2 Akorinto 2
2
1Nene naramue munkhoo ane ntanje kunë nyenye kangë gwa umutenda nyenye muhange uvavi ungëja munkhoo. 2Gusoko nesa nene naa ngumusacha nyenye muhange uvavi, naa uguwura muntu mba umwe wa untenda nene neyanje, gusoko ne nene në namutëndie nyee muhure. 3Soko në antendie nene nëandëke keeti asëë naa gusoko itungo në nene naja umusoya kangë ntahange uvavi ufuma gwa avoo unë naa veudaha untenda nene neyanje. Gusoko nene nëmanyie vija mwino në nene nayanja, uvii nyee nyoong'e muyanja noo. 4Nënaa nene ngwandëka keeti asë, nene naa nina makhasëko makuu na naa nitegheeye uvavi uküü munkhoo. Na itungo nënaa nene ngwandëka naa nëkutie ino. Naa ti umutenda nyenye muside, ëgweeso na umutenda nyenye mumanye mwino nene arë nëmuyanjëtë ino.
Umwonea Uvavi Muhutii
5Ëgweeso nësa muntu woong'e mukhatë anyu wendie umutënda nyenye muside, mweeso inatendaa wuu kunë nene, ëgweeso gwa uvaru ungëja wamuhurisiye nyenye nyoong'e. 6Ikuurëo në vaingë mukhatë anyu mwaramwue gusoko a muntu wasuu ëgutëndeka rëkhondie kunë mweeso. 7Uvii nyenye imunoneye bahu mwisuche gwa umwonea uvavi muntu wasuu na umufefeheya, gusoko mweeso atajeunempewa na uvavi ukuu. 8Nene ngumunena nyenye mumufe muntu wasuu umanyi wa tutë wa uyanjo wanyu kunë mweeso. 9Nene namwandëkëe nyee keeti asëë gusoko nene nedahe umuhunguhëa nyenye na umanya mbesa nyenye mwina ikuryo gwa mantu oong'e. 10Nene mughonjo ninjë umwonea uvavi muntu gëkaku në nyenye mwinje umwonea uvavi. Rasëë në nene ngurërekea, nesa nene narekea intu gëkaku, ëgutëndeka gusoko anyu itambëëmwe na Kiristo mwino masudanga wane. 11Nene ngutënda wuu gusoko umughiya Setani ëkëugutëghea sese mutëgho. Gusoko sese gumanyie uhughu wakwe.
Buku gamwa Faulo uTroa
12Nënaa nene nafika uTroa gwa utanantya sayu në njija në amwa Kiristo, Müküü Yesu Kiristo naa wadaha urughua gënyamwango gusoko ane fana Müküü. 13Ëgweeso nene ntinahanga majëghana mwitwe rane gusoko nene arë ntinamuhanga Tito munane. Uvii nene nëgatunguya ufuma uTroa nëgaenda faka uMakedonia.
Uhumi ukëërëa Kiristo
14Ëgweeso sese nëgumufe Muungu asi, unë mung'ë amwa Kiristo faka ugugutongeera mu uhumi. Muungu ugugutumëa sese gwa utënda umanyi nëumughokee Kiristo uning'anëa ng'andë yoong'e mwino münyünkü në uja wa makuta a musalaka. 15Gusoko sese gwikhwetë na münyünkü në uja wa makuta në Kiristo wadwëëye kunë Muungu, mukhatë a avoo në Muungu uguvatyoa na avoo në vëuyaghaa. 16Gwa avoo në va mwandyo münyünkü wa ikuya, nëugwetaa ikuya ëgweeso gwa avoo vangëja munyuku wa ufanga nëugwetaa ufanga. Gutië muntu mba umwe nëukhondekie gwa mwëmo uruu. 17Gusoko sese gutiikhweti, mwino antu vingë unë vëutanantya ukhani wa Muungu gusoko a uwukhomba. Ëgweeso gwë mwino antu në ahuvëi unë Muungu waatumie, usonge a Muungu në sese gukhuvëe gwina Kiristo.
Currently Selected:
2 Akorinto 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.