nanë majëghana. Veve inoneye utende vii itambëëmwe na voong'e avoo unë vëumurombaa Muungu ufuma unkhoo në njeruchwë. 23Uhite sang'ida ya gëfutu, nëëtikweti ryana mbanduvë. Veve umanyie mwino sang'ida yasii yiusachaa wikhuvi. 24Mutumami wa Muungu inoneye atatendee mwikungumi, ëgweeso atende gwa a antu voong'e, nëudahëte usëya, na mughimu. 25Mweeso uguaghoraa avoo nëvëufëngaa. Muungu udahëtë fangëja uvafa veeso iyoma ra ufea na umëmanya tutë. 26Na veeso vëdahe ginegha ufuma u mutegho wamwa ibilisi, nëvatungiwe na mweeso vëtende mafenji akwe.
Currently Selected:
2 Timoteo 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.