Luk 24
24
1bara wik yua pas, titan pali mairin nani ba raiti ra kli aidrubi balan, bara isint kîa pain nani witin nani ridi daukan kan ba sin brih auya kan. 2Witin nani wan ba ra, kaikan raiti pura praki bri kata walpaya ba âpu kan; 3bara raiti ra diman, sakuna Dawan Jisas wîna tara ba bahara sakras kata. 4Witin nani tâ iwan pali takan bara dîa daukaia sapa sin kaikras kan. Baku bamna, witin nani ai lamara waitna wâl bûi kata, kwala ingnikira dimi. 5Witin nani sin sibrin mita tasba ra ai lal makupan; bamna baha waitnika nani mita win:
—¿Dîa kan man nani upla raya ba pruan nani tilara plikisma ki? 6Nahara âpu sa; witin ba pruan wina buan sa. Kupiam krauks, witin kau Galili ra kan piua ra, dîa man nani ra mai win ba: 7‘Upla Luhpia Waitna ba upla saurakira nani mihta ra mangkan kabia, dus prihni ra sin saban kabia, bara yu yumhpa ra kli bubia.’#Mt 16.21; 17.22-23; 20.18-19; Mk 8.31; 9.31; 10.33-34; Lk 9.22; 18.31-33.
8Mairin nani ba Jisas bîla nani dukiara ai kupia tanh krawan, 9bara raiti wina kli tawi balan ba ra, apastil 11 sut ra maisa pakan, bara baha nani bahara kan ba sut ra sin. 10Naha sturka apastil nani ra bri si maisa pakan mairka nani ba lika: Meri Magdalin, Juana, Meri Jems yaptika ba, bara mairin wala nani kata ba sin. 11Apastil nani kaikan mairin nani dîa aisi kan ba lika tanis baku kan, bara kasak sin lukras kata.
12Ban sakuna, Pita lika taki plapi, raiti ra wan; bara witin wih raiti bilara diman, bara kaikan linin kwalka nani kata ba tnaya ra swin kan, bamna witin kli tawi utla ra balan diara nani takan ba dukiara tâ iwan pali.
Emaús yabalka ra
(Mk 16.12-13)
13Baha sim yua, witin nani tila wina wâl ba tawan kumi nina Emaús wi ba baha mata auya kan; baha ba Jerusalem wina 7 mail brisa. 14Witin nani ba dîa dîa takan ba sut dukiara aisi auya kan; 15bara witin nani aisi, makabi wali kan, bara Jisas witin nani lamara wih, aikuki impakan. 16Witin nani kaiki kan sakuna, diara kum mita munan sip witin ba pain pali kaikras kan. 17Bara Jisas makabi walan:
—¿Man nani yabal ra wapi, dîa pana pana makabi wali banhwisma na?
Baha nani aisi kan ba sari takaskan. 18Witin nani wina kumi, nina Cleofás mâki ba bila:
—Tasba aiska ba kaikan naha piua nani ra dîa Jerusalem ra takan ba. ¿Man baman dîa upla tringsar kum bahara takaski katma ki, naha diara takan na tânka briras?
19Pana witin bila:
—¿Dîa takan ki?
Witin nani bila:
—Jisas Nasaret wina ba dukiara sika, witin lika prapit karnakira kata, diara daukaia mapa ra bara aisaia mapa ra sin, Gâd mawanra bara upla nani mawanra sin. 20Wan prîska tara nani bara wihta nani mita sin witin ba pruaia pâtka ra lakan, bamna witin nani bui Jisas ba dus prihni ra saban. 21Yang nani sin kainara luki kapri, witin ba Israel nisanka ba pri sâkbia. Bara nanara, baha sut purkara, baha takan ba wina pat yu yumhpa luan. 22Yang nani tili wina mairin tila nani mita sirang wan ikan, kan witin nani titan pali raiti ra wan, 23bara wîna tara ba sakras kan bamna, baha nani bal wan maisa pakan, nahki diara aihka kum kaikan bâk insal nani kaikan, bara baha nani mita win Jisas ba raya sa. 24Ningkara, yang nani upliki tila nani sin wan raiti ra, bara mairin nani wan win ba kat sakan, sakuna Jisas lika kaikras kan.
25Bara Jisas win:
—¡Man nani lika sip diara tânka briras sma, prapit nani diara nani aisin dukiara sin pat sip kasak lukras sma! 26¿Bamna Misaya dukia apia kan ki naha pâtka nani wahwi si, ai prana ra dimi iwaia?
