Lukase 2
2
Mé zyě Yěsô
(Matio 1.18-25)
1Mé la gwaa zyé Jâŋ, mbà Áwúse, Kása pà *Roma ŋwe’é ŋwà’ne, ńzáb ngie mé pú sáŋ ngwòŋ pʉ̀a metsèm pie à ne sá’a wɔ́b. 2Wɛ̌ lɔ́gɔ ńgwɔ́ ndùŋ mvfò lesǎŋ pʉ̀a pú’u. Kirinus gwɔ́ fʉ̀’ó ńgwɔ́ ngúmnɔ́ɔn á tsɛ̀ɛ ngwòŋ Siria. 3Awɔ̌wɔ́ɔ lêen ńké ńně ḿbiŋe lesa’á pɔ́b, ńgÿo mé sáŋa yé.
4Yesyɛ̂b fó tÿǒsoŋ Nǎzarɛd, á tsɛ̀ɛ ngwòŋ Galilea, ńtóo tsɛ̀ɛ pàga ngwòŋ Jẅidea, á tÿǒsoŋ Mbetélehem, á jʉ’ gie mé la zyé fùɔ Ndavíd wó, ńgee wó pú’u, mélà’mie aa nyìŋ nà ngẅɛ̀ ndá fùɔ Ndavíd. 5Pɔ́ nzwě we Malîɛ gwɔ gʉa me sáŋa wɔ́b yé á gwɔ́ shwoŋ, 6ńkúu wó múɔ gwoon Malîɛ. 7Á zyé mûɔ letwó we, á gwɔ́ mûɔ mbàŋa, á lɔg shúm nzsǒ ḿbwóte yé, ńnéŋe tsɛ̀ɛ ngwʉ̌ŋ shúm léjÿó menɔ̀ɔn, mbà pɔ́ ně ńzága yɔ́b jʉ’e lela’á tsɛ̀ɛ ndá megʉ̀. 8Á gwɔ́ fʉ̀’ó pàpyɛ́b mvfó shÿó jʉ’ó ne ńdá’a pǐ ḿbyɛ́bɛ mvfó yɔ́b, 9ńgwaa gyá, *cÿɔ́’ Ssé kẅɛɛ mvfò pɔ́b, shéshÿɔ́g Cʉ̀apʉ̀a gwoon wɔ́b, ejʉ’ pú ńkyɛ́’ɛ, pɔ́ cʉ́’ʉ ḿbɔ́gɔ pɔ̌g. 10Tá *cÿɔ́’ Ssé ŋwɛ́ gɔɔn né pɔ́b ngie: Tà pi pɔ́g, mèŋ n tóo pɔ́ lépÿé gẅi nò mbòŋo, á gwɔ́ gie á ge náa máa lekág tsɛ̀ɛ ngwòŋ gẅí. 11Mé la’á tÿǒsoŋ fùɔ Ndavíd lyɛ̌’ɔɔn, ńzyé Nyìŋ gẅie à ge gÿo pi tsẅɛ́. Aa Kristo gẅie Cʉ̀apʉ̀a Ssé la ka’. 12Ammó gie pi ge tó lɔg zsé yé á gwɔ́ pɔ́ ngie: Pi ge tó gyá mûɔ mbÿɛ, mbà mé lɔ̌g shúm nzsó ḿbwóte yé, ńnuŋe yé tsɛ̀ɛ ngwʉ̌ŋ shúm léjÿó menɔ̀ɔn.
13Á gɔɔn tà ńgwaa cʉ́me, anùɔ *mecÿɔ́’ Ssé tà ńgyɔ́ɔn gíŋe fóo tÿǒ ńtó ńkẅi’i ná yé, pâ pɔ̌ zɔb, ńgu’te Ssé, ńgɔɔn ngie: 14Legu’ gwɔ́ mbwo Ssé á tàa tÿǒ lepwó, asẅétè gwɔ́ mbwo pʉ̀a mesoŋ ndùmo Ssé tsetsá’. E Ssé kwoŋo wɔ́b.
