Roma 3
3
1Tà á lɔɔn ńgwɔ́ pá’ɔɔn, mbà nyìŋ Yuda lɔgɔ kɔ́ ńcʉa nyìŋ gẅie à tè nyìŋ Yuda wɔ́? Lépú’u nyìŋ Yuda piŋ ńkẅéte yé nà kɔ́? 2Apì ké ńgwɔ́ wó tɛ’, é meshÿó meshÿó nà légwɔ́ nyìŋ Yuda. Ndùŋ mvfò á gwɔ́ pá’ e Ssé la cʉ́me shwóŋè yé pɔ́ mbwo pà Yuda. 3Á piŋ ńgʉa nà pá’ etsɔ́ pà Yuda la nyé yɛ̌ shwóŋè pé’è, á ge cʉa pú’u, e Ssé nyé menò mie à la ka’a mbwo pɔ́b keen? 4Ngǎŋ, ńgwɔ́ á le pú’u gÿo. Tà mbɔɔ pá’ pʉ̀a mesoŋ metsèm pú ńgwɔ́ pɔ́ ngàŋa cÿɔ̌ nò, yé Ssé à tè gɔɔn nò ḿbiŋ ńkúbe wɔ́. Áa ndʉŋ ndʉŋ pá’ mé la ŋwe’e tsɛ̀ɛ ŋwà’ne Ssé ngie:
Gù Ssé gwɔ̌ tà ńgɔɔn nò mé gẅiin lézsé ngie ashwóŋè jú àa ndʉŋ ndʉŋ,
Ńgwɔ́ gie nyìŋ ŋaga gú á le gú jÿó.
5Ńgwɔ́ tsɔ́ pʉ̀a gɔɔn ngie: Menò tepòŋ mie pege fʉ’ʉ gÿo pʉ̀a zsé ngie e Ssé ee ndʉŋ ndʉŋ, mbà pege ge tsɔ́’ɔ mbwo pɔ́b ngie kɔ́? Pege ge gɔɔn ngie e Ssé gwɔ̌ tà ne ńnéŋe ngʉ̀ngʉ̀ twó pégè ntí mefʉ̌’ nò mégè, à té ńdɔgɔ ńgwɔ́ ndʉŋ ndʉŋ wɔ́ keen? N gɔɔn pá’ɔɔn pɔ́ nò gie pʉ̀a mesoŋ ne ńgɔɔn. 6Ngǎŋ ńgwɔ́ pege é le gɔɔn pú’u wɔ́, e Ssé gwé’e e tè ndʉŋ ndʉŋ wɔ́, mbà à tè ku’ pá’ ńgwɔ́ á ŋag pʉ̀a mesoŋ ntsèm pie ee ndùmo ssé tsetsá’ wɔ́.
7Tà ńgwɔ́ nyìŋ zɔɔn ńgɔɔn ngie: Á ge cʉa nà pá’ mèŋ n ne ńcÿɔ no, anò nénʉ́ gie á fó mbwo Ssé à kẅɛɛ mangyɛ̌, mé gu’te yé ntí pú’u, e Ssé piŋ ńgíŋe ńŋaga wɔ̀ɔn ngie mèŋ n gee nyìŋ tepòŋ mélà’a kɔ́? 8Nyìŋ gɔɔn pá’ɔɔn, mbà ńgwɔ́ á cʉ́me ngie: Pege gÿo menò tepòŋ ńzsé ngie nò mbòŋo ge kẅɛɛ mǒ. Etsɔ́ pʉ̀a ne shwóŋte nà lezíŋ sɔ́ɔn ngie mèŋ n zɔ gɔ̌ɔn pú’u. Pɛ̌ pʉ̀a ee pʉ̀a pie e Ssé ge gÿo ŋaga wɔ́b.
Tsɔ̌ nyìŋ mesoŋ gẅie à gÿo mmó gie Ssé ne ńkwoŋo te wó wɔ
9Tà áa pá’ɔɔn ńgwɔ́ pege gɔɔn ngie kɔ́? Ńgie áa mvfò Ssé peg pà Yuda cʉa pʉ̀a pie é té pà Yuda wɔ́ keen? Ngǎŋ á té pú’u wɔ́. Mèŋ n ně ńdá’ ńda’te pá’ nò tepòŋ léen ḿbú ńjÿó pà Yuda mbɔɔ pʉ̀a pie é té pà Yuda wɔ́. 10Á lɔgɔ ńcʉ́me ná pá’ mé la ŋwe’e tsɛ̀ɛ ŋwà’ne Ssé ngie.
Atsɔ̌ nyìŋ mesoŋ gẅie aa ndʉŋ ndʉŋ à tè wó wɔ́.
Tà tsǒon tà’.
11Atsɔ̌ nyìŋ gẅie à gẅiin legyè à tè wó wɔ́.
Atsɔ̌ nyìŋ gẅie à kwa’ ne ńtsɔ́ɔn lézsé mánzsè Ssé à tè wó wɔ́.
12Pɔ́b metsèm léen ńgwá’a mánzsè Ssé. Pɔ́b metsèm léen ḿbú ńcʉŋte.
Nyìŋ mesoŋ tè nò mbòŋo gÿo tà tsǒon tà’.
13Ncwò wɔ́b pú ńdem pá’ gyě lesyè sie mé fwɔ̌’.
Pɔ́ lɔgɔ lʉ́me yɔ́b ḿbab pʉ̀a mesoŋ pab.
Anò gie á kẅɛɛ nà mekùb ncwò mɔ́b gwɔ́ pɔ́ pá’ sesìŋ nnú.
14Ncwò wɔ́b zoon pʉ̀a zoon, ńnéŋ pɔ́ ndòon.
15Akwò yɔ́b zeŋe pɔ́ nà lénɔ̌ɔn pʉ̀a, ḿpfɛte metse mɔ́b.
16Pɔ́ cʉa nzɔ̌ wɔ́, ńcʉŋte shúm pɔ̀ ntsèm, mé cʉ́’ ńdʉa.
17Ńgwɔ́ pɔ́ lélɔg mbʉ́lè ńtóo jʉ’ wɔ́.
18Pɔ́ gÿo yɔ́b nò pɔ́ tè pɔ̌g Ssé.
19Mɔɔn ée menò mie mé la ŋwe’e tsɛ̀ɛ ŋwà’ne *lepʉ̌ Ssé, pege piŋ ńzsé ngie anò ntsèm gie *lepʉ̌ gɔɔn, é vɔgɔ ńgɔɔn mbwo pà Yuda pie *lepʉ̌ ŋwɛ́ sá’a wɔ́b. Pá’ pɔ́ gíŋ ńgwɔ́ yɔ́b pɔ́ ngàŋ mefʉa la, ncwò wɔ̌wɔ́ɔ nyìŋ mesoŋ wɔ́, ge jÿɔ́’ɔ, wɔ̌wɔ́ɔ piŋ tyé mvfò Ssé ńgwɔ́ pɔ́ nyìŋ gẅie à gwě ntsaŋ. 20Áa pá’ɔɔn nue nyìŋ tè lá’ lɔg pá’ à gɔɔn ngie à gÿo mmó gie *lepʉ̌ ne ńzɛ́te, étyé mvfò Ssé é gwɔ́ ndʉŋ ndʉŋ wɔ́. Afa’a *lepʉ̌ zɔɔn ńgwɔ́ lényɛ pʉ̀a mesoŋ ngie pɔ́ zsé ngie pɔ́ gyǒ nò tepòŋ.
