2 Maka 15
15
1Nikanoori ku yaahuriire Yuda n'abashaija be bari omu kyanga kya Samariya, yaacwa obwengye bw'okubateera aha izooba ry'okuhuumuriraho, ngu atakaahikwaho akabi. 2Abayudaaya abaagyemesereziibwe kugyenda nawe ku baamugizire bati: Otacwekyereza abantu otaine saasi na buntu, kureka ogirire enshoni eizooba eri Oreeba byona yaahaire ekitiinwa, akaryeza okukira agandi mazooba! 3Egyo mburaburirwa yaakyeenirwe okutakareebwaga, yaabuuza ku haraabe habaho Omugabe omu iguru, owaaragiire kurinda ekiro kya Sabato. 4Nabo ku baamushoboororeire bati: Ni Ruhanga nyakabara ohuriire buzima, omugabe w'omu iguru owaaturagiire kurinda ekiro kya mushanju; 5yaabagarukamu ati: Naanye ndi omugabe omu nsi, kandi nimbaragiira mukwate eby'okurwanisa, muheze omurimo gw'omugabe. Kwonka shi tarabaasize kuhikiiriza enaama ye embi.
Makabeho okuteera abashaija be omuhimbo
6Nikanoori ahabw'okwetunguura n'okugira amaryo, akaba amaririire kwombeka ekiijutsyo ekirikureebwa abantu boona, ekirikworeka oku yaasingwire Yuda n'engabo ze. 7Kwonka Makabeho taragizire bu arekire kwesiga Mukama kumuha emikono; 8yaataho n'okwehanangiriza engabo ze, ngu zirekye kutiina Abanyamahanga abarikwenda kubateera, kureka okuguma nibaijuka ebiro byahingwire, obu Ruhanga ow'omu iguru yaabaha emikono, kandi ngu n'omu bunaku obu, bategyereze obusinguzi obu Omushoboorozi wa byona araabahe. 9Akongyera kubateera omuhimbo, naabagumya n'ebigambo by'omu iteeka n'eby'omu Barangi, kandi naabaijutsya engamba zi baasingwire. 10Mbwenu ku yaaherize kubagumya, yaagira ebi yaabaragiira, yaabashoboororera oku Abanyamahanga baba endeebya n'oku barya endahiro. 11Ku yaaherize kubahamiiriza okuteesiga ngabo n'amacumu byonka, kureka n'okubagumya naabagambira ebigambo birikubateera obumanzi, yaabateekyerereza ekirooto ki yaarootsire naayorekwa, ekyabagarwire omutima omunda.
12Eki yaareebire n'eki: Oniya omuhongyerezi omukuru, omuntu w'ekitiinwa, omurungi, omucureezi, orikutwaza gye, owaabaire agamba ebihikire kandi ayegyesiibwe gye okwiha omu buto, akamureeba naashabira Abayudaaya agoroire emikono. 13Bwanyima haaboneka ondi muntu, orikumanyirwa aha ishokye rye ry'enju n'okuba omugurusi n'ahabw'okugira ekitiinwa n'obushoboorozi. 14Reero Oniya yaagamba naagira ati: Ogu niwe Yeremiya omurangi wa Ruhanga, omuntu okunda beene waabo kandi oshabira munonga abantu n'orurembo orurikwera. 15Mpaho Yeremiya yaagorora omukono gwe gwa buryo, yaaha Yuda rurara y'ezaabu. Haza ngu ku yaabaire naagimuha, yaamugira ati: 16Yakiira rurara egi erikwera, ekiconco ekirugire ahari Ruhanga, eki oraitise abazigu baawe.
Amahe ga Nikanoori okutenga orugamba
17Yuda ku yaaherize kuteera abantu be omuhimbo, naabagambira ebigambo birungi munonga kandi eby'omugasho, ekyo kyareetera abatsigazi obumanzi n'obushaija buzima. Baamaramaza okutaguma mu nsiisira, kureka okuteera abazigu baabo; bakamaraho ekyo kintu nibarwana bukwata n'obumanzi bwabo bwona, ahabw'orurembo n'Omwanya Ogurikwera na Nyaruju okuba omu kabi. 18Ekyakizire kubasaasa ti bakazi baabo n'abaana baabo na beene waabo n'abanyabuzaare, kureka ekikuru kandi eky'okubanza eki baabaire nibatiinira ni Nyaruju Erikwera. 19N'abaabaire bari ab'okutsigara omu rurembo bakaguma beemereize munonga omutima, ahabw'orugamba orwabaire ruri haihi kurwanirwa omu bwerere.
Yuda okuhoogyera Ruhanga
20Mbwenu abantu ku baabaire bategyereize ekiraarugye omuri orwo rugamba, abazigu baahikire haihi, eihe ryabo ryatengire orugamba, enjojo zaatairwe gye omu myanya yaazo, n'ab'ahambaraasi baayeshanzire, 21Makabeho ku yaayetegyereize amahe agamuri omu maisho, n'oku gaine eby'okurwanisa by'emiringo yoona, n'obushaarizi bw'enjojo, yaagorora emikono agyorekyeize eiguru, yaahoogyera Mukama okora eby'okutangaaza. Manya akamanya ku obusinguzi butabaho ahabw'eby'okurwanisa, kureka Mukama ku niwe abuha ababushemereire. 22Reero yaamuhoogyera, ati: Ai Mukama, okoohereza maraika waawe omu busingye bwa Hezekiya omugabe wa Buyudaaya, yaitira kimwe abantu akasiriira kamwe n'obukumi munaana n'enkumi itaano, omu rusiisira rwa Senakeribu. 23Mbwenu hati, ai Mugabe w'eiguru, yohereza omu maisho gaitu maraika omurungi, areete okutiina n'okutetema. 24Abo barogotsi abaija kurwanisa abantu baawe abarikwera, omukono gwawe ogw'amaani gubateere, gubagwiseho. Ahendera atyo okushaba kwe n'ebyo bigambo.
Okusingurwa kwa Nikanoori n'okwitwa kwe
25Nikanoori n'engabo ze bakatandika kurwana, nibateera enzamba nibeshongora ebyeshongoro by'orugamba. 26Yuda n'engabo ze baabugabugana nabo omu rugamba nibahoogyera Ruhanga nibamweshengyereza. 27Batyo baarwanisa emikono, omu mitima yaabo nibashaba Ruhanga. Ekyarugiremu, baita abantu nk'obukumi bushatu n'enkumi itaano; kandi baahangaanwa munonga ahabwa Ruhanga kubeeyoreka.
28Orugamba ku rwahwaire, ku baabaire nibatabaaruka bananukire, baashanga Nikanoori arambiire, afiire ajwaire eby'orugamba; 29baateera akaari nibarabanamu, baahimbisa Nyakusinga Mukama omu rurimi rwa baishenkurubo. 30Yuda owaabaire atuura ayeteekateekire omu mubiri n'omu mutima kurwanirira abatuuzi bagyenzi be, ogwo mushaija owaagumire aine omutima murungi aha bantu b'eihanga rye okwiha omu butsigazi, yaabaragiira kutemaho Nikanoori omutwe n'omukono, bakabitwara Yerusalemu. 31Ku yaahikireyo, yaayeta abantu b'eihanga rye kuteeranira hamwe, yaata abahongyerezi omu maisho g'eitambiro, yaatuma ku beeta abari omu kigo ekirindirwamu.
32Atyo yaabooreka omutwe gwa Nikanoori enkozi y'ebibi n'omukono gwe ogu ogwo mushaija waarogotsire, yaagoroire n'amaryo agworekyeize enju erikwera ey'Omushoboorozi wa byona. 33Yaashara orurimi rwa Nikanoori otatiina Ruhanga, yaagira ngu naija kurucwanyagura arugaburire enyonyi; reero ebi baamuzimuriire ahabw'obushema bwe bihanikwe aharikureebana na Nyaruju. 34Boona baimutsya amaisho ahaiguru, baahimbisa Mukama owaabeeyorekire, nibagira bati: Ogwo orinzire omwanya gwe gutahagazibwe, ahimbisibwe! 35Yuda atyo ahanika omutwe gwa Nikanoori aha kigo ekirindirwamu, ngu abantu boona ku baraagureebe, bamanyireho ku Mukama niwe abahaire emikono. 36Bwanyima akataho ekiragiro ekihinguziibwe abantu boona, nibagira ngu ekyo kiro kitarihingura batakyetaireho, kureka ngu bagume bagire omukoro gwakyo aha kiro kya ikumi na bishatu eky'okwezi kwa ikumi n'abiri okwetwa Adaari omu rurimi rw'Abasiriya ekiro ekibandiza ekya Morodekayi.
Okuhendera kw'owaarundaine ebiri omuri eki kitabo
37Ebya Nikanoori nikwo byagyenzire bityo. Okwiha obwo orwo rurembo rutuura nirutegyekwa Abaheburaayo. Naanye aha niho naagarukiza ekitebyo kyangye. 38Ku kiraabe kihandiikirwe gye kandi nikiteera omu kiito, ekyo nikyo mbaire niinyenda; kwonka ku kiraabe kitebiibwe kubi nari kiri rwagati, nyowe ekyo nikyo mbaasize kukora. 39Manya nk'oku kiri eky'akabi okunywa viino enkuuta, haza viino efungwirwe niyo enura ekagira omushongi, ekashemuura omuntu, n'emihandiikire y'ekitebyo nikwo egwisa gye abakishoma nibakyetegyereza. Mbwenu ekyo nikyo kigambo kyangye ky'aha muheru.
Currently Selected:
2 Maka 15: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.