15 *Cÿɔ́’ Ssé gwɔ́ tà ḿbiŋ nê tÿǒ lepwó, pàpyɛ́b mvfó gɔɔn tsetsɛ̀ɛ pɔ́b ngie: Pege gʉa tà ńkúu Mbetélehem, tá ńgyá nò gie á kẅɛ̌ wó li, á nò gie á kẅɛ̌ tà Cʉ̀apʉ̀a túm ngie mé tó shwóŋó wégè lɔɔn. 16Pɔ́ gɔɔn pɛ́’ɛ, ńdêen ńdu Ssé ńgʉa lêtʉ tà ńkúu wó, ńgyá Malîɛ pɔ́ Yesyɛ̂b, ńgyá mûɔ mbÿɛ́, á núŋe tsɛ̀ɛ ngwʉ̌ŋ shúm léjÿó menɔ̀ɔn, 17ńgwɔ́ tà ńgyá yé, ńzye lépíte ngwòŋ menò ntsèm mie *cÿɔ́’ Ssé shwóŋó wɔ́b ńtíi yé. 18Awɔ̌wɔ́ɔ ně ńjú’u mɔɔn menò, á ncwò pàpyɛ́b mvfó, ḿmɔɔn tɛ’, 19ńgʉa ná Malîɛ, á pú ńde’e menò amɛ̌ pɔ́ tsɛ̀ɛ ntʉ́m yé, ńně ńkwaŋa nò mǒ fʉ̀’ ntsèm. 20Pàpyɛ́b mvfó gwaa piŋ nzèm, ńgiŋe ńzɔbɔ ńdɔgɔ ńgu’te Ssé, ésíe yé ńtí menò mie pɔ́ ně ńjú’, pɔ́ pǐŋ ńgyá kɔ̀ɔkɔ́ɔ gwɔ́ pɔ́ pá’ *cÿɔ́’ Ssé ně shwóŋó wɔ́b.
Lezíŋ múɔ
21Mé la zyé múɔ, é cʉa lyɛ̌’ lefɔ̌ɔn, mé pú’u yé, ńtsẅi lezíŋ sé le Yěsô, é gwɔ́ lezíŋ sie *cÿɔ́’ Ssé la ná tá má we lá’ shwóŋó yé.
Mé ge nyɛ̌ Yěsô á jʉ’ʉ Ssé
22Alyɛ̌’ɛ lésɔgɔ *lɔ’ɔ́ mápfò ná Malîɛ la gwɔ́ tà ne ńku’u, pá’ *lepʉ̌ Mǒsê la ne ńzɛ́te, Yesyɛ̂b pɔ́ Malîɛ kaa múɔ ńdɔg ńgʉa lé Yerósalem lényɛɛ yé mbwo Cʉ̀apʉ̀a. 23Á zɔɔn ńgwaa gwɔ́, mbà mé la ŋwe’e tsɛ̀ɛ sɛ̌ *lepʉ̌ ngie: Nyìŋ zyé mûɔ letwó we, á gwɔ́ mûɔ mbàŋa, á náa yé mbwo Cʉ̀apʉ̀a 24Malîɛ pɔ́ Yesyɛ̂b tó yɔ́b lénuŋe pwɔ́’ pá’ *lepʉ̌ Ssé ne ńzɛ́te ngie mé ná kapʉ̀ŋ sépʉ́a kà ngáb mánzsé yépʉ́a wɔ́
Símeon sǐe Ssé nà twó Yěsô
25Á gwɔ́ fʉ̀’ó, tsɔ̌ nyìŋ gwɔ́ Yerósalem, lezíŋ sé gwɔ́ le Simeon, á gwɔ́ nyìŋ, ńkú’te *lepʉ̌ Ssé ḿbiŋ ńjú’ ncwò wé. Mbà aa ńzɔ́gɔ ńzẅí’te nyìŋ gẅie à ge lá’ tó, pà Israel lɔgɔ yé ńtʉ, à Zẅìge Ndʉalʉ̌a gwɔ́ ntʉ́m yé. 26Mbà à la lá’ ńtʉ́ njÿó shwóŋó yé ngie à těen ńdá’a ńkwé té gwɔ́ gie à zabá léjÿɔ́g ná *Nzà’nkÿo gẅie à tǔm wɔ́. 27À Zẅìge Ndʉalʉ̌a gÿo, á gʉa *jʉ’ʉ Ssé, á gíŋe ńgwɔ́ pɔ́ fʉ̀’ó, mbà Yesyɛ̂b pɔ́ Malîɛ lɔgɔ́ mûɔ ńtó légÿo mmó gie *lepʉ̌ la ne ńzɛ́te. 28Símeon kẅé yé ńgẅiin mbwo yé, ńně síe Ssé, ńgɔɔn ngie: 29Cʉ̀apʉ̀a, áa fʉ̀’ɔɔn pá’ɔɔn,
ngwɔ́ ɔ̀ nyé ngàŋa fà’ gù á pʉ́lè ńkwé pá’ ɔ̀ la gɔɔn. 30Oon n dɔ̌g nÿɔ́g mɔ́ɔn ńgyá pá’ ɔ̀ ge gÿo
pʉ̀a mesoŋ tsẅɛ́. 31Aa letsẅɛ́ gẅie ɔ̀ la lá’ nyɛte ńzáb lényɛɛ mbwo ngwòŋo ngwòŋ. 32Á gwɔ́ kyɛ̀’ gie á ge gÿo mé zsé ɔ́ tsɛ̀ɛ njÿó ntsèm. Pú’u, ɔ̀ lɔg ńnáa legú’
mbwo Israel, á lá’ ɔ́.
Anò gie e Ssé neŋé ncwò Símo, á gɔɔn ná Yěsô
33Yesyɛ̂b pɔ́ Malîɛ jú’ menò mie Símo gɔ̌ɔn ná múɔ á kʉ’ʉ wɔ́b. 34Simeon cʉ́me wɔ́b mbwo Ssé ńdêen ńké ńgɔɔn né Malîɛ ngie: Míŋ ɔ̀ wɔɔn aa pá’ɔɔn ńké ńgwɔ́ gẅie Ssé ge cʉa nzèm yé gÿo eshʉ́ kú pʉ̀a tà ńgyɔ́ɔn Israel wɔɔn, é piŋ gÿo mé ná mékù’ lelÿò pʉ̀a, mélà’mie aa nyìŋ gẅie Ssé lɔgɔ yé ńnyɛɛ mmó gie à ne ńgÿo, tá pʉ̀a mesoŋ ke ńgwága yé gwág. 35À cʉa pú’u, tá mekwaŋte mie ée melóŋ pʉ̀a kẅɛɛ mángyɛ̌. Á gʉa ná gù Malîɛ, mbà nò ge lá’ gÿo ɔ́ tà ɔ̀ jú’ à gwá’a fʉ̀’e mé lɔgɔ́ pù’ sɔbɔ tʉ́m ɔ́ la.
Ánɔ́ɔn sǐe Ssé ńtíi Yěsô
36Atsɔ̌ méndÿò manzwě la gíŋe ńgwɔ́ yé Yerósalem fʉ̀’ó, lezíŋ sé gwɔ́ le Ánɔ́ɔn, á gwɔ́ míŋ Fanuel á nà ngẅɛ̀ ndá Asɛ̀ɛ. À lɔ̌ɔn ńjú’u nò mbwo Ssé é shwóŋó lá’. Á la gwaa gwɔ́, mbà à la lêen ńzɔ́’ yé ńgÿo ndà’ ngù’ sɔɔn mbʉ́a andǔm we kwé. 37A la cʉ́’ʉ mpfɔ̌g pú’u, ńké těen ńtsó *jʉ’ʉ Ssé wɔ́, ńnéŋe *ńkwoŋo kwoŋ ńnéŋe nzyè, ésẅíŋte Ssé, ńtsẅé ńgu’te yé fʉ̀’e zsǒ pɔ́ lêtsẅɛ́’, ńdá’ ńgẅiin ngù’ ntsɔ̀b lekùa lê móm lefɔ̌ɔn, 38ńtóo *jʉ’ʉ Ssé tsɔ́ lyɛ̌’ pá’ à zɔ̀ɔn ńtóo, ńgwaa kúu wó fʉ̀’ó, mbà mé lɔgɔ́ múɔ ńtó, á gyá yé, ésíe Ssé, ńdêen ńké ńzye léshwóŋó nò wɔɔn múɔ mbwo pʉ̀a metsèm pie é la ne ḿbyɛ́bɛ lyɛ̌’ gie Ssé ge lá’ cu’u Yerósalem.
