Lukase 3
3
Jâŋ gɔ̌ɔn ngie pʉ̀a kúbe mà wɔb
(Matio 3.1-10; Malékuse 1.1-6)
1-2Jâŋ míŋ Sakarîɛ lá’ ńtsẅé nkwòŋo tsẅɛ tà Ssé túmo yé ngie à gʉa shwóŋó nò yé. Á gwɔ́ ngù’ ayɛ̌, mbà Kása Tibɛr gẅie à la ne sá’a ngwòŋo ngwòŋ, mbà à neŋé nà lʉŋ ngù’ ntsɔ̀b tʉ̀a lê legém. Ponte *Pilato á gwɔ́ ngúmnɔ́ɔn pàga ngwòŋ Jẅidea, *Herôd á né sá’a pàga ngwòŋ Galilea, afɛ̌ we Filib á ně sá’a Itẅiria pɔ́ Telakonid, Lisanias á ně sá’a Abilɛn. Ánɔ́ɔn pɔ́ Kaifa gwɔ́ *metándá pànùŋe pwɔ́’. 3Jâŋ lêen ńké ńgʉa tsɛ̀ɛ melá’ mie ée nkʉŋ ntse Jurdeŋ, ńgiŋe sá’a mbwo lá’ ngie:
Pɔ́ kúbe mà wɔb à nu’u wɔ́b ntse, e Ssé lege menò tepòŋ mɔ́b ńnáa mbwo pɔ́b.
4Á lɔgɔ ńtswé’e nà nò gie Esǎya, *ntsẅì nkʉ̀ Ssé la ŋwe’e ngie:
«Ngyè nyìŋ kwɔ̌’ fóo nkwòŋo tsẅɛ ńgɔɔn ngie:
Pi nyɛte mánzsé Cʉ̀apʉ̀a,
ńgÿo melyěen nzsé mé e tyé ndʉŋ ndʉŋ.
5ńdẅíŋe mefú’ ntsèm mie ée mǒ,
ńkwɔg mekwɛ́ lâ mekwɔ’ɔ́ ntsèm,
ésiŋte meŋwɔ’ɔ́ nzsé e tyé ndʉŋ ndʉŋ,
ńkwɔg melu’ú mie ée ná mánzsé ésaŋte
6Tá à cʉa pú’u, pʉ̀a metsèm gyá pá’ Ssé ge gÿo pege tsẅɛ́».
7Jâŋ gɔɔn pú’u, pʉ̀a tà ńgyɔ́ɔn ne ńtóo pá’ à ge nu’u wɔ́b ntse. Á ně ńgɔɔn né pɔ́b ngie: Ngẅɛ̀ mennú, pà pá’ legyè! Awɔ̌ zɔ pǐŋ shwóŋó gẅi lékÿo ngɔ́’ gie pi lyɛbté tà é ně ńgee ńgwé ná pi? 8Pi kúbe pɔ́ mà, ńgÿo menò mbòŋo mie é nyɛɛ ngie pi kubé. Pi pɔ́ɔn lélɔg pɔ́ ndà’ ncwò gẅi ńgɔɔn ngie: Peg ee púɔ Ábalam. Tà mèŋ n ké shwóŋó gẅí: E Ssé ku’u lésele metóon pɔɔn ńdɔg ńgÿo ngẅɛ̀ Ábalam. 9Mé ně ńzɔɔn ńdá’ ńkaa nzɔ́ɔn lélɔg ńkɔ́’ɔ yɛ̌ yɛ̌ tÿǒ wɔ́ gie á té ně ńzéme ntɔ̌ɔn mbòŋo wɔ́, éfoo Ssé kɔ́’ɔ yé ké ma’ pɔ́ mmɔ̌g.
10Alá’ jú’, ńzɛ́te yé ngie:
Tà á lɔɔn ńgwɔ́ pú’u, peg gǎ?
11Á tsɔ́’ɔ mbwo pɔ́b ngie:
Nyìŋ gẅi lɔɔn ńgẅiin menzsǒ mémbʉ́a, á náa tà’ mbwo nyìŋ gẅie à zɔɔn tè tsɔ̌ gẅiin. Nyìŋ gẅie à gẅiin mmó mpfɛ̌, náa ye nyìŋ gẅie nzyè ne ńgyáŋa yé.