Ntí gie e Ssé fó mǒ ńcʉ́’ ńdíe nyìŋ á gwɔ́ ndʉŋ ndʉŋ mvfò yé
21Tá’ aa nà fʉ̀’ɔɔn, mbà Ssé kéen ńda’te ntí gie à fó mǒ ńcʉ́’ ńdíe nyìŋ á gwɔ́ pɔ́ ndʉŋ ndʉŋ mvfò yé, é ké tè ntí gie e fóo ná *lepʉ̌ wɔ́. Ŋwà’ne *lepʉ̌ Mǒsê tà mbɔɔ ye pà *ntsẅì nkʉ̀ Ssé la gɔɔn nò ńtí wɛ̌ mánzsè. 22Á gwɔ́ pá’ nyìŋ lɔɔn ńzáb ntʉ́m ná Yěsô Kristo, mbà e Ssé ge cʉ́’ líe ngàŋ, à gwɔ́ mvfò yé ńgwɔ́ ndʉŋ ndʉŋ. Ee ndà’ nzsè mbwo mânyìŋ ntsèm. Pɔ́ ée mvfò Ssé ḿbú ńgwɔ́ pɔ́ tà’a mmó, 23á nue pɔ́b metsèm la zɔɔn ḿbú ńgÿo menò tepòŋ tà sɔ́ɔn legú’ gẅie aa lejʉ́ŋ Ssé. 24Tá’, pá’ Yěsô Kristo kéen ńtó, ńkyɛ́’ ńkÿo nò tepòŋ ná pʉ̀a la, e Ssé cʉ́’ fó mǒ ńdíe pʉ̀a pɔ́ gwɔ́ pʉ̀a pie ée ndʉŋ ndʉŋ mvfò yé, á gwɔ́ mmó gie à lɔgɔ ńcÿó gem yɔ́b pɔ́ sẅɛɛ sẅɛɛ. 25E Ssé ka lɔgɔ́ yé ńnuŋe pwɔ́’ pá’ metse mé ge sɔg menò tepòŋ pʉ̀a pie pɔ́ záb ntʉ́m ná yé Kristo. Pá’ nyìŋ la gẅiin lékwé ná menò tepòŋ pʉ̀a la, á lɔgɔ ńnyɛɛ ngie e Ssé gÿo menò mé ndʉŋ ndʉŋ. Á kaa tsɔ́ fʉ̀’, pʉ̀a mesoŋ ne ńgÿo nò tepòŋ, yé Ssé gÿo pɔ́ pá’ fʉ̀’ gie à tè ne ńgyá wɔ́ la. 26À kaa fʉ̀’ó ne shÿɔgɔ shÿɔg ńzẅí’te, tá’ áa fʉ̀’ɔɔn, á ne ńnyɛɛ ngie àa ndʉŋ ndʉŋ, ńgíŋe ńnyɛɛ ngie à líe nyìŋ gẅie à záb ntʉ́m wé ná Kristo á gwɔ́ pɔ́ ndʉŋ ndʉŋ mvfò yé.
27Tà áa pá’ɔɔn atsɔ́ mmó gie ńgwɔ́ nyìŋ mesoŋ gíŋe ńdɔg ńŋá’te á gwɔ́ wó? Ngǎŋ á té gíŋe ńgwɔ́ wó wɔ́ tà tsǒon kɔ́. Pú’u, mélà’a kɔ́? Mélà’mie ammó gie e Ssé ne ńzẅí’te, á té gwɔ́ pɔ́ nyìŋ légɔɔn ngie à gÿo mmó gie *lepʉ̌ ne ńzɛ́te wɔ́, á gwɔ́ pɔ́ nyìŋ lézáb ntʉ́m wé ná Yěsô. 28Peg zɔɔn ne ńzsé yég ngie: E Ssé gwɔ́ líe nyìŋ á gwɔ́ ndʉŋ ndʉŋ mvfò yé, ńtí pɔ́ nò gie à zǎb ntʉ́m wé ná Yěsô, á té fóo ná pá’ à gÿǒ mmó gie *lepʉ̌ ne ńzɛ́te wɔ́. 29Á gwe’e ńgwɔ́ pú’u, mbà Ssé cʉ̌’ ńgwɔ́ pɔ́ ye pà Yuda gílé pɔ́b, tá’ e giŋé ńgwɔ́ Ssé pʉ̀a pie é té pà Yuda wɔ́. 30á nue e Ssé gwɔ́ pɔ́ yémɔ’ɔ́. À líe pà Yuda pie é záb ntʉ́m ná Yěsô, pɔ́ cʉ́’ ńgwɔ́ mvfò yé ńgwɔ́ pɔ́ ndʉŋ ndʉŋ, yé zɔ́ gǐŋ ńdíe pʉ̀a pie é té pà Yuda wɔ́, tá mbà pɔ́ zǎb ntʉ́m ná Yěsô, pɔ́ cʉ́’ ńgwɔ́ mvfò yé ńgwɔ́ pɔ́ ndʉŋ ndʉŋ. 31Ńzsé ngie áa pá’ɔɔn ńgwɔ́ gie pege lɔɔn ńzáb ntʉ́m ná Yěsô, mbà *lepʉ̌ cʉ́’ʉ tsɔ́ nò wɔ́ keen? Ngǎŋ á té ńdɔgɔ ńgwɔ́ pú’u wɔ́. Tà ńcʉ́’ pú’u, mbà pege lɔgɔ pú’u, ńtÿɔ́gɔ *lepʉ̌ kwà’ ná jʉ’e.
Currently Selected:
Roma 3: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.