Ntí gie Yěsô lɔ̌g ńgú’u Nǎzarɛd
39Yesyɛ̂b pɔ́ Malîɛ gÿo shwóŋó nò gie pɔ́ tǒ mǒ tà ḿmag pá’ *lepʉ̌ Cʉ̀apʉ̀a la ne ńzɛ́te, ḿbiŋ zèm le Galilea, á tÿǒsoŋo pɔ́b Nǎzarɛd. 40Múɔ ne ńgú’u, azsé nò yé né ńkẅi’i tɛ’, á gíŋe ne ńzsé mmó gie Ssé ne ńkwoŋo ngie pʉ̀a mesoŋ gÿo, e Ssé piŋ ńgwɔ́ lê yé.
Yěsô gwɔ̌ ngù’ ntsɔ̀b pʉ́a
41Yesyɛ̂b pɔ́ Malîɛ lɔ́ɔn ńgwɔ̂ ngù’ ntsèm, ńgee Yerósalem léjÿó línɔ́ɔn *Páskà. 42Yěsô gÿo ńgwɔ́ tà ńgẅiin ngù’ ntsɔ̀b pʉ́a pâ pɔ́ pú ńgʉa pá’ tsẅé lá’ yɔ́b la ne ńzɛ́te pú’u, 43ńjÿó línɔ́ɔn ta á mag, ńgwɔ piŋ nzèm, múɔ zsô Yerósalem pɔ́ té zsé. 44Pɔ́ la ne ńkwaŋa pɔ́ ngie aa tsɛ̀ɛ nùɔ yɔ́b, tà ńgiŋe tà’a lyɛ̌’, ńdíe yé tsetsɛ̀ɛ pʉ̀a ngẅɛ̀ ndá yɔb pâ pʉ̀a pɔ́b, 45ńdá’ tè yé gyá, kékáŋ tà ḿbiŋe Yerósalem, ńgiŋe fa’a yé, 46é gwɔ́ lẅíŋe lyɛ̌’ tá, pɔ́ gyá yé, á *jʉ’ʉ Ssé, á ńnéŋe tsetsɛ̀ɛ *pàkyàgte mbʉ̌ Ssé, ńné ńjú’u menò mie pɔ́ ne ńgɔɔn ḿbiŋ ńgíŋe ně ńzɛ́te wɔ́b tsɔ́. 47Pʉ̀a pie é la jú’u shwóŋè yé ně ḿbúu ńgɔ’te zsé nò yé mbɔɔ yé ntí letsɔ’ɔ́ nò. 48Yesyɛ̌b pɔ́ Malîɛ gwɔ́ tà ńgyá yé ḿbú ḿmɔɔn tɛ’. Má we gɔɔn né yé ngie: Míŋ wɔ̀ɔn, ɔ̀ gwǎ zsé ngie ɔ̀ ge gÿo yɔɔn nò ná peg pá’ɔɔn á gwa’á la? Ɔ̀ kéen ńtsɔ́’ɔ léme yeg tá gù, peg zɔ́gɔ léfa’a ɔ́, ńně ḿbɔ́gɔ ngie kà tsɔ́ mmó zɔ̌ kéen ńgÿo ɔ́ wɔ́? 49Á tsɔ́’ɔ mbwo pɔ́b ngie: Pi piŋe fa’a wɔ̀ɔn pú’u, mélà’a kɔ́? Pi te ně ńzsé ngie á póŋ mèŋ shwôŋ menò Tá wɔ̀ɔn mɔ́ kà? 50À la tsɔ́’ pú’u, pɔ́ ké te jú’u nò gie à lɔgɔ ńgɔɔn wɔ́. 51À la gɔɔn pú’u, pâ pɔ̌ piŋ nzèm né Nǎzarɛd, á ně ńjú’u ncwò wɔ́b. Má we ké ńde’e mɔɔn menò ntsèm pɔ́ tsɛ̀ɛ ntʉ́m yé. 52Yěsô ne ńgú’u, azsé nò yé né ńkẅi’i, e Ssé gwɔ́ lé yé, pʉ̀a mesoŋ ně ńkwoŋo yé.
Currently Selected:
Lukase 2: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.