12 *Pàkẅé ncùb pà Roma la tó yɔ́b pá’ mé ge nu’u wɔ́b ntse, ńzɛ́te ngie:
Tsítsà, tà peg ge gÿo yég lêkɔ́? 13Jâŋ tsɔ́’ɔ mbwo pɔ́b ngie:
Pi kẅé ndà’ mmó gie *lepʉ̌ ne ńzɛ́te, tà pi kẅi’i.
14Pàlÿɔ́’ ncù gíŋe ńzɛ́te yɔ́b ngie: Ńgʉa ná peg, peg ga? Á tsɔ́’ ngie:
Tà pi lɔg metʉ̀ kà cÿɔ̌ nò wɔ́ ésẅɛ́ɛ nyìŋ ńkẅé nkáb ye. Pi zẅí’te pɔ́ ndà’ nkába fà’ gi.
15Pá’ á la gwaa gwɔ́ alá’ ne ńzẅí’te *Nzà’nkÿo gẅie Ssé la ka’ la, awɔ̌wɔ́ɔ ně ńzɛ́te tsɛ̀ɛ ntʉ́m yé ngie: Kà Jâŋ lɔgɔ ńgwɔ́ pɔ́ yé wɔ́? 16Tá á tsɔ́’ɔ mbwó pɔ́b metsèm ngie: Mèŋ n dêen ńgẅiin yɔ́ɔn pɔ́ ndà’ lénu’u gẅi tsɛ̀ɛ ntse. Tá tsɔ̌ ndÿò ne ńtóo; à cʉa wɔ̀ɔn tà mèŋ n tè ku’u lékyɛ́’ menkÿo melɔ̌ɔn mé wɔ́. À ge tó néŋ pʉ̀a mbwo Zẅìge Ndʉalʉ̌a, é néŋ pʉ̀a tsɛ̀ɛ mmɔ̌g. 17À ge tó fÿɔ́g shúm sie mé pǔ’, é néŋ se mbòŋo nkìŋ, e cʉ́’ kʉ̀ŋe, à pÿɛɛ tsɛ̀ɛ mmɔ̌g gẅie é téen ńdá’a ḿbyé wɔ́.
18Jâŋ ne shwóŋó nò Ssé pú’u, ńgíŋe ńnáa mentÿɔgɔ́ tà ńgyɔ́ɔn mbwo lá’.
19Ńkag mbàa ngúmnɔ́ɔn *Herôd ńtí pá’ à la kaa *Herôdiad gẅie à laa nzwě métá we, ńgíŋ ńkaga yé ńtí tsɔ́ menò tepòŋ tà ńgyɔ́ɔn. 20*Herôd gwaa mege cÿɔb, ńtsẅi mé gwoon Jâŋ ḿma’a ndá tsǎŋ
Yěsô tǒ mé nu’u yé ntse
21Jâŋ la ké ńgwɔ kú tsǎŋ, mbà á laa tsɔ́ lyɛ̌’, á nu’ pʉ̀a ntse tà é mag, Yěsô lêen ńké ńtó yé, á nu’u yé yé ntse. Á gwɔ́ tà ne ńgu’te Ssé, ncwò tÿǒ lepwó tsɔ́’ɔ ńtyé. 22A Zẅìge Ndʉalʉ̌a sẅɛ́’, ńgwá’a kapʉŋ la, ńtyé ná ye, ngyè fóo tÿǒ lepwó ngie: Ɔ̀ɔ míŋ wɔ̀ɔn, mèŋ n kwoŋó gú tɛ’, ɔɔ wɔ̀ɔn lekág.
Pàmangʉanjʉ̀’ Yěsô
23Yěsô la gwɔ́ zye létsẅi Nkʉ̀ Mbòŋo, á cʉ́’ʉ méjʉ’ à gẅiin ngù’ móm tá, mé ne ńkwaŋa ngie aa míŋ Yesyɛ̂b. Yesyɛ̂b gwɔ́ míŋ Eli. 24Eli gwɔ́ míŋ Matad. Matad gwɔ́ míŋ Lěvi. Lěvi gwɔ́ míŋ Melshi. Melshi gwɔ́ míŋ Janay. Janay gwɔ́ míŋ Yesyɛ̂b. 25Yesyɛ̂b gwɔ́ míŋ Matatias. Matatias gwɔ́ míŋ Amos. Amos gwɔ́ míŋ Nawum. Nawum gwɔ́ míŋ Esli. Esli gwɔ́ míŋ Nagay. 26Nagay gwɔ́ míŋ Maad. Maad gwɔ́ míŋ Matatias. Matatias gwɔ́ míŋ Séméen. Séméen gwɔ́ míŋ Joseg. Joseg gwɔ́ míŋ Joda. 27Joda gwɔ́ míŋ Joanaŋ. Joanaŋ gwɔ́ míŋ Résa. Résa gwɔ́ míŋ Zorobabel. Zorobabel gwɔ́ míŋ Salatiɛl. Salatiɛl gwɔ́ míŋ Neri. 28Neri gwɔ́ míŋ Melshi. Melshi gwɔ́ míŋ Adi. Adi gwɔ́ míŋ Kosam. Kosam gwɔ́ míŋ Elmandam. Elmandam gwɔ́ míŋ Er. 29Er gwɔ́ míŋ Yěsô. Yěsô gwɔ́ míŋ Eliezɛr. Eliezɛr gwɔ́ míŋ Jorim. Jorim gwɔ́ míŋ Matad. Matad wɔ̀ míŋ Lěvi. 30Lěvi gwɔ́ míŋ Simeon. Simeon gwɔ́ míŋ Jẅida. Jẅida gwɔ́ míŋ Yesyɛ̂b. Yesyɛ̂b gwɔ́ míŋ Jonam. Jonam gwɔ́ míŋ Eliakím. 31Eliakím gwɔ́ míŋ Méléa. Méléa gwɔ́ míŋ Mena. Mena gwɔ́ míŋ Matata. Matata gwɔ́ míŋ Nataŋ. Nataŋ gwɔ́ míŋ Ndavíd, 32Ndavíd gwɔ́ míŋ Jesé. Jesé gwɔ́ míŋ Obed. Obed gwɔ́ míŋ Booz. Booz gwɔ́ míŋ Sala. Sala gwɔ́ míŋ Naason. 33Naason gwɔ́ míŋ Aminadab. Aminadab gwɔ́ míŋ Admin. Admin gwɔ́ míŋ Arni. Arni gwɔ́ míŋ Esrom. Esrom gwɔ́ míŋ Fares. Fares gwɔ́ míŋ Jẅida, 34Jẅida gwɔ́ míŋ Yakwɔ́b. Yakwɔ́b gwɔ́ míŋ Esâg. Esâg gwɔ́ míŋ Ábalam. Ábalam gwɔ́ míŋ Tara. Tara gwɔ́ míŋ Nashor. 35Nashor gwɔ́ míŋ Serug. Serug gwɔ́ míŋ Rago. Rago gwɔ́ míŋ Faleg. Faleg gwɔ́ míŋ Heber. Heber gwɔ́ míŋ Sala. 36Sala gwɔ́ míŋ Kaynam. Kaynam gwɔ́ míŋ Arfazad. Arfazad gwɔ́ míŋ Sem. Sem gwɔ́ míŋ Noá. Noá gwɔ́ míŋ Lameg. 37Lameg gwɔ́ míŋ Matusala. Matusala gwɔ́ míŋ Henɔg. Henɔg gwɔ́ míŋ Jarɛd. Jarɛd gwɔ́ míŋ Malélél. Malélél gwɔ́ míŋ Kaynam. 38Kaynam gwɔ́ míŋ Enos. Enos gwɔ́ míŋ Sɛd. Sɛd gwɔ́ míŋ Adam. Adam gwɔ́ gẅie Ssé la pwóon ye.
Currently Selected:
Lukase 3: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.