27Bamna mahka Ulbanka nani witin ai tânka aisi nani ba saki tânka smalkan, Moses wauhkataya nani wina ban prapit nani ulbanka nani ba kat.
28Witin nani auya kan tawanka lamara balan ba ra, Jisas ai yabalka ra ban impakaia baku munan. 29Sakuna witin nani ba mita taibi munan takaskaia, bara naku win:
—Yang nani wal takasks, kan yu pat tutni sa bara tihmia iwaia man sa.
Baku mika, Jisas diman witin nani wal takaskaia. 30Witin nani aikuki pat tibil ra iwi kan ba ra, witin ai mihta ra brit ba brih, yamni muni, kriki, witin nani ra yan. 31Baha sim piua ra ai nakra nani ba ilingwan kata, bara witin ra latan kaikan; sakuna naha ningkara, witin lap tiwan. 32Bara witin nani pana pana aisan:
—¿Kasak apia, wan kupia ba lapta taki kan sim pauta baku witin yabal ra wan aisi aula kan ba ra, Ulbanka nani tânka saki wan wi kan ba ra?
33Bamna kau sip takaskras pali, witin nani mahka yabal ra aimaki Jerusalem ra balan, bara bahara apastil 11 ba bara wala nani sut aikuki asla takan kan ba wal prawan. 34Naha nani mita win:
—¡Kasak pali Dawan ba kli raiti wina buan sa, bara Saiman kaikan!
35Baha wina witin nani wâl mita win dîa yabal ra takan ba; Jisas brit krikan bara latan kaikan ba tânka sin wisata.
Jisas ai disaipilka nani ra latan takisa
(Mt 28.16-20; Mk 16.14-18; Jn 20.19-23)
36Baha diara nani ba dukiara witin nani kau aisi kan ba ra, Jisas witin nani lilapas kat buan, bara lakula dauki, naku wisata:
—Kupia kumi man nani ra kabia.
37Witin nani tâ iwan, bara sin sirang iwan, bamna lukan spirit kum witin nani kaiki kan. 38Sakuna Jisas win:
—¿Dîa kan man nani tâ iwan takram, bara dîa muni man nani kupiam ra namhpa namhpa baman lukisma ki? 39Kaiks mihti nani na bara mini nani sin. Yang pali sna. Mihtam ni ai alki ai kaiks: spirit kum lika wîna tara bara dusa nani sin briras, man nani kaikisma yang brisna ba baku.
40Naha aisin ba ra, ai mihta nani bara ai mina nani sin marikan. 41Sakuna witin nani lilia mita bara tâ sin iwan ba mita kau ban sip kasak lukras kan bamna, Jisas bila:
—¿Piaia plun nahara brisma ki?
42Bara witin nani mita inska angkan pîs yan, 43bara Jisas baha ba brih witin nani mawan kat pin. 44Ningkara, witin bila:
—Dîa yang ra takan ba tânka sika sut mai wîri, kau man nani wal katna ba ra: Baha ba sut aimakaia kan, yang dukira dîa Moses lâka ra ulban ba, prapit nani Ulbanka ra ba, bara Pura Sunra Lawana nani ra sin.
45Bamna Ulbanka nani tânka ba yan brin, 46bara naku sin win:
—Baku ulban sa, Misaya ba pruaia kan, bara yu yumhpa kat pruan nani wina kli buaia; 47bara ai nina ba nisan nani sut ra aisi smalkan kabia, Jerusalem ba wina tâ krikaia baha nani ra sin wiaia, ai saurka nani ba wina ai kupia lakbia, bara baku mika ai saurka nani ba sut swin tikan kabia. 48Man nani sika naha diara nani sut witniska nani sma. 49Bara kaiks, yang bui man nani puramra blikamna Aisiki dîa pramis munan ba;#Ap St 1.4. ban sakuna, Jerusalem tawanka na ra takasks ani piua ra pura wina karnika brima ba kat.
Jisas kasbrika purara uli wan ba
(Mk 16.19-20)
50Bamna Jisas mita baha nani ba tawan ba wina brih taki wan Betania kat, bara witin ai mihta nani buki, witin nani ra yamni munan. 51Bamna baha nani ra yamni muni kan piua ra, baha nani wina dakwi takan, bara kasbrika purara brih wan kata.#Ap St 1.9-11. 52Witin nani lika Jisas ra ai lula kriki mayunan ba ningkara, kli Jerusalem ra liliakira aidrubi balan, 53bamna yu bani tempel ra Gâd ra mayuni kan.
Currently Selected:
Luk 24: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua