2 Maka 14
14
1Emyaka eshatu ku yaahingwireho, Yuda n'abashaija be baabagambira ku Demetiriyo mutabani wa Seleuko aiziire omu meeri, akahika aha nyambukiro ya Turipoli, aine eihe ry'amaani n'emeeri endwani, 2kandi ku akubwire ensi, yaaherize kwita Antiyoko n'omworozi we Lisiya.
3Mbwenu omushaija orikwetwa Alikimo, ira owaabaire ari omuhongyerezi mukuru, kwonka akeeshiisha nkana obu yaayecwa aha bandi, akamanya ku atakiine bundi buryo bw'okukiriramu, nari bw'okugaruka kwikirizibwa kuhika aha itambiro eririkwera. 4Reero omu mwaka nk'ogwa igana na makumi ataano na gumwe, yaaza ow'Omugabe Demetiriyo, amutoijeire ekirunga ky'ezaabu n'orukindo, yaataho n'okumutoijera amataagi g'emioliva agu yaihire omuri Nyaruju, nk'oku omucwe gwabo gwabaire guri; haza eryo izooba tiyaagira ki yaateeza. 5Kwonka bwanyima yaahiirwa, yaatunga ekyamwongyeire kuba omushazi, obu Demetiriyo yaamweta omu ruteerane rw'okuhanuura, akamubuuza oku Abayudaaya beemi n'ebi barikwenda kukora, haza onu akamugarukamu ati:
6Abayudaaya abarikwetwa Abahasidaayo, abu Yuda Makabeho ari omwebembezi waabo, nibo barikwimukiiriza orugamba, bakareetera abantu kugoma, kandi tibarikwija kureka obu bugabe bukagira eihoreere. 7Mbwenu ku baanyihireho ekitiinwa kya baatatenkuru nibwo buhongyerezi obukuru naanye nikwo kwija aha. 8Eky'okubanza ekyandeeta n'ahabw'okuba ninta munonga omutima aha bi omugabe akunda; ekya kabiri abatuuzi bagyenzi bangye nimbeetaho munonga. Manya ahabw'obushema bw'abo abu naaheza kugamba hati, eihanga ryaitu riri omu kabi kahango. 9Mbwenu Nyakusinga, nk'oku orikumanya gye akasyo n'akahindu k'ebyo bintu, ninkweshengyereza otagira eki waakorera ensi yaitu n'eihanga ryaitu eririkuhatwa, okarigirira embabazi nyingi nk'oku ozigirira abandi boona. 10Manya Yuda ku araagume akihuriire, obu bugabe tiburigira bu bugizire obusingye.
11Ku yaaherize kugamba ebyo, abandi banywani b'omugabe abari aho abaabaire bari abangizi ba Yuda, ahonaaho baayongyera kurigitirira Demetiriyo. 12Nawe tiyaahwama, yaatoorana Nikanoori, owaabaire naategyeka ab'eihe ry'enjojo, yaamuhindura omutegyeki mukuru wa Buyudaaya, kandi yaamwohereza 13naamuragiira kwita Yuda n'okutaataanisa abashaija be, n'okutataho Alikimo kuba omuhongyerezi mukuru owa Nyaruju rugambwa. 14Reero Abanyamahanga omuri Buyudaaya yoona abaabaire bahungire Yuda baahimintika kukwatanisa na Nikanoori, nibateekateeka ngu ebihikiirizi n'obugwe ebiraagwere Abayudaaya, bo nibiija kubarugiramu obugogyeere.
Nikanoori okukora na Yuda endagaano
15Abayudaaya ku baahuriire Nikanoori naija, n'oku Abanyamahanga beeteeraine, baayeshukyeera eiju omu mitwe, baashaba Ogwo owaataireho eihanga rye kugumaho ebiro byona, kandi otoosha kubangira n'okweyoreka abantu be abu yaayetooraniire. 16Yuda omwebembezi waabo ku yaabaragiire, baimutsya orugyendo, baarugayo ahonaaho; baatandika kurwanisiza abazigu aha mugongo gurikwetwa Desau. 17Simooni mukuru wa Yuda akaba yaabugabugaine na Nikanoori omu rugamba, kwonka abazigu ku baamwitsize obwoba kitaraariire, yaamara akaanya agarwire ebigyere enyima.
18Reero Nikanoori ku yaahuriire obumanzi bwa Yuda n'engabo ze, n'oku barwana kimanzi ahabw'ensi yaabo, yaayehinya, yaarereera eky'okwita abantu, ngu abone kutunga eki arikwenda. 19N'ahabw'ekyo yaatuma Posidooniyo na Teodooto na Matatiya kuhanuura n'Abayudaaya nibahamizana nabo eby'okugira omukago. 20Ebyo ku baaherize kubihanuuraho, na Yuda yaaheza kubishoboororera abantu be, kandi baareeba boona baine omutima gumwe, baikiriza endagaano. 21Reero abeebembezi b'embaju zombi baataho eizooba ry'okureebaniraho. Omu buri ihe haarugayo ekigaari, kandi baata ebitebe by'ekitiinwa ahi baraareebanire. 22Haza Yuda yaata omu myanya mikuru abashaija baine eby'okurwanisa, abeeteekateekire kuzibira ahonaaho abazigu, baaba benzire kubareebya, batyo baagira okuhanuura kurungi.
23Bwanyima Nikanoori yaamara ebiro Yerusalemu, kandi tiyaakorerayo kintu kitahikire, kureka yaaragiira abaabaire bateeraniireyo kutaaha. 24Nikanoori we yaaguma na Yuda atarikwenda kumurugaho; 25yaarugaho yaamwehanangiriza ku ashwera akazaara abaana. Yuda nawe nikwo kushwera, akatuuza, akaba omuntu nk'abandi.
Alikimo okugaruraho obuzigu, na Nikanoori okuhayira Nyaruju
26Kwonka Alikimo ku yaareebire Nikanoori na Yuda nibakundana, yaaza owa Demetiriyo amutwariire endagaano ei baabaire bakozire, yaamugambira ku Nikanoori atarikwendeza bugabe ebirungi, ngu ahabw'okuba akataho Yuda endeebya y'obugabe kuba omuhunguzi we. 27Omugabe ekikoba kimuhwa aha mutwe, kandi ku agwisibwa kubi ebi ogwo munyabishuba yaamuregyeire, ahandiikira Nikanoori naamumanyisa ku atarasiimire egyo ndagaano, kandi amuragiira kwohereza Antiyokiya Makabeho ari embohe ahatari kusiibyayo.
28Obutumwa ku bwahikire ahari Nikanoori, yaashoberwa kandi yaashaasha kureeba ngu naaza kwita endagaano yaabo, haza ogwo muntu ataine ki ashobize. 29Kwonka nk'oku kyabaire kitarikubaasika kuhakanisa omugabe, yaategyereza ah'araatungire omwanya kukora ekyo kintu naaryarya. 30Makabeho nawe ku yaayeetegyereize Nikanoori atakitwazana gye nawe, kandi akimubugana akamugirira omwaga okukira oku yaabaire ari bwabiso, yaahamya ku ekyo kishaariro kirikureetwa enobi. Atyo yaarundaana abashaija be batari bakye, yaaza kweshereka Nikanoori.
31Onu ku yaamanyire Yuda amutebukire, yaaza ahari Nyaruju rugambwa erikwera, abahongyerezi nibatamba ebitambo nk'obutoosha; yaabaragiira ku bamumuha. 32Ku baarahiire nibamugira ngu tibarikumanya ei ogwo muntu ou arikusherura ari, 33yaagorora omukono gwe gwa buryo agworekyeize Nyaruju, naarahira ati: Ku muraabe mutandekuriire Yuda ari embohe, niinyija kusheenyaho eki kyombeko kya Ruhanga, habe ensi, nsheenyagure eri itambiro, nyombekyereho Diyoniso endaaro y'ekitiinwa.
34Ku yaaherize kugamba ebyo yaagyenda. Abahongyerezi baimutsya emikono yaabo bagyorekyeize eiguru, baahogyera Omurwanirizi w'eihanga ryabo otuuraho, nibagira bati: 35Ai Mukama, iwe otagira ki okyena, kwonka owaasiimire ngu Nyaruju ebe obutuuro bwawe omuriitwe, 36mbwenu iwe Orikwera, Mukama w'okwera kwona, rinda egi nju erugire kwezibwa juba, egume etahagaziibwe.
Oku Razi yaafiire
37Omushaija orikwetwa Razi, ow'omu bakuru b'eihanga ab'omuri Yerusalemu bakamuregyera Nikanoori, ku arikukunda ab'eihanga rye, n'oku barikumusiima munonga, kandi ahabw'okugira omutima murungi ku barikumweta ishe w'Abayudaaya. 38Manya omu biro byahingwire, obu Abayudaaya baabaire beecwire aha Banyamahanga, bakaba bamutabaariize nibamutura okuba ow'ediini y'Ekiyudaaya; nawe ahabw'egyo diini akaba ayenagiire kimwe omu kabi. 39Nikanoori ku yaayenzire kworeka Abayudaaya ku arikubanga, yaatuma abaserukare barikweshumba magana ataano kumukwata; 40ahabw'okuba akateekateeka ngu ku araamukwate nikiija kubakora kubi. 41Engabo ku zaabaire ziri haihi kukwata omunaara, nizitsindika n'amaani orwigi rw'ekibuga, zaaragiira ku bareeta omuriro bakootsya enyigi. Razi ku yaareebire baamukubakuba, yaayetunga ahari rurara ye, 42naasiima okufa n'ekitiinwa okukira okugwa omu mikono y'enyabibi. Atyo yaafa orufu rubi orutashemereire muntu w'ekitiinwa nkawe. 43Kwonka omuri ako kamigano k'okurwana tiyaayeteera mu kiito, ahabw'emigogo kushangwa neemigana, neeraba omu miryango. Reero ku yairukire kishaija kizima, yaatemba ekisiika, yaayenaga omuri ezo ngabo. 44Nazo ku zaagarwire ziti ebigyere enyima, haatsigara omwanya, nawe nikwo kugwetuura ahagati. 45Ahabw'okushangwa akihuriire n'ekiniga kiri eky'okumubarura, yaabandaatuka naahimintika eshagama, obuhuta bumuri kubi, yairuka, yaayoga omuri ezo ngabo, yaayemerera aha rukiri rurikurengyetuka, 46eshagama yaamuhwerairemu kimwe, yaayeshokoora amara, yaagakwatsa engaro zombi yaagatambikira ab'omuri ekyo kimbuuro, naatakira Mukama w'amagara n'emitima kwija kugamugarurira obundi; yaaba nikwo afa atyo.
Okurogota kwa Nikanoori
Currently Selected:
2 Maka 14: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.