2 Akorinto 3
3
Atumami va Iraghano në Ifya
1Sese gwandya kangë ugikumajua aghonjona? Mba sese gufenja, mwino antu vëgëtunga vëutendaa, keeti ya ukumwu kunë sese mba ufuma kunë nyenye? 2Nyenye aghonjo mwë keeti itu a ukumu, nëyiandëkiwe munkhoo yitu, gwa antu voong'e umanya na usoma. 3Na nyenye muraghëëra mwino mwë keeti ufuma kunë Kiristo në sese gwamëtumie, në sese gwamëdwëëye. Kiristo wamëandëkie gwa Mwahu wa Muungu në mufanga, ti gwa wino. Mweeso wamëandëkie munkhoo ya antu, ti gunto a mbao ya magwe.
4Uruu në udaho në sese guukweti ukëërëa kunë Kiristo usonge a miho a Muungu. 5Ti ëse sese gwina udaho aghonjo wa uhanya intu gëkaku, mwino ufumie kunë sese. Udaho witu ufumie kunë Muungu. 6Në mweeso [Muungu] unë wagufie sese udaho wa utënda gwë atumami va iraghano në ifya. Ëyëë ëtiandëkiwe mu keeti ëgweeso gwa Mwahu Mweru. Gusoko andëko rëgwetaa ikuya, ëgweeso Mwahu Mweru ugwetaa ufanga.
7Itungwee nesa iramwuwa ra ukuya, nënaa rëandëkiwe gunto a magwe, rajie gwa weru üküü uvii va Isiraeli vinadaha uwurarava usyu wamwa Musa gusoko a weru wayo nëugufimpëna, weru nënaa ugukëra, 8uvii mwëmo wa Mwahu wa Muungu winjë gweta weru në uküü nanguu. 9Gusoko nësa naa gwina weru mung'e a mwëmo wa ikuya, mwëmo wa tutë ugunankëa uroo gwa weru. 10Tutë, gwa ërëë, ëroo unë khae arë rina weru rajie utendeka rëtina weru mba nduvë, gusoko a weru uroo nëunankëe. 11Gusoko nësa ëroo nërëukëra rajie itambëëmwe na weru, ëroo nërëtiukëra inoneye rëhange weru nanguu.
12Sese gutigoghofa urighëëtya gusoko gwina ighonje. 13Na sese gutiutënda mwino Musa unë naa ugurya sela gusyu wakwe gusoko va Isiraeli vëtadahe goona mpeo a weru nënaa ugukëra. 14Ëgweeso Muungu watendie mahaa awe ëtënde mafutu; gusoko faka rëo ëyëë, itungo në veeso vëmutegheeye muntu ugusoma iraghano ra khae, intu rërëfo në kee rëuvaghiiya veeso vëkegona. Gusoko gwa ukhuvëa itambëëmwe na Kiristo intu ëroo nërëuvaghiiya vëkegoona rëuheywaa. 15Nhaa, faka rëo ëyëë, itungo në veeso vëtëgheeye muntu ugusoma Seria amwa Musa sela kë ëkunëkëe mahaa awe. 16Ëgweeso në gwa muntu umwifetukëya Muungu nëëgutëndaa sela ësëë ëhëywe. 17Itungwee Müküü në Mwahu. Na fana Mwahu wa Muungu urëfo, faafo gwina uhaghaaro. 18Na sese soong'e, itambëëmwe na usyu nëutina sela, antu vangëja vëudaha goona mukhatë itu weru wa Mukuu. Mwahu wa Muungu ugugukhanëkëya sese gutënde mwino mweeso. Sese gutëndeka gwë veru nanguu. Gusoko uruu unë mwëmo wa Mwahu wa Müküü.
Currently Selected:
2 Akorinto 3: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.