Impakan Sturka 3
3
Dawan bui Moses paiwan ba
1Moses ai dapna Jetró,#3.1 Moses dapnika nina yumhpa sa, nahara Jetró ulban sa; nina wala nani ba Reuel bara Hobab. Madián prîska ba sîpka nani ba main kaiki kan. Yu kum upla iwras tasbaya bâk lui, witin ban Gâd ilka Horeb#Horeb ilka ba upla kakaira sa, sakuna nina wala ba sin ulban sa Sainai ilka. kat wan. 2Bahara Dawan insalka kum witin ra latan takan pauta buki klauhi baku, kiaya dusa kum tilara. Moses aman pali kaikan kiaya dusa ba buki amisa sapa, sakuna amras sa. 3Bamna witin aihka lukan: “¡Baha ba dîa sât dukia diara kum aihka pali ba! Yang wih kaikaia sna nahki pali kiaya dusa ba sip amras ba.”
4Dawan kaikan Moses ba kau ai lamara aula, bara witin kiaya dusa ba tila wina witin ra wini, naku win:
—¡Moses! ¡Moses!
Bara Moses pana aisin:
—Yang nâra sni.
5Bara Dawan bui Moses ra aisin:
—Kau laimara balpara. Sûskam ba minam wina sâks, tasbaya minam taibi sma ba sunu sa bamna.
6Baha purkara win:
—Yang na damikam nani Gâdka sni, Ebraham, Aisak bara Jekob Gâdka ba.
Moses Gâd bîla baikra walan ba ra, Gâd mawan ingnika kat kaikaia sibrin daukan, bara witin ai mawan yukukan. 7Sakuna Dawan kau ban witin ra aisi, win:
—Yang upliki nani Idsip ra pât saura wahwi ba param pali kaikisni. Wark pura kakaira nani ba mita witin nani ra saura muni bara ai mâmna lulki ini makabi ba yang walri, yang kasak pali kaikisni witin nani pât saura pali wahwisa. 8Bamna yang bal iwri, witin nani ba Idsip uplika nani mihta wina dakbi sakaia; yang bui witin nani ba baha tasbaya wina bri sal sakamni bara tasba tara tasba pain kum ra bri si yabamni, bahara tiala laya bara nasma wal laiwi baku ba. Kenan uplika nani, hitita nani, amorreo nani, ferezeo nani, heveo nani bara Jebús uplika nani iwi ba tasbaya ra. 9Kaiks, Israel luhpia nani inanka ba yang walri, baku sin kaikisna Idsip uplika nani mita witin nani ra saura pali muni ba. 10Baha mita nanara man yabal ra aimaks, yang mai blikisni Idsip kingka fero mawanra waia, bara yang upliki Israel luhpia nani ba tâ brih baha tasbaya wina sakaia.#Ap St 7.30-34.
11Bamna Moses bila Gâd ra win:
—¿Yang na yamna sna ki king fero mawanra waia, bara Israel luhpia nani ba Idsip wina brih sakaia?
12Bara Gâd pana aisi, win:
—Yang lika man wal kamni, upliki nani ba sut Idsip wina brih sakram kabia ba piua ra, man nani sut baha ilka kat bal yang ra mayunra aiki kama. Baha ba yang pali mita mai blikri ba tukinka kum kabia.#Ap St 7.7.
13Sakuna Moses kli pana aisi, win:
—Trabilka ba sika, Israel luhpia nani ra yang wamna bara wimna: ‘Man nani damikam nani wan kanra lui wan ba Gâdka ba mita ai blikan wimna piua ra’,#Imp St 6.2-3. witin nani bui yang ra makabi walbia: ‘¿Witin nina ba dîa?’ ¿Bara yang bui witin nani ra dîa wimna?
14Bara Gâd kli pana aisi, win:
—YANG BA, YANG SNA.#Jn 8.24,58; Par M 1.4,8. Israel luhpia nani ra wis: ‘YANG BA, YANG SNA ba, witin mita man nani ra ai blikan.’
15Baha purkara, Gâd sin Moses ra win:
—Israel luhpia nani ra wis: ‘Dawan ba man nani damikam nani sut Gâdka ba, Ebraham, Aisak bara Jekob Gâdka ba mita ai blikan sa man nani ra.’ Naha sika yang nini ban kaia ra ba. Naha nina ba wal upla kiamka nani taki ba tilara yang ra luki kabia. 16Man was, Israel luhpia nani tâ uplika nani ba sut asla dauks bara witin nani ra wis: ‘Dawan ba, man nani damikam nani sut Gâdka ba, Ebraham, Aisak bara Jekob sut Gâdka ba, yang ra latan takan bara ai win witin lika man nani trabilkam tara ba sut kaikisa, Idsip uplika nani mita nahki saura mai muni ba. 17Baku sin ai win: Man nani Idsip ra pât wahwisma ba wina witin mita pri mai sakaia sa, bara tasba wala ra mai brih waia sa, Kenan uplika nani, hitita nani, amorreo nani, ferezeo nani, heveo nani bara Jebús uplika nani iwi ba tasbaya ra, bahara tiala laya bara nasma wal laiwi baku ba.’ 18Tâ uplika nani bîlam walbia; bara man lika witin nani aikuki Idsip kingka ra mawanra wama, bara wima: ‘Dawan, Hibru nani Gâdka ba yang nani ra bal takan sa. Bamna aik yang nani yu yumhpa upla iwras tasbaya ra wapamna, bahara yang nani Dawan wan Gâdka ra sakripais dauki yaia.’ 19Ban sakuna, yang kaikisna Idsip kingka ba mai swika taki wama apia, taibi munras kabia kaka. 20Bamna yang bui witin nani ra karniki marikamna, diara aihkakira karnakira nani ai tasbaya ra daukamna ba wal, prura wal sin witin nani ra klala yabamna; baha ningkara witin mai swika taki wama. 21Baha purkara, yang bui Idsip uplika nani ra munamna Israel luhpia nani ra kulkanka yabia, bara kupia yamni lâka marikbia, witin nani taki auya bara mihta bîla baman taki waia apia ba mata. 22Mairin kumi bani, Idsip mairka nani ai lamara aikuki iwi ba ra, ai watla ra witin aikuki dimi nani ba ra sin diara makabaia: silbar dukia nani, gul dukia nani, kwala nani sin, bara baha dukia nani ba ni ai luhpia waitna ai luhpia mairin nani prâka dingki brih taki wabia, baku natka ra Idsip uplika nani yuyaka ba sut dakbi brih taki wabia.#Imp St 12.35-36.
Currently Selected:
Impakan Sturka 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua