Jan TÂ BÎLA NANI
TÂ BÎLA NANI
Upla manis ban lukisa Jan naha wauhkataya na lâs ra ulban, ahkia ulban piua ba sin nâra param wan wiras bamna. Ban sakuna, Jisas sturka yamni ulban wauhkataya wala nani ba ra kaikaia sip sma nahara ulban na wal sât wala sa. Dawan aisinka daukanka nani manis nâra ulban na, wauhtaya wala nani ba ra ulbras sa.
Witin sin nâra aisisa Mark aisin ba baku Jan Tatahbra dîa daukan ba pas (1.19-51). Bara Jisas ai warkka upla nani mawanra param daukan ba sin (2.1—12.50), Galili ra wark daukan ba wiria aisisa, sakuna Judia ra wark daukan ba aisi smalki kan ba kau aisisa. Bara witin sin kau aisi ba Insal luan Yua tila ba ra, piua tara wala nani liliaka sin Ju nani dauki kan ba tilara Jisas sin bâra kan ba.
Kau pât wauhras kainara sin witin Jerusalem ra wan ba (13.1—19.42), witin raiti wina buan bara ai disaipil nani ra kli param takan ba sin, baha sturka wauhkataya wala nani ra takras ba nâra ulban sa. Ban wibia kaka, parisi nani bara Grik nani aikuki Jisas ra wih kaikan ba. Galili kabuka un ra witin latan takan ba, Pita ra kli bukan lâka yan ba nâra baman aisisa (sapta 21).
Jan Jisas sturka yamni ulbi ba lika, witin wark daukan ba wan wiaia dukiara apia, sakuna witin marikisa Jisas ba ya. Witin dukiara sika tâura ulban ba (1.1-18), baha ra sika wan marikisa Jisas ba Gâd Bîla ban kaia ba, witin lika upla takan bara upla tilara iwisa.
Witin diara aihkakira nani dauki marikan ba sain nani daukan ba mita param marikisa witin ai tânka ba. Sturi nani aisin tânka ba diara aihkakira nani daukan ba mita param marikisa, kaiki tânka briaia sip dukia nani ba marikan: lî, brit, ingni baha ni smalkisa wan rayaka ban kaia Gâd ai prisantka wanki Kraist bâk, nanara upla nani naha rayaka ra baha prisantka bri ba, Jisas ra iwi Jisas ba ai yabalka, ai kasakka, ai rayaka baku kaiki ba (sapta 13—17). Baha tihmia witin ai disaipilka nani aikuki asla pali kan sturka ba dahra sut ba param pali wan marikisa, bara nahki witin ba kau alki priski brih waras, dus prihni ra sin kau sabras kainara, witin baha nani tâwan makabi ai pura sunan nikbanka daukan ba sin, witin nani ba ridi daukan lukanka tâ baikan ba.
Naha sturka yamni ulbanka ra tânka tara nani bâra sa Jisas wina wanki ba: “Yang sika” rayaka britka, tasba aiska ingnika, sîp klarka durka, sepad yamni, raiti wina kli buaia lâka ba, wain kiwka kasak aihwa ba, yabal ba, rayaka, kasakka tânka. Baku sin naha wauhkataya ra baman ulban sa tânka sitnika wina dîa pali ba dukiara ulban ba: ya ya naha aisi kaiki bara Jisas ba Kraist balaia pramis kata ba, Gâd Luhpia ba bara witin ra kasak lukbia ba raya ban kabia (20.31).
Currently Selected:
Jan TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua