Impakan Sturka 2
2
Moses aisubi takan ba
1Baha piua ra, waitna kum Libai kiamka wina ba ra, mairin kum sin Libai kiamka ba wina wal ai maya takan. 2Bara mairin ba kwihra tiwan, ai luhpia waitna kum baikan, witin kaikan bibi ba painkira kan, bamna kati yumhpa yukuki brin ai watla ra.#Ap St 7.20; Hib 11.23. 3Ban sakuna, witin nani kau piua wihka sip yukukras kan, bara baskit kum brin, bara untika nani sut tar wal lasbi prakan lî dimbiara sîa. Bara tukta ba baha bilara mangkan, bara Nilo awalka un ra bri si, klisang tilara swin. 4Bara bibika lakrika kum swin, witin ba itwi baku takaski bâra kabia, tuktika ba ra dîa takbia sapa kaikaia dukiara.
5Tisku baku kan, king fero luhpia mairin ba awala un ra bal iwan aihtabaia. Ai albika mairin nani ba, awala unku wapi tauki kan ba ra, king fero luhpia mairin baskit ba kaikan, klisang nani tilara kan ba. Bara ai albika mairin kum blikan wih brih balan. 6King fero luhpia mairin bui baskit pura ba bukutban bara kaikan bilara tuktan waitna lupia kum inisa, bara witin ai kupia ra latwan pali kaikan bara win:
—Naha na Hibru nani bibika kum sa.
7Bara tukta lupia lakrika ba bal king fero luhpia mairin ra win:
—¿Yang wih Hibru mairin kum pliki bri balamna ki, tukta na tiala dakaki maikaia?
8Bara king fero luhpia mairin bila:
—Pliskam, baku dauks.
Mairin lupia na naha wali isti pali plapi wan, tukta lupia yaptika kat wih bara bri balan. 9Bara king fero luhpia mairin witin ra win:
—Tukta na bris, wamtla ra brih was, bara paki aik. Warkkam mana ba yang mai aibapamna.
Bara tukta yaptika bibi ba ai watla ra brih wan, bara pakan. 10Naika kan tukta ba aitani tara takan ba ra, witin ba king fero luhpia mairin ra yaban. Nanara king fero luhpia mita tukta ba ai luhpia pali baku daukan.#Ap St 7.21. Bara win ai nina ba Moses,#2.10 Hibru ra ulban sa Moses, baha tânka ba sakaia. Idsip uplika nani bîla kat, naha nina ba tânka wisa “aisubi takan”. kan witin win:
—Yang mita witin ba lî wina sakri.
Moses Idsip wina Madián tasbaya ra plapan ba
11Moses ba pat tara pâwan kan ba ra, impaki taki wan ai uplika Hibru nani ba kaikaia. Baha piua ra kaikan, ai uplika nani ba nahki taiban lâka mununhtara wark karna taki ba.#Hib 11.24. Bara sin kaikan, nahki Idsip uplika kum mita ai uplika Hibru kum ra saura pali pruki kan ba. 12Bamna witin ai tnaya kir sut pain pali ai kaina pliki kaikan, upla kumi sin witin ra kaikras kan. Bara witin Idsip waitnika ba iki, auhya ra salhki biki yukukan. 13Yu wala kli witin taki wan, bara kaikan Hibru kum ai tahkia ra aiklabi kan. Bamna witin pâtka dauki ba waitnika ra win:
—¿Dîa muni man klauna uplikam ra prukisma?
14Bara waitna ba pana witin ra win:
—¿Man ba ya mita yang nani tilira wihtka kaia mai mangkan? ¿Dîa, yang ra sin ai ikaia lukisma, Idsip waitnika ra ikram ba baku?#Ap St 7.23-28,35.
Moses baha walan ba ra sibrin takan, kan ai dara walan witin Idsip waitnika ikan ba, upla nani pat tânka brin sa. 15King fero baha sturka walan, Moses mita Idsip waitnika kum ikan ba. Bara witin bui upla blikan wan, Moses ba pliki saki alki ikaia. Sakuna Moses ba plapan, Madián tasbaya ra wih yukuwan.#Ap St 7.29; Hib 11.27. Yu kum witin liwanhta kum purara iwan.
16Bara Madián prîska Reuel luhpia mairin nani 7 ba balan liwanhta ba ra, ai aisika sîpka nani lî panhki dakakaia bara laya watla nani sin banhkaia dukiara. 17Sakuna sepad nani balan, witin nani ra liwanhta ba wina kangban. Bara Moses buan, mairin nani ba tâwan aisin. Bara lî panhki sîpka nani ba sut dakakan. 18Baku mairin nani ba, kli ai aisika ra tawi wan ba ra, aisika mita makabi walan:
—¿Nahki kan man nani naiwa na, ban pat pali tawi balram na?
19Bara mairin nani ba pana win:
—Aisa, Idsip wina waitnika kum mita yang nani tâiwan aisin sepad nani mapara, baku sin lî panhki sîp nani sut ba lî dakakan.
20Bara Reuel bila ai luhpia mairin nani ra:
—¿Bara anira sa waitnika ba? ¿Dîa muni witin ba swih balram? Wih paiwi bri bal yawan aikuki plun piaia.
21Naku tâka ba wina, Moses Reuel watla ra takaskan. Ningkara, Reuel ai luhpia mairin Séfora ba Moses wal maya baikan. 22Séfora luhpa waitna kum baikan, bara Moses bila: “Yang na naha tasbaya ra tringsar sna bamna, witin ai nina ba Guersón mâkamni.”#2.22 Hibru ra ulban sa Guersón, baha tânka ba, tringsar.
23Mani nani lui ba tilara Idsip kingka ba pruan. Sakuna Israel luhpia nani lika ban alba lâka munhtara pât saura wahwi kan. Witin nani ini ai mâmna lulki makabi kan ba Gâd walan. 24Bara witin ai kupia krawan Ebraham, Aisak bara Jekob aikuki lâ daukan lâka ba#Bla St 15.13-14. dukiara. 25Bamna Gâd kaikan Israel luhpia nani nahki pât saura wahwi ba alba lâka mununhtara, bara witin baha nani dukiara lukan.
Currently Selected:
Impakan Sturka 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua